Country plage

 

Pindaint nou vagance mi pi m'fenme os ons té fouére éne vérlée* in Picardie Maritime . Adon os ons cminché no jornée a Advile ; oz o cafioté* conme tout boin Picard qu'i s'respéc ; pér aprés mi pi min blanc bonnet on s'a desséperé , elle a l'o foait du léque carrieus* pi mi j'o té mon ch'libraire Duclerc , j 'ai tchére chol librairie lo , is ont tours eune quérque ed lifes Picard la d-din ! A n'o poin mintché ! J'ravise un , pi deux , pi troés lifes ...Bernique ! chétlo , jé z'z avoais a m-moaison . Ej raveude coér un molé et lo ! miraque ; ej démuche ech l'AMASSOÉR à Marie Madeleine Duquef ( Tchotchote) ; qu'a faisoait deux ans qu'j él vouloais ....El tcheue d'no tchien al est bien vnue .

Os nos ons rjoint à cho'c cathédrale St Vulfran , oué ém fenme ch'est éne vraie guérnoule ed bénitier ; oz o mis éne candéle à Bernadette de Soubirou ; pi ch'étoait djo l'heure ed dîner ! Aprés -none os ons roulé un peu à Fort Mahon , éne bouéne glache a l'érchinache , tout est fin bien à ch'tépoque lo i n'i o mie d'trop d'monne ....Au vrèpe ej dit à m'fenme : Oz iroait ti poin à Quend laper un jus d'houblon ? Sié , qu'a m'rinfique , arrivé la bos j'ai cru avoér éne bleuse vue , n'y avoait éne coupe ed fenmes atifées* conme laura Ingals ( pour ceuss qu'is s'raminteuv'te ed cho'p ptite maison din la prairie ) ...Chés honmes avu des capieus d'cow boys, pi des tiagues à leu piés ! Bée n'in vlo d'én eute qué j'dit à m'fenme , is torn'té pététe un flime ? Os nous ons rappreuchés dé ch'centre-ville pi qu'ech busin* i vnoait d'pér la et lo , os ons comprind toute ch'étoait ch'clup ed Country ed St Quintin Lamotte qu'i prisintoait leu spéctaque ! Ej déclaque à m-moitié ! Bé, i nos résse pus qu'a treuver ch'saloon pou chucher no dmis , Crénon dés z'os !!!


* Vérlée = une virée

*Du léque carrieus = Du léche vitrine

* Atifées = habillées

* Busin = Bruit

 

Ch'titation ...

Paure lazére

Nér-nu * din cho'g gaïolle avu chés ions* . Soin , a n'est mie cho'l nouvélle étnue ed chés drésseux d'fauves .

Nan ch't histoére lo a s'passe à Santiago amon chés Chilliens . Un jonne honme ed vingt ans d'age i s'o jéjté din cho'c cage a ions complétmint à poélle ; i vouloait s'détruire ! Qué pécavie* qui y o prind ?! ....Adon , chés bétails is ont cminchés pér s'éjuer avu ch't honme edvant dé l'morde . Tertous chés gins alintour ed cho'c cage , ébeubis dé ch'qu'is voéyoait't , un molé éffoayés . D'z autchuns is ont ahoupés chés gardiens d'chu zoo ; et malhéreusmint is n'ont mie pus fouére autremint qu'd éscofiés chés ions !

Est ti poin malhéreux d'avoér occi chés paures bêtes pour un gazier complétmint braque a foait . Pour mi ch'gardien i s'a berluré d'cibe



* Nér-nu = Tout nu

* ion = Lion

* Pécavie = Lubie

Méli park...

Probabe qu'os étoéme din chés bieus jours pi qu'chés gins alintour ed mi is étoét't in pil-cor et in courté-tchulottes . Eum n'onque pi m'tante et Max ,lu fiu ,is avoait't don décidé qu' mi pi m'soeur os iroéme avoék eux à Méli parck in Bégique .

J'ém ramintuve ch'étoait in 1976 ch'l énée d'cho'c canicule ; ém n'onque Jacques sur ed li , i nos déclatche conme cho : os allons prinde chés batieus pour inroéyer* a nos rafraichiro un molé d'éte su l'ieu ....Fut dit fut foait os imbarquons , mi avu min cousin Max , pi m'soeur din ch'deuxiéme batieu avuc no gins ! Os avoéme poin coére foait deux chint métes et vlo qu' chés batieus is s-sont mit à freiner pi a s'arter complétmint . Os étoéme lo dvant un poéysage qu'i l'espliquoait cho'b Bégique d'antant , chés monumints , pi tout ch'bataclan* ...

A ch'début ch'étoait putôt marrant d'éte in raque in plein miyu d'éne grotte (os nos attindoéme pététe a un mirake ) ! Mais min cousin i cminchoait à s'épiner un molé , a s'torner pi s'ratorner conme o din tous les sins conme un tchien mié à puches ; j'n artoais poin d'li dire : N'n érmue don poin conme cho éhh ch'cabite té vas nos fouére baler pi bouére cho't tasse Nom dés Zos!

Pér aprés s'avoér rapuré un peu , el vlo qu'i, plonge és main.ye din l'ieu . D'un coup sin pére qu'i l'étoait driére din l'eute batieu et d' tout sin sain i s'met a djeuler ! Déssatche ét main rondébilis* , est crapé a foait , tout l'monne i raque* là d-din ! Pi i continue in déclaquant . Sié , j'el sais pisqu'ej
dé l'fouére !

Bée , tant pir pi qu'tos tés main.ye din l'ieu proufite z'in pour raveinne chés piéches eq chés gins is garot'te chés bindes d'Halbrans ! Is s'croét't a cho'f fontaine ed Trévise . Laiche mé d-dire éne saquoé : ch'qui porte bonheur ; ch'est putôt de z-zés récouer chés pécaillons !

Os nos ons r'béyé mi pi min cousin , pi os ons rigolé conme dés bochus ! Qué partie qu'os ons foait ch'jour lo !

* Inroéyer = Terme de labour , faire le premier sillon , employé ici dans le sens de commencer

* Ch'bataclan = pleins de choses , tout le reste ...

* Raque = crache

 

El djére ed chés waters !

Adou qui feut qu'on voaiche fouére eune pichate ?? Sié ! is s'pos'té cho't tchéstion la amon chés Améritchains din ch'l état du Missisipi ! Soin , j ai poin dit "el mi ch'est pipi "

Ed quoé qui n-n in r'torne ! Quand qu'os éte un marle os allez picher din ch'coin des honmes ; pi si qu'os éte eune fenme os allez mon chés fenmes , dusqu'a la ej su seur qu'os comprindez toute .

Adon , si qu'os éte un honme pi qu'os vos avoait foait coper vo... machin* ; pi éne fenme qu'a s'a foait gréffer éne eingin* pour érsanner à un marle ! Bée ; chés gins lo , adou qu'is voait't ? Chés parlémintaires is réclam'te eq chés pratiques is doét't és sérvir ed chés waters éslon leu sexe qu'is sont nés avoék

... Biologic conme is dit't , minme si inter deux i n'y o yeu du cangemint . A vut dire eq chés honmes qu'is sont vnus fenmes is doét'te continuer d'aller din chés waters pou chés marles ; pi du minme parél pou chés fenmes dévnus honmes , is continut't d'aller mon chés fenmes ! A n'o mie d'sin quand qu'oz i busie un molé ! M'afin ...chés z'Améritchains !

Os m'avourez qu'dés foés quante i o granmint d'monne , on va d'ou qu'on peut , a m'a djo arrivé pu souvint qu'a min tour d'aller din chés waters pou chés affligés ; ch'est pus grand à foait , pi ch'est tours* prope ....Si cha tombe ch'est avules* is n'pich'té poin !! 

Bin quoé !!? ti poin vrai !!

　

* Machin = biroute

* Eingin = Parél eq machin ...

* Tours = Toujours

* Avule = Aveugle
 

El djérre "d'ésseince"

A intinne dire chés grosses lédjeumes dé ch'gouvernmint tout i vo bien din chés éstations d'éssinche , is n'sont poin sé conme braise ! OUÉ , wate min ziu , in attindaint min blanc bonnet qu'a faisoait chés conmissions , mi j'attindoais din m'carette , pi bin atombé jusse in face ed chu station sérvice . Des autos ....al gron.nés* al tcheue leu-leu dusqu'a cho'r route ; a foait qu'chés voétures qu'is voloait't s'n aller tout droét is pouvoait't mie pu passé.ye !! Qué bren ! Pi vlo ti poin qué j'voés in.ne fenme qu'a s'déssaque dé s'n auto un molé épinée , (vir granmint) ; pi al s'in vo atuire* cho'p pouillette d'édvant in l'atchusant d'awoér prind s'plache .

Ech vigil in voulant z-zés désseparer il o failli s'fouére chambuquer pér éne voéture , qu'al o yeu bzinée peur ed pérde és plache . Voéyant tout ch'trimac lo , ech patron dé ch'graind magasin il o limité à 20€ cho'p prinse ed gazoil . Mi j avoais min cassis ouvert piqu'i faisoait keu.ye és jour lo ; et j intindoais qu'i disoait a ch'vigil : Vraimint chés gins n'y o poin d'fiate a i y avoér , magine un peu , n'y o pus d'chinquante pour chint d'chés autos qu'is sont parquées lo a attinne leu tour ; ej sus seur qu'is ont coér pus du mitan d'éssinche din leu réservoér !

* Al gon.née = beaucoup

*Atuire = Employé ici dans le sens de disputer
 

Un PRINCE in cabéne

Un PRINCE in cabéne !

A intinne dire Tyka Nelson , eq ch'est l'soeur ed Prince ech canteu qu'i o cassé s'pipe n'y o 1 moés inviron d'cho ; adon à intinne dire és frangine i l'éroait poin yeu d'éfant. Et pourtant un prison.nier Améritchain ed 39 ans d'age i sartifie vérité vrai ...vrai conme chés tchiens qu'is pich'te a z-z abes , qu'i sroait ch'fiu à Prince , Carlin Williams qu'i s'délonme ech gazier* lo !

A cange toute asteure , pi qu'i pouroait hériter d'és forteune ! I l'o dmindé a fouére chés tests Biologic , pi s'fouére ézaminer sous tous chés coutures pour prouver qu'tout cho a n'est mie des mintiries .

Ej comprind miu asteure a coeuse qu'ech s-soeur à Prince al foait s'mouse* . A n'est mie d'trop keude pou pértager ch'gatieu ! Elle al vouroait jusse qu'il euche eq chés frouéttes* dé ch'gatieu ...oué jusse chés frouéttes ed chés tchots bistchuits prince au chucolat !!!


* Gazier = drole d'individu
* Fouére és mouse = Faire le tête , bouder .


 

Terra hominis

Tchiéche qui n'o poin reuvé un jour ed poser éne bouéne boutéle ed vin su s'tabe Chu copropriétaire i peut s'rabziner su ses térres quand qu'i n-n o invie , i put minme étou vendanger quiques jours din l'énée , coper cho'v vigne , pi si li prind l'pécavie d'écatir chu roaisins a pié-déqueux , qu'il foaiche !!

Si un jour i vos prind eune lubrie ed vos achuchon.ner étou , seuchez qui vos in coûtro 1 500 € pour éne part ed vignobe ! in déclatchant : i vient d'min domaine ! adon , feut i coér avoér éd'z acatoéres assez pou sin poayer un d'vignobe . Fut dit fut foait , un Normand i s'a achuchon.né avuc sept chint collégues Et n'y o chinq énées i l'o ahansé chu sociéte " TERRA HOMINIS " ..Est aisié d' comprinde , is racat't séquants vignobes in fininchemint participatif , pér aprés is l'métte in férmage ; i dminde à un vititchulteur asteux qui n'o mie les doubes assez pou s'poayer un domaine ed s'y établir ; adon in plache ed li dminder des pécaillons , is l'foait't poayer in boutéles ed vin .



* Fermage = Location de terre

* Pécavie = Caprice , lubie

********************

 

Ch'l affoaire a l'est din ch'sac

Réyus d'vir chés saclets in plastoc* s'involer din chés rues obien finir din chés abes , obien coére din chés mérs . Asteure tout cho ch'est d'l ancien , a tout du moins pou chés Nouillorkais* qui à pértir dé ch'preume d'octobe is dvront poayer au moinss 4 chintimes d'euros pour un saclet jétabe in plastic , pi in papier étou !

Tchaque énée pu d'neuf milliard ed saclets sont jéjtés pér chés Nouillorkais ! Nouzote in France chés grosses lédgeumes dé ch'gouvérnemint is l'ont dit STOP à chés saclets ...Pi j'ai idée qu'est pour din poin longtémps !!

* Saclet in plastoc = Sachet en plastique

* Nouillorkais : New yorkais ( a l'seuce Picarde)

Ch'titation

Oz o oblié no pérint

Bé lo ch'est toute , pér aprés ch'film "Chéri oz o oblié chés tchots " ; vlo qu'asteure ch'est chés loustiques qu'is pért't sains leu pérint ;..... Quoé qui n-n est !

Din chés Bahamas à bord d'éne gros batieu d'croésiereNorvégien ; troés éfants do'm minme famille attind'té leu pérint in s'éjuant un molé , des jux in-n'o a houle* din chés batieus lo !

I est l'heure d'élver l'inque* , troés coeups d'corne pi ch'batieu i tchitte ech quai . Et lo crénon dés z'os quoé qui s'passe ?!! Chés pérints d'chés nasus is s'rabzine'te à toute bérzingue ....mé rien à fouére , ch'coeup i est foét ! Feut qu'is s'rind'te à l'évidinche is ont louper l'bord ....Pi vlo leu z'éfants tout seu . Bernique , ha dvient grave el croésiere s'amuse pu !! heurésmint toute i fini bien cho'c compannie al o prind les dvaints , pou qu'toute chol clique a s'ertreuve troés jours pu térd à Nouillorque !! Ti poin bieu .



* A houle = beaucoup

* L'inque = L'encre

 

On minge Chinoés o chéz toé ?

Ch'l arc ed st jean* ch'est fin rétus à r'béyer din ch'ciél pér aprés eune pleufe avuc un rayon d'solé . Mé , jou qu'os avez djo mié ed l'arc ed st Jean ??

Os éte in train d'vos dire , cha y est i décaroche ez'Zéf ! ....Seuré qu' nan ! ...Si qu'os voulez n-n in minger i feuro qu'os alliéche à Hong- Kong . La bos n'y o in-ne boutike qu'al foét des san-wichs au fromache avu chés couleurs ed l'arc ed St Jean . Chu" toast Licorne" qu'is appel'té cho . Bé , vlo cmint qu'o été ahansé* pour avoér chés couleurs : Chu violet ch'est dol lavinde ; ech vert ch'est ch'basilic ; chu rouche ch'est dol tomate ; et pour chu ganne ,ch'est un touillache ed Mozzarella pi d'chéddar , d'Emmintal et d'Gruïére .

Voila ch'coeup i est foét , asteure os pouvez l'fouére à vo moaison . Boin courrache quaind minme . Pasque déjo à mier cha n'o mie l'air racachant ....alors à dégobiller ...Bonsoér !



Ch'l arc ed St Jean = Arc en ciel

* Hansé = Fabriqué

 

Din ch'courti

 



In-nhui j'm in va vos baillez éne coupe ed conséls pour vo gardin, chés bieux jours is saqu'té l'bout d'leu néz , os avez sortie vo louchet , ratieu , pi tout ch'réstant . Os éte surmint des craques d'éch gardinache mais conme on n-n apprind atnure* ...Alorss , quoé qu'on peut plinter asteure ?

Os pouvez plinter d'z échalotes , chés ongnons ,chés peumes ed terre , pi à msure chés salates in asséyant dés z'aplacher un molé au rados. Durant ch'moé d'mai os pouvez plinter étou chés carrottes . A chés saint d'glaches ch'étoait z-z haricouts ; pou n'in définir in juin a sro l'momint d'chés lèdjeumes , conme chés poérions , chés cabus* , pi quainte cho'b belle* al déchind feut plinter chés lèdjeumes qu'is ont leu rachénes qu'is s'intiqu't-é din ch'sol .

Chés lèdjeumes is doét't éte bien achuchon.nés , d'éxempe: ch' l ail i n'incorse* mie d'éte au coté dé ch' cabu obien d'chés z'haricouts ; tout du contraire i l'est biénaise si l'est voésin d'cho'c carotte , ch'concombe , ch'l ongnon , ou cho't tomate . Ech' radis i s'intind bien avu cho'l laitue , cho'c carotte , mais poin l'ail , coér moins ch'cabu pi chés courges !

Pér momint os srez pététe ércrandi* dé'l fouére , mais qué plaisi d'savoér ch'qu'os ons din s'n assiétte

Posté-scriptum : I n'feut mie plinter chés lèdjeumes tchaque énée à l'minme plache ( quainte ch'est possibe bien seur )



*Atnure = souvent; continuellement

* Cabus = choux

* Cho'b belle = la lune

* Incorser = Manger , boire , ingurgiter . au sens figuré = ne pas supporter , ne pas admettre

* Ercrandi = Fatigué

 

carabistouilles ed cadoreux

Chés cadoreux* is n-n ont des ruses à conter raport a leu ouvrage . Un gindarme i vient d'saquer un life su chés ratros* qu'is l'o intindu amon ch'comissariat obien tout simplémint in controlant su cho'r route !

J vouloais vos n-nin fouére proufiter étou . Nin vlo eune séquants , cha veut dix !!!

- Eum fenme al o décanillé , i feut mé l'ertreuver rondébilis piq ' j ai dzoin d'elle pour moute chés vaques !!

- Madame ; i feut qu'os portéche plainte contre X qu'i dit ch'cadoreu , et cho'f fenme al i déclatche : Tchiéche eq ch'est " X" ?

- J 'vos appelle coeuse qu'on m'o coeupé min téléphone qu'i dit chtilo .....I sanne à vir eq NAN qu'i li r'torne ech cadoreux !

- Bonjour Mr l'agint j'sus t'inchpé à coeuse qu'ém carte à n's intitche poin din ch'distibuteur ed pécailles ! Probabe qu'i euche éne infilure pou m'déroufler m'carte ! ( un silinche ...) Ah berbafe !! j'm a berluré , cha foait in-ne heure eq j'insaye d'intitcher ém carte-vitale !



* cadoreux = Gendarme

* Ratros = vieilles histoires

 

Ch'titation

 

Heute définition !

HD...HD.....HD ..... Crénon dés os ; oz intind pus pérler qué d'cho asteure ! Bé ...pérlons n-né .

El 5 d'avril mi pi vous étou , os ons du fouére éne ércache tout seu* su vo poste ed télé pour qu'tous chés chaines is s'arplache'té din ch'boin sin , pi qu'ech s-son et ch'l imache is seuch'te in heute définition !. ... Adon nos vla el 6 d'avril... Aléha jaquta est * . Os éroémes du éte fin bénaise din no cadots in route a r'béyer no flims in " HD" ....Wate min ziux , des pronnes !!!! Os n'érchuvoéme foque 5 chaines d'sur 26 pi aladon chélale qu'os vouloéme a n'i étoét poin !

Pi l-l'indmin tout alloét d'mal in pi , ch'cassis d'nou télé i l'étoét tout noér pu eune meudit chaine qu' saffichoét ! Conme ech l affouére lo a cminchoét a m'épiner min blanc bon.net* etou , ej décide don d'appler ch'l anténisse ,pi j'vais droét a ch'disieux : Bojour Mr XXXXXXX , Os savez ti qu'edpis hier ej sus " HD" ?!! Ben oué qu'i m'ratorne , tartous chés gins din tout la France is sont in heute définition !! ... Oué qu'j i r'déclatche , hormis qu'a m' moaison HD a vut putôt dire Hors-D'état ...Nos vlo pértie à rire touté-deux pi qué ch' l anténisse j'el conoés bien ! Eq tés con qu'i m'dit , mé al est fin boéne , ej l 'arplacherai à ch' pratique* qui vient et qu'i s'ro in raque avu sin poste ed télé .



* Ercache tout seu = Recherche automatique

* Aléha jacta est = sentence ; les dés sont jetés , on ne peut plus rien

* Blanc bonnet = Femme

* Pratique = Client

Sin sac à main.ye

 


Tchiéche qui o dit qu'din chu sac à main.ye* d'in-ne fenme i n'y avoait mie rien d'racachant ? bé , chtilo qu'i l-l'o dit i l'avoait cinsémint raison ! Pour qué motif qué j'dit tout o !

J ai li hier din chu jornal qu'eune fenme qu'a reste din l'état du " Métakeuchette" amon chés Ritchains , al o vu s'rabziner à s'moaison chés gindarmes qu'is y-ont déclatchés qu'is avoait't értreuvés sin sac-à main.ye avoék tout chés bibus , chés bricoles ed fumelle , qué j'én vos in dirait poin d'puss ichi su chu so* d'chés fenmes piq'mi j'sus t'un mérle !

Adon; din sin so i n'mintchoait rien , passé rien , tout i l'étoait lo bien aplaché conme chi qu'al l-l'éroait pardu hier ! Manne un peu !! Pi tnez vos bien més gins pou n'poin tchair al rinvérse , quante ej vos érez dit qu'a n'foait mie ; 6 moés , ni deux énnées , poin non pus chinq ans qu'al s'o foait dérouffler sin so ; mais a foait quatore ans ! Est mie croéyape éne histoére paréle !

* Sac a main.ye = Sac a main , notez le "ye" à la fin . Dans mon coin (le sud de la côte d'opale ) on le prononce souvent comme pain.ye ; main.ye , matin.ye !

* Métakeuchette = Humour Picard pour dire le Massachussetts (Etat Américain)

* So = Sac

 

Is sont frappés

Sié ! Frappés conme leu cafés ....Ch'l histoére a s'passe moaison Starbuks in Amérique , qu'a doét r'sanner à no brasseries in France. Bé ; n'y o éne pratique* qu'al o porté plainte , al s'o apercheu d'l infilure* raport a ch'café frappé , qui sroét pu du mitan rimpli d'glachons , adon os l-l érez comprind ; qui n'y o mie granmint d'cafiot la d-din , pi in ramindo* i l'est coér pu tchér qué ch'tiot noér sérvi keud

A intinde dire ech chéf d'établichmint ; tout o ha n'sroét qu'des mintiries !.....Os m'avourez quaind minme eq mon chés Améritchains is sont capapes ed toute pou récouer un molé d'pécailles !

 

* Pratique = client

* Infilure = Ruse

* In ramindo = En supplément , en plus

 

Ch'titation

 

Feut péquer l'toér pér ses cornes !

 

On nin voét d-drole su chés routes ed France . Os pouvez croéser un coéchon seuvage* , in-ne glaine , éne vaque , un lapin.ye , éne biche , bréf des bétails a ti a masse ... Adon sémdi passé chés automobilisses i s'in raminturont longtémps dé ch'qu'is ont vu su cho'r route inter Alés pi Vézénobres din l'Gard

Un toér* ......Sié , un toér rudmint asteux qu'i l'o ruchi* à s'écapper dé s'n abrivado conme is dit'té la bos , ech bétail i ransoét* su cho'q quate voéx pi à contré-sins coér ! manne un peu

Bin atombé qu'chés cadoreux is étoét't.é din l'coin ; pi avuc l'aïude ed chés manadiers is l'ont foét rapasser pér driére cho'r rimbarde pou qu'i fouaille* din in-ne pature pou s'rapurer et poaicher un molé !

Qué jus ! Bin atombé qui n'y euche poin yeu d'accidint !! Peuq mantcher ; minme si n-n éroait yeu un , pour sur qu'éroét été ch'bétail in " TOR" !!!!



*Coéchon seuvage = Sanglier

*Toér = Taureau

* Ruchi = Réussi

*Ransoét = circuler , errer

Fouailler = Qui va vite , qui se hâte

 

Un clair ed leune à....TAHITI

 

Chés ch'tis is l-l ont maoués !

Chés ch'tis is n'décolére'té poin .....Adon conme o , i sroait pus agréabe ed canter à Tahiti putôt qu'a Maubeuge !! Qué décarsure !

Chol tchuignie* d'djére al est déssatchée crénon dés z'os ! Ch'est mie n'importé tchiéche qu'i o dit cho ch'est Johnny Halliday l'idole ed chés jonnes .

Pour sur eq chés dviseries d'quaterlangues* is prét'te à rire , mais quand qu'oz i pinse ; tout cho n'est poin qu'mintiries , n'y-o un séquant d'vrai la d-din su s'qu'on raconte ed'nou région ; seuchons l'érconnoaite , surtout pour éne gin qu'i n'est poin né natif ed chés heuts d'France

No région al est fin rétuse mais mie pérfaite , os ons coére el droét dé l'canter , de l'filmer , dé l'fouére bistcher un molé nom dé boé !! Feut savoér rire ed li minme ; a n'est mie la fin du monne .....poin pour tartous apparamint !


*Tchuignie = Hache

* Quaterlangue = mauvaise langue

 

Ch'titation

Post-é sriptum : J'én sais mie si on l'dit din vo coin ch'mot la : piquer : pour dire s'indordler
 

Redadeg

REDADEG ; os éte in route à vos dire , qué qu'ch'est qu'cho ? ch'est ti du PIcard ? j'comprind rien passé rien !!

A n'est mie tonnant* piq'ch'est du Breton ....In-nhui j'a décidé d'vos berdler un molé d'chés Bretons . In acoutant z-z actualitées n'y o troés ,quate jours j'a comprins quoé qu'ch'est ch'étoét qu'chu Redadeg . Ch'est des chint et des chint d'gins qu'is cour'te* el jour pi pér nuit étou alintour ed'cho'r région Breton.ne .... In s'don.nant l'relais tous chés tchilométes su l'insanne dé ch'parcours ( 600km in 2008.....1700 in 2016 )

A quoé qu'a sert ech manége lo qu'os vos disez surmint ! Ch'est raport a cho't trainsmission d'chol langue Breton.ne . In foaisant leu course is ont récoué des pécaillons qu'is sarviront pour pratitcher chu Breton din cho'v vie familiale et sociale !

Ch'est conme o qu'a cho darin.ne édition... 125.000 € qu'is l'ont été baillés à cho'l langue Breton.ne . Edpis 2008 ch'est 389.000 € din chés tchaisse pou ch'pérlache Breton !

Alors chés Picards; i l'est témps d-déssatcher vo queuchures dé sportif du diminche dé ch'placard !

Kénavo*




*Tonnant = Etonnant

Is cour'te = Du verbe courir

*Kénavo = Adé

 

Acouter du Picard : ech pain

Aymé Savary nos pérle dé ch'pain !

Collection Laurent Devismes (50)

Chu héros Russe

 


In-nhui j'o décidé d'vos dviser d'un jonne militaire Russe ; piq'chés actualités is n'pins'té qu'a dématcher éd maouése nouvielles , mi j'm in vous n-nin satcher eune bouéne !

Ch'l histoére à cminche à Florensac din l'Hérault (34) . Un coupe d'étraités , is z'ont baillés leu médales militaires à lés pérents d'un jonne officier Russe défuncté din chu site antique ed Palmyre amon chés Syriens .

Ékmint qu'a s'a passé qu'os vos dmindez ? ..................Chu jone militaire Russe i l'o agit in HÉROS , n'y o poin d'eutes mots . S'n ouvrage à li su ch'terrain ch'étoét ed'dgider chés tirs ed chés aréoplanes Russes ; pour déliberer Palmyre , i -y avoét pus moéyin d'moéyenner , pus rien à fouére d'eute qué d'bailler l'orde à chés aréos ed lérguer leu bombes su ses positions à li-même!

Adon , i s'a foét occir sous ch'fu d' sin commindant ... Tout l'monne n'eul froét poin ! Un Héros qué j'vous dit !

 

Fotos côte d'opale

BLESSY ...Mé poin occie

Tchaque diminche matin Mark un Néozelandés qu'i résse à Aukland i l'o l'droét pou sin déjeuner à éne bouéne onmlette !... N'y o poin qu'li qu'i n-nin foait qu'os vos disez !... Pour seur ; mé li ch'est eune histoére éspéciale , pisqu'il o récoué cho'g glaine inter chol grille et ch'radiateur édvant s'n auto .... A rmonte déjo a éne coupe ed jours , au momint qu'al trécoeupoait cho'c queuchie conme eune balle boche ; al s'o foait chambutchée pér cho'c carette à Mark.

Cha n'est foque qué l-linnemin qu'il o r'mertché éne toffe* ed blanqué-pleumes pa dvant s'n auto ; chu paure galinachée al étoét lo ramonchlée au coté dé ch'radiateur, à pein.ne affolée à s'patte , mé fin vertillante .

I l'o appatlée avuc un cantieu d'pain , i l'o afflatée et nichée din l'creux d'sin bros . Ch'l histoére al eroait pu s'arter lo ; mais nan.... Mark i l'o décidé d'récouer cho'g glaine qu'a s'délonme asteure Blessy . Blessy qu'a n'dort mie al bélle etoéle , piq'éch voésin d'Mark il y-o baillé un bieu pouillé . Is étoét't télmint contint qu'is ont décidé d'prinde éne foto ; pi j'vos l'donne in mille ...avoék é n' apparéle KODAK ...(cote-cote codak) .... Ti point bieu !

 

Ch'titation

 

El tcheue d'no tchien al est bien vnue

El 30 novembe 1906 , én cachez mie à carculer , ha n'est poin mes ages ...Nan , el 30 novembe 1906 , ech Biologisse marin George Parker Bidder , i l'o garoté* din chom'mér du Nord eune boutéle avoék un mot d'billet d-din qu'i disoét qué ch'ti qu'i l'trouvaroét i dvroét l'rinvoéyer mon ch'laboratoére Biologique maritime ed Plymouth (MBA) , et in écange i l'archuvaroét un shilling .

108 ans et 138 jours pér aprés chob boutéle al o té r'treuvée .Adon , ch'est in avril 2015 qu'eune pinsion.née d'chés postes mon chés Allminds , al o r'démuchée chob boutéle d'sur éne plage ed chés Iles Frisonnes . Record battu , ch'étoét ch'plus viux méssache invoéyé in mér janmoés r'treuvé !

*Garoté = balancé , jetté

 

eune glache poin ordinaire

Pér après avoér li ch'l artike dé ch'dur pi ch'mo , os érez pététe invie d'eune tchote glache qui vo aveuc !

**********

Si un jour in guérinant amon ch'mérchand d'glaches os intindez eune pratique* édminder " eune Bob Marley " N 'vous faisez poin d'bile , os n'éte mie dévnue complétemint brake* . Vlo dé s'qu'i n-n est ...

Des titchots producteurs ed créme glachée d'Alassio un tchout villache mon chés Itaïens ; is viénne'té d'invintion.ner dol glache "parfum canabis" foaite avu des graines ed canfe pelés .... is ont déjo treuvés chol réclame ; béyez cha vo dix : Al o bouén goût pi al foét du bien ....Ha bin lo ch'est toute ; al fouét du bien ..."tu m'éton.nes" .....

Adon , chés blouses blanques , chés chercheurs conme is z'appele'te ; is dit't eq ch'est éne créme glachée qu'al combat :
- Chés acides cras
- Ch'trop d'chuques
- Chés complications réspiratoéres
- Chés plaques rouches et chés boutons d'chés jones nivlets

Non dés z'os , j'm'ai dmindé si pour poayer i falloét miu qué j'saque un billet d'dix euros obien m'carté- vitale !!

* pratique = client

* Brake = fou

Ch'dur pi ch'mo

J'vos bale ichi ch'l artike dé ch'courier Picard d'chu smaingne passée , ch'dur pi ch'mo , is pérle'té dé ch'cannabis ......Ecrit pér Jacques Dulphy

************

Ch'dur : Nin feume tu ti ch'mo du cannabis ?

ch'mo : Du quoé ?

Ch'dur : Du cannabis beudet . Ch'est du canfe indien si t'ainmes émiu .

Ch'mo : Du canfe ? Ch'est pour foaire des laches pour attacher chés vaques . Ch'est mie pour funtcher , conme o dit à Dourlin . Pér qué sin qu'tu voroais qu'éj feume du cannabis ? J'én feume meume pu d'toubac érmis éne tchote cigarette à mzure .

Ch'dur : Quante oz est capabe ed feumr éne tchote cigarette à mzure , oz est capabe ed feumer dol drogue . I péroait meume qu'o l'voét à chés ziux d'chés gins . Foais mmé montrer un molé tes ziux ?

Ch'mo : Mais tu m'imbétes aveuc mes ziux ! I n'ont mie rien mes ziux !

Ch'dur : Sié ch'mo . Tes pronnes éd ziux i sont dilatées . ch'est eune preuve tu nin feumes !

Ch'mo : Nom des os , nin finiros tu ?

Ch'dur : ESt mértché dinch'jornal . Énhui , i y-o un pourchintage increuyabe éd gins qu'i nin feum't du canfe . J'én sroais point surprins qu'tu fuches din ch'lot . T'os meume tes ziux cavés , qu'ch'est coér éne indice ed feumailleries cannabistiéres . T'es t-un drodjé , ch'mo ! Soin à ti , t'es su un sale dévalant . I feut qu'tu t'érprinches , sinon ch'est la débinade .

Ch'mo : Ch'est dol fatigue ; qu'al passero . O n'sonmes mie din chés banliues , ichi!

Ch'dur : O n'o mie dzoin d'aller din chés banliues . Meume à Corticourt, achteure i péroait qu'o peut nin trouvoér , du cannabis .

Ch'mo : Non??

Ch'dur : Sié , ch'Mo . Ch'vice i s'a intérprins tout partout . Ch'est pour o qu'él gouvérnemint il avisage d'él légaliser , ch'cannabis .

Ch'mo : Non ? Légaliser chol drogue ?

Ch'dur : Tel éq o , ch'mo . Pour impétcher chés trafitchants d'tranfitcher . Pi pour coper ch'l économie paralléle . A n'est point coér bien défini . I sont in route à pinser à la tchéstion .

Ch'mo : Note bien qu'o n'impéque point chés gins d'boére du vin pi d'feumer du toubac .

Ch'dur : Ch'est conme o pi ch'est toute . Achteure o n'o pu l'droét d'minger des mouilles qu'oz o pétché li -meume au Bourq-et -d'Eut ch'pichon d'riviéres i l'est défindu d'consomation mais o s'in vo pététe avoér el droét d'feumer du cannabis tout partout ....

Ch'mo : O n'sonmes pu d'no temps , ch'dur . Rintes boére un verre ed goutte à no maison , a no cangero les idées .

* Du canfe = du chanvre .......Lache = longe (corde) ......Pronnes ed ziux = pupilles ......Cavés = cernés (yeux) ......Avisager : envisager

 

Réderie...

 

Vlo éne tchote histoére fin rétuse qu'al m'o granmint plé quante ej l'ai li ( histoére véridique ha n'est poin des contes à tuer chés leus à coeup d'bon.net ) .....Tout i l'o kminché din eune réderie obien éne braderie ha dépind d-d'ou qu'os éte !

Adon ch'est din chol réderie qu' Oli Lansley , 34 ans d'age , i l'o acaté un cadot supporté*.Et In rintrant à s'moaison ....surprinse ... d'sous chés coussins étoét camuché éne albeum batché d'fotos d'un honme noér ed pieu, tout seu obien coér à msure intouré dé s'famille .

A vir chés loques ed chés gins i n'est poin mal aisié d'adviner qu'a s'passe din chés énées 1960 - 1970.....Fil a msure ed chés fotos on l'voét s'dépleumer un molé d'ses caveus ; et on l'voét étou avoék un tchotin aniché din ses bros .

Oli Lansley i l'o don décidé d'lancher un appel su sin compte face ed madjette* . I l'o pubillé éne coupe ed fotos in dmindant à chés gins un molé d'ayude pour értreuver ch't honme lo ! Sin billet i 'lo té pértagé trinte six mille foés d'sur l'arnitoéle*

Finalemint ch'est s'fille qu'al o r'connue l'rétoér* ed sin pére su chés fotos . Ahite* ahite al o écrit à Oli Lansley , qu'i y-o rinfitché " Marci d'm' avoér contacté ej voés tin pére edmain jeudi !

Conme d'éffet ; Oli Lansley i l'o invoéyé vindérdi éne foto adou qu'on l'voét avuc Noel Douglas, ch'est conme cho qu'i s'délonme ech't honme dé ch'l albeum fotos !

Marchez ; nos vla à ch'bout dé ch'l histoére , pi conme os sonme din chol saison d'chés réderies , ej su seur qu'os n'érberoéte pu dom méme méniére chés cadots , pi chés canapés !... Ti poin vrai !?


* Un cadot supporté : un fauteuil d'occasion

*L'arnitoéle : la toile

* El rétoér : le portrait

* Ahite : vite

* Face ed madjette : Facebook

 

Acouter du Picard

Sin louchet - videos chti.c.la: ....Manifique Roland Dussausoy , os l-l acoutroémes durant d'z heures intiéres

" S" au tchu !!

 
Os étoéme pourtant poin ch'preume d'avri !
A coeuse qué j'vous dit cho ...Fidjurez vous qu'ch'est din chés rues d' Nice equ'j ai vu chés prémieres voétures avoék chu " S" à leu tchu . J n'in sus resté conme deux ronds d'flans , mitan étombi ,pisque j 'avoés janmoés rien vu d'eute eq chu "A"

J ai don décidé d'aller nminder un molé d'asplique mon chom moaison d'chés tourisses qu'a l'étoét su ch'querpion d'in fache .....A l'atcheuil chop pouillette fin amiteuse , bélotte étou, à m'rinfique eq chu " S" ha vut dire Sénior . Ch'est un diksse eq chés viux éd'pus d'soichainte tchinze énées is plaqu'té driére leu auto , pou qu'chétlo qu'is z-zés suit'te qu'is seuchte avértis qu'chés conducteurs d'édvaint is n'sont pus si fringants, qu'is pouroét'te coér éte malprins à tout momint !

J' ai idée qu'a sroét putôt ch'diksse lo qu'is dvroét't plaquer driére leu carette ! Népoint ?!

Ch'titation

I n-n'o dautchuns éq quante is pass'te édvaint mon Pole eimploé ...Ben is éternut'te ! Sié !

Chés cabénes dé ch' Touquet

Cha y est os i sonme à ch'paté d'pronne* !!... Vlo chés bieux jours, et cho'p plache du Touquet su l'côte d'Opale va vir s'ahanser deux cabénes in bos . Din ch'preume os i trouvarez éne saquoé pou rondir vo panche , pi quéques buvatries si qu'os aglaveu* d'soé ! (mé poin d'frites)

Din chol deuxiéme os pourez laissier vo z'habillures pi sécantes bricoles qu'os n'voulez pu vos tringbaler aveuc ! Chéllale ed cabéne al est surtout réservée pou chés rédeux* d'planque avuc éne aile volante , pou glincher d'su l'ieu pi fouére ed z'ébondis à des heuteurs du diabe .

Pas dvaint chés cabénes i y-éro eune dijaine ed cadot à rallonge* in bos , pou fouére pringére , obien s'rapurer pér aprés avoér foét du "Paddle" du padole conme is dit't ! Os savez ti quoé qu'a n-n 'est qué ch'Padole ?? Bée ; os éte in mér coér loin asseu dé ch'bord, atampi d'sur éne planque pi os pagayez dusqu'a .....ch' diabe boli . Os pouveu minme aller vir chés grands Bretons (éz-z inglés) ....Mé; ayez soin ayez soin ; la bos i feuro pagayer à gueuche !

Pi rvénir rondébilis à ch'Touquet pasqu' a 10 € chu dmi jornée , pi l-louage dé ch'padole ; a vo cmincher à fouére tchér . Pi j'vous pérle minme poin d'ouéche qu'os avez partché vo carette probabe qu'os érez certainemint bouté des doubes din chés constateux d'rues* !! Ah ben n'groulez poin ....Z'avoéte qu'a aller à Berck !


* Ch'paté d'pronne = Le pire

* Aglaver = être assoiffer

* Redeux = Passionné

*Cadot à rallonge= Transat

*Constateux d'rues = Horodateurs
 

 

Ch'titation ...

L-l o tu vu ?

 
Mé dou qu'i est passé ch'méneu d'train durant 12 tchilométes inter-deux Landen pi Tirlemont deux villes Bélge ?

Pér aprés avoér intindu un buzin* du diape qu'i n'avouét mie l'habitude d'intinde , ch'mémeu d train i s'a don arté* quiques minutes, i l'o tchitté s'machéne pour raviser si tout étoét d'équére din s'mécanique . Quante tout à coeup crénon dés z'os quoé qu'i s'passe , ech convoét i l'o bziné conme éne balle boche in tchittant chu chminot tout péteux su chés rails .

Ahite ahite * ; ech méneu d'train i l'o avérti chés impoïers d'chés écmints d'fer pour qu'is bach'té chés barriéres au passache dé ch'train fantonme pour éviter ch'l accidint .

I sanne à vir qu'a seuche a coeuse d'in.ne tchote déchinte éq chu chminot i l'éroét tout simplémint oblié d'saquer su ch'frein !
A r'sanne ti poin à eune bouéne histoére Bélge hein !!! Eune foés !!

*Buzin = Bruit
*Arté = Ici employé dans le sens de s'arrêter
*Ahite = Vite

Espréssion Picarde

Déhoqueu d'corde obien (déhotcheu) est impoïé pou désigner un gayant (géant) !
On put dire étou " Qué grand dépindeu d'aindoules"

 

Carette à Google ...

 

Eune gin qu'i surfoét su ch'l arnitoéle i l'o démuché éne accidint inter un bidét pi choc'carette à Google qu'al est quértchée d'inregistrer chés routes , chés voéyettes , chés roulettes à 360 degrés pou ch'gayant d'éch Web* . Ha leu z'arrive coér pus souvint qu'a leu tour ed rincontrés des bétails qu'is n'sont mie adités ed vir chés carettes batchées d'incrinquillaches qu'is fruch'té* din leu pattes .

Voila éne scéne qu'chu cavaïer i s'in ramintuvro tout l-long dé s'vie !

Vlo ch'manége in troés lipisodes :

L'appreuche :

　

El poude déscampette : Chu gvo a mitan éffoayé , el vlo pérti s'lancher din chés camps !

　

El valdingue : ech bidet i l'o invoéyé valdinguer ch'cavïer ,tandis ch'temps lo qu'li i l'o bziné conme éne balle boche !

 

*Frucher : Froler
* Ch'gayant d'éch web : Google

 

ratro amon chés ch'tis ...

Du rififi din chés waters

Du dérouflage* ed kétchup din chés réstaurants ,obien des vérres à biere din chés cabarets ou à mzure chés robes ed chambe din chés hôtels ; tout cho , on n-n'o déjo intindu pérler .

Mais chof farce qu'on z'o foét à un réstaurateur des Vosges i sin souvaro longtémps . Al férmeture ed'sin réstaurant ech serveur in route à néttier chés waters ed chés honmes et i s'o apércheu qu'chop plaque dé ch'réservoér d'ou qu'i o choc cache d'ieu.ye a l'avoét disparue . ....Ech serveur i l'o houspillé sin chéf , chtilo i s'o rabziné rondébilis , et i l'o saqué éne bouque conme un four dvant ch'l infilure qu'on li o jué !!

Adon i l'o décidié d' rintrer din chés waters coté fémes pour prinde chés msures pour qu'i peuche canger chop plaque ! Et lo ; BERDAFE !! Chop plaque étou dé ch'coté lo al avoét té barbotée* !!
Qué misére ! din qué monde qu'on vit !!




* Dérouflage , vient de déroufler = Voler ; prendre
*Barboter = Prendre

Dortoér à z'ailes !

Su ch'querpion , mi pi ti étou probabe quante on mérche on r'béye ed droéte pi d'gueuche , in heut in bos pou ziuter un molé chés batimints chés moaisons , chés gins à m'zure .
Quéques foés n'y o mie rien à vir , mais un bieu jour si os voéyez éne éspéce ed grosse boéte ed 6 métes dé heut incrinquée su chof face d'un batimint ; ravisez l-lé bien conme i feut , probabe qu'a seuche ech premier coeup d'vou vie qu'os voéyéche un dortoér pour bétales à z'ailes. N'y o lo eune soichantaine ed cases qu'is peut'té camucher des chints pi des chints d'tchots bétales volants ; ahansées* avuc des titchotés branques , des pan-nes , des bûches treuées .

Tout cho est fin bieu ; mais ha sert edvant toute à bailler un molé d'ayude à chés méneux d'pollen* conme chés mouques à mié , chés papillons ; ézz'hourlons !

Ch't immeube don j'vous cose i l'o té bati à Dijon ; L'malotrie qu'is l'ont délonmés ! Asseuré qu'a doét rudmint s'maloter la d-din !!

*Meneux d'pollen = Pollinisateurs

*Ahansé = confectionné