Moutrer ch'l égzimpe

Ll'histoére lo à s'passe in Norvége . Un cadoreu Norvégien qu'i apparaissoait din chol gaztte ed sin poéyis ; din un batieu qu'i peut monter à dés vitéches du diabe sans sin giyet* d'seuvetage .

I feut savoér qu'in Norvége chés giyets d'seuvetage is sont obligatoére su chés batieux ed moins d'huit métes éd long . Adon conme ch'est un policier bien conme i feut i s'o infligé à li minme eune ameinde ed 500 couronnes ( 53€) ......Est ti poin bieu.ye ! Tout l'monne n'él froait poin .

*Giyet = gilet

 

Ch'l express pour Anmién

Lafleur , Ignace et pi polyte i vienn't ed passer su l'quai d'la gare d'Adville . Is attind'té ch'l éxpréss pour Anmién . Ch'train i l'o éne dijaine éd minutes dé rtard .

- Ch'étoait point l'peine éd tant nos présser qui foait Ignace .

- Os avoéme el témps d'prinde eune bistouille qu'i rintchérit Polyte .

- Povoéte vous dviner nigdouilles qu'os éte , qu'ech train i l'alloait avoér du rtard, qu'i leu répond Lafleur . Et pi tchiéche qu'i nos impéque d'aller in boére eune éd bistouille ?

- A condition qu'on nos laiche sortir .

- pourquoé sortir ? N avons nous poin l'buvette ed la gare ?

Szés vlo touté troés à l'buvette , télmint otchupés à dviser qu'is n'intind'té minme poin ch'train s'amner . Un momint aprés is sort't et in s'adréchant à un impoïé :

- Chl éxpréss pour Anmién i vo biétôt arriver ?

- I vient d-démarrer . Tnez , ch'darin wagon i passe édvant nous !

Aussitôt , no troés lascars is part't à fond d'train pour éssayer d'rattraper ch'train . Ignace qu'i court conme un dératé i l'arrife facilmint à monter . I tind s'main à Polyte qu'i suivoait et qu'i l arrife étou à monter .

Dépéque te qu'is crit'té touté deux à Lafleur !

Lafleur in voéyant qu'i n'y o rien à fouére , i s'arréte et pi i rvient su sés pos . I passe édvant ch'l impoïé qu'i l-l o rinseigné qu'i li dit :

- Min pauve Monsieur , os n'avez poin d'chance ; ch'est bien imbétant d'manquer ch'train d'si prés ... Vo deux camarates is sont pu héreux vous .

- Pourquoé ?

- Is ont réussi à prinde ech train , tandis qu'vous ...

- més deux camarates is n'ont poin pu d'chance éq mi !

Cmint cho ?

- I n'y avoait qu'mi qu'éj dvoais prinde ech train . Mes deux camarates is étoait'té vnus seulmint pou m'accompagner .

Ed l'ouvrage poin ordinaire

　

Si os vos aboulez amon ch'burieu d'plachmint pi qu'os voéyez qué "star wars " i l'imbeuche , én seuchez poin étombi , nan os n'érez poin yeu eune bleuse vue !

Mettons , qu'on vous prinche pour oeuvrer avoék georges Lucas os srez bin logé : Un ranch conme is dit'té la bos d'sur 6 hectares avuc in.ne cinse pi bin sur gramint d'salles ed ciléma .

Adon quoé qui feut fouére pour déhoquer ch'poste : Os srez ringeu d'paprasses ; os ringerez ch'catalogue ed dotchumints in toute sorte, chés papiers limériques obin minme chés acoutes pi chés tchots fimes ( audio- vidéo)

Pou ch'l ouvrache i feut s'y intinde : din ch'maniemint d'chés pélicules cilématografique ; vnir à bout d'chés logiciéls ed géssion . Avoér sin pérmis d'roulache pi l'carette qu'al vo aveuc ! Pi ch'est mie toute : Avoér un master in raport avu ch'l annonche pi deux troés énées d'ésperiénce din l'géssion d'archives .

In attindant d'oeuvrer , ó tout du moins' croéser CHEWBACCA obin DARK VADOR ayez soin ed sogner vo CV pi cho'b belle létte conme quoé qu'os éte d'attaque !

 

Surprinse su cho'p plage

Os m'avourez qu'a l'plage os ons davintage ed chance dé s'fouére hazir* pér ech solé , o bin dé s'fouére pincher sés caqueus pér un vavar* .

Aladon qu'chés bégneux dé l'plage ed Karwia din l'Nord éd la Polonne is sin raminturont longtémps dé l'visite qu'is ont yeu diminche passé .

Un Sainglier ! Sié , un sainglier i s'a déssaqué d'cho'm mér pér dvant chés bégneus qu'is saquoait'té dés ziux conmes des pronnes , pi in.ne bouke conme un four . Chés gins épaveudés* à mort is bzinoait't din chés dunes avoék ech meudit bétail à leu trousse qu'i fruchoait* inter chés gins , chés sérviettes éd bain , chés cadots à rallonges , pi tout ch'diabe sains train !

pou nin définir n'y-o yeu sécant pérsonnes d'affolés à leuz abatis ; Mais rien d'bin mécant !

　

*Hazir = Bruler

*Vavar = Crabe

*Epaveudés = Terrorisés

*Frucher = Frôler

 

Bin vu !

　

Face ed madjette* i l'o lainché el 05 d'avril 2016 eune nouvélle "option" conme is dit't , qu'al utilise cho'c commainde vocale ed l'iPhone pou décrire chés fotos à chés avugues* et chés vinigouttes* .

I l'ézistoait déjo tout un acrinquillache pour lire à heute-voée chés écrivures ed chés sites, mais dusqu'a in-nhui is n'povoait'té mie lire chés fotografies .

Ch'récit i n'est poin coér bien fidéle à cho'f foto ; mais ch'preumier pos i l'est foait pour écorer* chés avugues pi zz 'aidier à participer d'sur Face ed madjette .

　

*Face ed madjette = Facebook

*Avugue = Aveugle

*Vinigouttes = Mal voyant

*Ecorer = Soutenir

 

Ch'l onque Jacharie

A mzure ej vous balerez un tchot éstrait d'un billet dé ch'lanchron , in-nhui Batisse qu'i s'éton.ne ed vir él laingue Française s'érnouvlée ! Vlo ichi un éstrait d'in.ne piéche ed théïate qu'a s'délonme : Ch'l onque Jacharie

Batisse : Bié , ouin* , min bureu ! Pache éq ch'est éne tchote tabe , tu voroais qu'jé n'diche poé : min bureu !! Mais ch'est l'mode achteure . Muins qu'o respéque chés gins et chés coses , pusse qu'o leu donne des bieux noms . Un manchon* ch'est un architéque , tous chés bricoliers ch'est ds'interprindeux , chés gairchons épiciers s'délonmt't comis ; quante à chés perrutchers* , ch'est ds'artisses !

Peuve langueFrançaise al est rnouvlée ...conme éch ju d'oée. Je n'parle poé dé ch'l argot qu'chés gins soé-disant "conme i feut" imprunt't à chés voleux ! ...Et j n'appélroais poé m'tabe boéteuse : un bureu ? ....Acoute un molé (i cante )

Ovide étoait un bien brave honme !

Ol'l o dit et mi j'el croés , in sonme ; qu'il est un molé surfoait

Ch'n est poé dé s'feute qu'a s'est foait , il o ch'est éne cose notoére

Avind hors dé s'n écritoére ed fin morcieux polis et bieux

Mais pou ch'qu'est dé l'bétamorphose , ed no jours ch'est bien eutré cose :

O cange el sins ed chés mots , ed tout in n'sait combien d'sots

Sains minme qu'o sé nnin doute , a forche dé n'poé y vir goutte

Zzés croét nouvieux polis et bieux !

　

Jean Ry


*Ouin = Probabe qu'a veuche dire " oué " ?

*Manchon = Maçon

*Pérrutcher = Perruquier - coiffeur

Passe tin cmin !

Sié ! Asseuré qu'a n'doét mie mércher à chaque coeup , pi j'én n'sérais d'trop vos conseiller dé l'fouére . Fidjurez vous qu'din cho'v ville ed Christchurch in Nouvelle -Zélande , n'y o un déroufleux* qu'i s'o aboulé din un kébab por barboter chol tchaisse .

Mais tout i s'o passé à l'arbou* ; a plache ed bailler* ch'tiroér tchaisse ech' patron pi chés impoïers is ont continué d'oeuvrer conme si qu'éch gazier l'éroait poin été lo ; minme quante i l'o cminché à z-zés mnachés avoék eune arme . Adon , tout moneux , tout péteux ech voleu i l'o décanillé in moins d-deu.ye avoék ch'qui l avoait d'pronnes ed tcheuillées !!

　

*Deroufleux = Voleur

* Arbou = A l'envers

*Bailler = Donner

 

Maoués mais juste

Hier au soér , ej rinte à m'barraque ...Quoé qu'ch'est qu'j apprinds ?

J apprinds qué ch'cat i l'avoait maqué l'l pâtée dé ch'tchien ..

Crénon dés z'os ! J ai mis ch'cat déhors .

La dsus ; quoé qu'ch'est qu'j apprinds ?

J apprinds qué ch'tchien i l'avoait maqué cho'c cotlétte dé m'fenme ...

Crénon dés z'os ! J'ai mis ch'tchien déhors .

Pi lo, quoé qu'ch'est qu'j apprinds ?

Qué m'fenme al avoait maqué min bisteak .

Crénon dés z'os ! J'ai mis m'fenme déhors .

Et lo , quoé que j'démuche ?

Que l'lait qu'j avoais bu a l'pointlette* , ch'étoait ch'tilo dé ch'cat .

Crénon dés z'os ! ...J'ai foait rinter tout l'monne ...

Pi mi , ben , ej sus sorti .

Maoués mais juste .

　

*A l'pointlette = A l'aube

Ed quoé qu'tu t'mêêêêle !

Ch'est forchémint in décomptant chés moutons au soér por s'indordler eq chés habitants d'chés Iles Féroé is ont yeu l-l'idée .... Adon , r'vénons à no bérbis , ed quoé qui n-nin r'torne .

Voéyant qué ch'gayant Améritchain "Google " i n'avoait mie coér invoéyé d'carettes pour cartografier chés Iles Feroé au nord dé ch'royaume Uni ; is leuz ont décidié d'équiper chés bérbis d'un "GPS" pi d'eune caméra 360 degrés .

Tous chés donnés recouées* l'ont été ajoutées à cho'c carté mondiale " Google street view" . Os povez minme raviser des tchots fimes qu'ont té mis in line d'sur ech site " Visit Faroe islands"

　

*Recouer = Recuperer

 

"TANK" à fouére !

Os avez dés pécaillons pa l'tchu pa l'téte * ? Pi quand qu'os étoéte nazus os ainmoéte bien bérziller chés catieus d'légos qu'atimpichoait'té vo frére é soeurs ??

Alors' Geoffrey Bloor ein Austaïen i l'o éne saquoé qu'a poroait vos intéresser : un TANK ! ed 1965 , ch'tijin d'djerre i l'appartenoait à l'armée d'chés grands Bretons* .

Si qu'os vouroait't él-l avoér din vo gardin i feuro saquer 54 043 € . Bé à ti camarate ech transport i n'est mie compté d-din ,(Australie -France) quand qu'tu séros chés prix , té fros dz ébondis* du diabe .

　

*Pa l'tchu pa l'téte = en grande quantité

*Grands Bretons = les Anglais

*Ebondis = Bonds

 

Méfit'té d'chés macaronis !

chés Français durant chés bieus jours is ont quére dé s'bécoter avu d' z horzins* . Sié , pu d'soichainte pour chint !

Chés vagances is n'sont mie foait' eq pour laper dés coketailes o bien fouére pringére el long du jour ! Nan , ch'est étou rincontrer chés gins ! Pus d'un Français sur deux i l'éroait djo conté fleurette a in.ne incon.nu(e) rincontré durant chés bieus jours

Ch'est chés Itaïens (chés macaronis) qu'is l'import'té d'in.ne courté caouéte pér dvant chés Grands Bretons* pi chés castagnettes* . Chés Améritchains is recouet'te* cho'm médale in chucolat !

Soin a vous , si os pértez avu vo blanc bonnet vir chés transalpins ! I l'est coére témps d'canger dé cmint , os srez prévnu !

　

*Horzins = Etrangers

*Grands-Bretons = Anglais

*Castagnettes = Espagnols
*Recoue'te= Vient de recouer : recuperer

Tranche ed leune

In nhui ej vos propose ed juer . El 20 juin au soér cho'b bélle* al étoait rousse por féter chu solstice d'été ; ch'étoait fin rétus . Un phénoméne qui o liu un coeup tous lés quarainte o chinquante ans .

Terakubo Mashiro un Japon.nais i l'o r'mertché eq chol leune al ersannoait à in.ne tranche ed jambon a coeuse dé s'couleur si partitchuyére qu'al avoait s'soér la .

Adon , i l'o balé d'sur "twitter" un montache avu cho'f foto d'chol leune roussiuse intourée ed troés tranches ed jambon! Os sroéte ti capabe d'erconnoaite d'ou qu'cho'b bélle est camuchée ??

　

*Cho'b bélle = La lune

 

Ch'est ch'métier qu'i rinte !

Pér aprés ch't histoére lo , os y r'guettrez pététe in deux coups dvant d'vos porter volontaire à un tour ed cariméro* .

A s'passe in Polon.ne in diréc à ch'poste ed télé ; un apprinti magicien i l'o dmindé a éne animatrice ; soin ,qu'a n'est poin eune fenme prinse a lurlure* din ch'public ; nan ch'est eune pouillette qu'al est lo ésprés pour li bailler* un molé d'ayude .

Adon ; i y-o dmindé d'ecrabouiller avu s'main in saclet in papier ad'ou qui avoait muché d-din in.ne alleumelle* in métal . Al lé foait sans térinter un instant piqu'al est aditée* ed fouére ech tour la avu ch't honme . Et lo , crénon dés z'os ! quoé qui s'passe cho'p pauve fenme al s'értreuve avoék un cleu plinté in plein miyu dé s'main . Chu magicien i s'avoait berluré . Ch'est ch'métier qui rinte qu'i y-o déclaqué !

　

*Cariméro = sorcier (employé ici dans le sens de magicien)

*Lurlure = Au hasard

*Bailler= donner

*Alleumelle = Lame (ici grand clou)

*Adité = Habitué

 

Chés nazus su'l voée d chol langue Picarde

Chés dix darin.nes* ésmaingnes , 18 éléves ed CE1 d'l école Victor Hugo à Ailly le haut-clocher(80) is ont découvert el langue pi cho't tchulture Picarde . Chaque mérdi aprés-none in.ne foés chés cours pliés ; is értreuv'té France Avisse qu'al s'otchupe ed l'agence pou ch'Picard pour eune élçon d'apprintissage .

Ch'l ateïer i cminche pér présinter ch'temps qui foait , pi quéques jux , eune coupe ed canchons ,sains oblier chés cabotans * . Is apprind'té des mots su l'corps humain ; su l'trogne , chés bétails , et chés loques , ch'est fin bien pour inroéyer* avu ch'Picard .

A l'occasion chés margats is berdél'té troés quate mots in famille au momint d'chu souper .. El maman d'Gabrielle à s'ramintuve dé l canchon Picarde qu'al avoait apprinse à l'age ed sin fiu . Mattiew li , i l'o rcheu un live tout in Picard ed la part dé s'mére !

Posté scriptum : Ch'l ateïer avoék chés nazus i sro diffusé d'sur France 5 din ch'l émission " Echappées belles" el sémdi 24 ed séctembe à 8h 30 au soér pour un liméro spécial su cho'p Picardie .

　

*Darin.nes = Dernieres

*Cabotans = Marionnettes Picarde à fils

*Inroéyer = Terme de labour : tracer le premier sillon . Employé ci dessus dans le sens de commencer

Ch'titations

Ch'est voté

Vlo éne loé qu'al o un molé d'boin sin ! A vienne din cho'c capitale Autrichienne ; chu parlémint d'la ville état i l'o voté eune loé ed "congé canicule ".

Dés qu'chés timpératures is varont à dépacher 35° , austôt chés 375 bidets ed caléches Vien.nois porront arter* leu proumnade pi prinde un congé canicule , dusqu'a témps qu'chés timpératures is r'bach'te . Si pér malheur chés horzins* qu'is vourrait'té fouére un tour in caléche pis qu'is quairoét't ed'sur un jour d'ou qu'chés bidets is jok'te* ; qu'is n'sé foaich'té poin d'bile is porront toudis s'n aller vir chu manéche ed chés bidets d'bos à l'foére !!!

　

*Arter = Arreter

*Horzins = Etrangers (employé ici dans le sens de touristes)

*Joker = Arreter le travail plus ou moins longtemps

 

Est ti poin fini ch'busin !

Os ons tout d'abord yeu ch'co qu'i codakoait timpe au matin ; pér aprés os ons yeu chés cloques qu'is cloqutoait't ed trop souvint . In-nhui à intinne dire un coupe ed parigot in vagances à Carry - le- rouet i péroait qu'a sroait chés cigales qu'is froait'té d'trop d'busin* !

Adon , is leuz ont aboulé mon chol gindarmerie pou déposer plainte . Déjo ch'cadoreux* i l'o cru qu'on li faisoait éne niche* , mais nan . Adon i leuz a conseillé d' aller passer leu vagances in Bourgogne , l'l poéyi d'chés ch'calimuchons ! Pour seur eq lo is sront biénaise !

　

*Busin = Bruit

*Cadoreux = gendarme

*Niche = farce

 

JOZI cats

N'y o dés gins qu'is dit'té eq chés coglaines* is n'peut'té mie s'éjuer a ch' rugby , a coeuse eq ch'est un sport ed gayants abloqués* conme des lutteux d'foére , et qu'a n'est mie un sport pou chés minguérlets* sé conme dés chints d'cleus poin pus épais qu'un flét d'canche ; et qu'i z-zés traite ed "tapettes , folles; chochottes" .

Nan mais , manne un peu ; chés gins is sroait'té ti dévnus complétmint toqués ?!... Et pér qué sin qu'chés JOZI CATS eq ch'est l'nom dé ch'premier clup ed rugby homosexuel sud Africain is n'éroait'té mie l'droét ed's éjuer a ch' rugby ?

Adon , réyus* d'intinde toudis dés gouailleries* durant leu match o bien tout simplemint in s'édvisant d'leu sport avuc d'eutes gins ; is ont décidé d'laincher eune campanne publichitaire qu'a raconte écmint qu'a no jours on peut coér érfuser l'intrée à chés coglinéres din chés liux commun . Pi surtout d'arréter chés injures qu'is lu pourrit'té leu vie .

　

*Coglaine , (tout comme coglinére en bas du billet) = Homosexuel

*Abloqué = Trapu

*Minguerlet = Maigre

*Réyu = Fatigué

*Gouaillerie = Moquerie

 

Ch'est ti la djérre ?

Adon , cha sroait la djèrre mon chés Phillipins ? Bé, ch'est poin mi qu'i l'dit , ch'est face ed madjette* . Quoé qui s'passe su ch'l arnitoéle , Non dés zos !!

In voulant annoncher cho'f fête Nationale ed chés Philippines Facebook i s'o berluré , i l'o touillé toute din chés couleurs avu ch'drapieu Philippin . A plache ed métte cho'b bindé bleuse in heut , al s'o r'treuvé in bos dé ch'drapieu .

Cho qu' facebook i n'savoait poin ch'timbléyeux lo , ch'est qu'in temps djèrre chés Philippins is foait'té hisser leu drapieu à l'arbout *. Quante i s'o apérchu dé s'boulette face ed madjette i s'o éstchusé rondébilis*

　

*Face ed madjette = Face de bouc = facebook (tojours du mau avu ch'l Inglés chés Picards)

*Arbout = A l'envers

*Rondébilis = Rapidement

Os tnez ch'boin bout

Maginez el "tir à la corde " os savons cmint qu'oz i jue . Mi , ti , tertous oz y-o déjo jué au moins' eune foés din no vie . Ouais , mais ch'tilo d'tir à la corde i l'est un molé spécial , pisque cho'c corde al émsure 10 KM ed long .
Ch'est amon chés Estoniens qu'cha s'passe ; chés habitants ed chés 2 pus grannes iles is n's'arringe'té poin insanne , tojours a s'capigner* , a s'chamailler edpis dés siéques . Margré tout is ont treuvé un moéyen pou s'racamiller* . Is s'agrip'te à in.ne corde ed 10 km , (distince inter chés 2 iles) 500 habitants d'un sin et 600 d'l eute qu'is saqu'té dsus à mort à n-nin fouére péter ch'cordache .

A l'fin dé fin , ch'coup chi y'ero mie d'guégnant pi qu'cho'c corde al s'o bérzillé !!


　

*Capigner = se battre

*Racamiller = Réconcilier

 

Nouvieu Déssin

A y est ch'coeup i est foait , is ont tertous coési , a sro ch'déssin in d'sous . A n'mé plét poin plus eq cha ; mais bon ...J'én sus qua mitan surprins raport à ch'nom qu'is avoait't coési un moés pa dvant pou chol nouvielle région !

Mi j'avoais voté pou ch'tilo avu ch'Beffroi ( i sanne a vir qua s'seuche jué a in.ne coupe ed voés prés)

 

Un nénéphant din ch'gardin !

A mzure quante os ransez* el long d'chés cmins a d'ou qui n'y o d'chés  ruissieus o bien dés flot i n'est poin rére ed démucher in.ne tortue , in.ne tortue grosse conme eune tiéte ed vieu*, o bien étou un sérpent ed deux o troés métes ed long , qui varoait à vos péker qu'os sroéte coér bien malprind , pi cmint fouére pou s'démalprinde d'un bétale pareil ?!
Ahh pour seur qu'is sont bélots , fin rétus quante is sont jonnes chés bétails lo . Ayez soin , ayez soin braves gins chés bétes lo is grandit'té vite ; pi est aisié pér aprés d'sin débarachés in z-zés garottant din chés patis* !

Peut qu'manqué amon chés Sri Lankais ch'est wére* miu. Chés gins aisé i leuz ont prins l'pécavie d'avoér un jonne ed n'énéphant* qu'is laich'té lo pér driére leu moaison d'su eune piéche ed terre . Conme si, ti pi mi os éroéme un tchien din no cour ! A ti du sin tout cho !? ...

Chés définseus d'l invironemint is ont éxigé d'arter* rondébilis és manége lo . Pisqu'i sanne à vir eq chés voleux rien né zz' arréte ! A n'est mie tonant* quante on sait qu'un tchot nénéphant i put s'ervinde dusqu'a chint trinte mille euros !

　

*Ranser = Flâner

*Vieu = Veau

*Patis = Pature à l'interieur du village

*Wére = guere

*Un nénéphant = Eléphant

*Tonant = Etonnant

Sourdious

Perlez pus heut j'intind bas ! Pour seur ch'est ch'que ch'paure honme i l'éroait du dire quante i l'o intindu sin nom din cho's salle d'attinte , adon ch'étoait d'trop térd , chol décarsure* a dvoait arriver .

Os l'l ons don imné in salle d'opération , chés cérusiens is ont foait ch'qu'is dvoait'té fouére , pi 2 heures pus térd ech coeup y étoait foait . Quante ech t honme i s'o écanillé i n' y voéyoait goutte * , i l'o don dmindé à ch'l infirmiére a coeuse qu'i n'i voéyoait pus rien ; cho'p piquoére a li o rinfiqué : Bé , os n'vos ramintuvez pus qu'on dvoait vos opérer d'un oeul ?

Asseuré qu'nan qu'i li déclaque ech't honme tout moneux* ; mi on dvoait m'opérer dé m'n euréle ej sus sourd conme in.ne bécache !

Pour nin définir , j'min vo vos aspliquer ch'malheur ...Ch'paure* honme din cho's salle d'attinte i l'avoait détiqué d'ses écalipes* tout s'n incrinquillache* , et i l'avoait répondu à un nom qu'a n'étoait poin l'siéne , et vlo cmint qu'on s'értreuve a éte opéré d'un oeul a plache d'in.ne euréle .

Ed tout sin ; tout cho finiro qua minme amon ch'tribunal ed Limoges el 13 ed juillet pour savoér ech bout qui vo dvant !

　

　

*Décarsure = tache pénible , rebutante

*Voéyoait goutte = n'y voir goutte ; mal voyant

*Moneux = Deconcerté

*Paure = Pauvre

*Ecalipes = oreilles

*Incrinquillache :(Materiel divers , souvent eléctronique ou éléctrique ) Ici pour designer l'appareil auditif

 

O dvient s'qu'on minge !

Os étoéme seurmint à chu nouvieu an avoék no gins in famille conme gramint d'monne à ch'momint la . I n'minquoait rien su cho't tabe , tous chés mingeries , chés buvatries a ti a masse* is étoait't la ; ed trop probabe , cho't tabe houlée* d'norriture . Pour vos mette l'ieu à l'bouke nin vlo in.ne séquant : Vavars* ; seutrelles, boutchets , bigorneaux; canteus* , pi sains oblier chés plats keuds : Boudins , pourdinne ; lédjeumes , fromaches , pi ch'pastorelle* cho'b bûche glachée obien patissiére .

Bé , bin atombé qu'os in dvisoéme mi pis m'tante Monique ed tous cho'm maquerie al gron.née. O n-n acate tojours ed trop, ej sais bien qui n-n éro coér pour el linnemain ch'est connu qu'avoék chés resses on s'ingraisse! Monique ,elle ch'qu al n'o vraimint poin quére ch'est cho'v vianne , al dit qui feut poin n'nin minger tous lés jours . Pour seur eq j'i rtorne , pi ha coutroait d'trop quér . Sié ! qu'a m'dit pi cho'v vianne rouge ha rind nérveux , hargneux, maoués , et al continue s'litanie* in m'disant : Peu qu'minqué i péroait qu'on dvient s'qu on minge ...Et lo , à l'eute bout d'cho't tabe oz intind eune voéx qu'al dit : Allé dépeque te, finie tin BOUDIN sinon t'iros poin juer avuc tés cousénes .

chétoait m'n eute tante Bérangére qu'al houspilloait s'fille pour qu'al finiche és n assiéte . Os nos sonme rbeyé mi pis m'tante , pi on s'a déclaqué d'rire... Paure tchote , al est bélotte conme tout , éh dire eq sin pichon préféré ch'est l 'thon .... J'ai idée qu'a cangero !

　

*Houlée =Remplie

*Vavars = Crabes

*Canteus = Bulots

*Pastorelle= le meilleur

*Litanie = récit ; liste

 

Du pain su cho'p planque !

　

Qué lubrie qui y- o prins à chu Strasbourgeoés ed vouloér conféction.ner cho'p pus granne tartine du monne .

Tours* est i qu'Bruno Dinel un Boulinger Strasbourgeoés , i s'y o attelé à conféction.ner pér nuit el pus granne tarténe du monne , acoutez bien chés msures , est à peinne croéyape : 1,1 KM ed Long ; 5000 parsonnes is porront vnir mier un cantieu* d' pain à chu siége ed chés réstos du tchoeur Strasbourgeoés . Eune autorité al varo* pour autintifier chu rcord ,qu'i éro nécessité d'agincer 400 tabes in line droéte .

　

*Tours =Toujours

* Un cantieu = Morceau de pain

*Varo = Viendra

 

Gaokao

Os dvez vos dire cha y est i décaroche*  , nan tout i vo fin bien ch'est seurmint poin l'kaleur qui foait in ch'momint qu'a foait bolir més boéyeus d'chérvelle !

Gaokao cha vut dire Bac a lauréat in Chinoés . J'nin sus resté tout étombi s' matin quante j'ai li din chol gazette eq chés candidats qu'i s'froait'té prinde in train d'tricher à leu fameu Gaokao is pouroait't écoper ed 7 énées d'prison !

Eune loé voté a l'apréseut * qu'al récompare* chés tricheries à un CRIME ! Quaind minme is atige* t' un molé (voér gramint minme) ... Adon el mérdi 7 , jour dé ch'Gaokao chés autorités is ont dmindés chu déploémint ed 768 policiers in charge ed miler chés 96 centes d'examins dé ch'poéyi !

　

*Décaroche = Perdre la raison

*L'apréseut = L'automne (aprés août)

*Récompare = Compare

 

Ch'Tour ed France

Cha y est os i sonme conme tout l'z an quazi à l'minme date à quiques jours prés ch'est slon ! Ch't énée el TOUR conme on dit, i pérte ed chu Mont Saint-Michel ...

Dé ch'mont Saint-Michel ?? ...Nin vlo d'un eute qué j'ém dit à pért mi minme . J'n'in sus resté conme deux rond d'flan , bec é borne* d'apprinne eune chose paréle ; pisqu'os l'savez conme mi qu'chés bicyclettes is doé'té rester pér edvant ch'Pont -passerelle , à coeuse eq l'intrée à leuz est interdit dé ch'preume d'avril dusqu'au 30 séctimbe ed 10 h à 6 h au vrépes .

Feut vir chés gins d'l achuchon* Vélocité d'Avranches ...is saqu'te in.ne rute gueule ; is ont coére du mau d'incorser ch'l infilure* qu'on leuz o jué . Pour seur qu'is l-l ont au travers ed leu gargatte , pi pour un momint coére !!

　

*Bec é borne = Interloqué , stupéfait

*Achuchon = Association

*Du mau d'Incorser ch'l infilure = Du mal à supporter la tromperie

 

Long Ma et Kumo

　
Sémdi passé à none el patron.ne à m'dit conme cho

- feut qu'os allonches su cho'p plache d'armes pour vir Kumo pi Long Ma !

- Kumo pi Long Ma , quoé qu'cha n-n est coér qué ch'machin lo qu'j i déclaque ?? Cha sroait ti poin qu'is torneroait't un fime ed KUN-FOU avoék jacky Chan , pi qu'ej sroais mie au courrant , mi qu'ej sus t'in aragé d'zarts Martial , non d'in.ne pipe !

-Arréte tés cacouilles qu'a m'rinfique ; Kumo pi Long Ma cha n'est mie du capignache* ed seuvages . Nan , ch'est 2 bétails grands conme un immeube ed troés étages ...in.ne érignie pi un bidet-dragon !

On peut vir étou dés gins qu'is jouqu'té* d'sur éne éspéce ed balainchoére pi qu'is jut'té do'm musique à dés heuteurs du diape !

Tout cho , est fin bien qu'ej dis à min blanc bonnet ; mais os tu prinds tin boursicot pour qu'os buvonche un tchot coeup , j'ai min gaziot sé conme braise . Os ons lapé touté deux un boin dmi ...afin , surtout mi , ém fenme elle al o cafioté* conme à s n habitude ! Pi d'un seul coup d'un seul ech dragon i s'a mit a raquer du fu pi à déssaquer do'f funkée dé s'gueule ! Oz o coére été saisi , ch'est qu'est daingereux ché bétails lo ! Mettez vous à plache ed chés gins qu'is r'guétoait't chu spéctac ed leu balcon dé ch' deuxiéme étage , feut coére qu'is s'déméfit'te qué ch'dragon i n'bouté poin l 'fu à leu tife !! Chauve qui peut CRÉNON DÉS ZOS !!

　

*Capignache : vient de capigner = se battre

*Jouqué = Ici dans le sens de juché , perché

*Cafioter = boire du café

 

Un criquet pou l'apéro !

Ch'est in r'béyant chés gins maquer d'z inséctes din ch'l émission KO LANTA eq Bastien pi Clément is ont yeu l' idée ed monter leu affoaire in s'achuchon.nant . Is ont cminché pér fouére évnir dés criquets d'Thaïlande pasque ch'est dés bétails bourrés d'proteines.
 Conme is n'minqu'té poin d'jinjin* pi d'allant is ont oeuvré su l'criquet pou qu'chés gins is peuch'té l'mier à l'apéro , in l'aboénichant* avoék in.ne coupe d'épices ; granmint d'sintimints* , pi d'colorants , et in ramindo* eune boéte d'imballache rindiminchée* ...adon , i nin falloait poin d'avaintage pour qu'a seuche éne réuchite . Leu chiffe d'affoaire i l'o bondi ed troés chint por chint . Si cha tombe din éne coupe d'énnées os vons tartous maquer dés criquéts à plache dé ch'boin poulet dal diminche . Ed tout sin , os n'srez mie ramalinés* , n'y o d'avaintage ed tchuisses à mier su ch'criquet ...Maginez qu'os mingez un mille-pattes , ben lo os srez repu pou vo smaingne !

*Gingin = Ingéniosité

*Aboénir = Rendre meilleur

*Sintimints = Odeurs

*Ramindo = En plus

*Rindiminchée = rendue plus jolie

*Ramaliner = Ne pas se faire avoir