Chés dragons su l'plache ed Berck

Pou chés 30 ans d'ech Festival International ed chés dragons (cerfs-volant) ed'Berck !

Un molé d'humour avu no z'amis cacheux , pi 2 fotos d'chés dragons su chop plache ed Berck !

 

 

 

Un sin fu ni liu , vraimint asteux

Jéronme in sin z'abri qu'i est adité à rinde visite à chu boulinger ed Dole din l' Jura . Adon Jéronme ech'paure lazére, i y-o seuvé s'pieu . Écmeint qu'a s'o passé !? Ej m'in vo vous dire toute !

Jeudi passé Jéronme i passe boére ene goutte éd jus avu ch'l artisan boulinger qu'i oeuve tout seu din s'boutike ; quante i l'o été prind d'faiblésses . Jéronme i l'o tout jusse yeu l'témps d'l écorer* pi d'appeler chés scours .
A l'hosto chés métçins is asplique'te qu'ech boulinger i s'o foét impoéson.ner pér chés gaz mawoués* .....Sin sauveteu li , i n'foét mie d'imblé pour cho ; j'étoés lo , j'ai foét min dvoér ; pi ch'est toute .

* un sin fu ni liu : un sans feu ni lieu = un SDF
*écorer : soutenir
* Gaz mawoués : monoxyde de carbone\l "

Acouter éne léginde su chés martinéts ! ( picardie matin)

   Chés moénieus à tcheue fourchuse ! 


http://france3-regions.francetvinfo.fr/picardie/emissions/picardie-matin/une-histoire-de-picard.html

Thérésa de Filippis

Os avez ti djo eintindu dviser ed Maria Thérésa de Filippis ? al vient d-défuncter à 89 ans , al o minme été Miss Vésuve ! Oué ;... edpis al o du rintrer in éruption !! ....

Mais ch'est mie d'cho qué j'vux vous causer in-nhui . Fidjurez vous qu'ch'est l'prémiere féme qu'i o pilotée éne Formule1 d'sur un circuit d'championat du monne intre 1958 et 1959...
10éme ...! ch'est l'meilleur plache qu'al o yeu , ch'est fin bien mi j'trouve. Feut l'fouére ;.. tout l'monne n'el foét poin .! ...piq'des fémes in Formule1 in-n o poin à houle* hormis pététe din chés Hotels ..(formule 1) !!...

* à houle = granmin

acouter du Picard

Intretien su chés agaches et chés nids d'oésieus

Léopold Devismes qu'i s'édvise  ...

Collection Laurent Devismes (36)

Arro , cha n'plane pu pour li

Tchiéche qu'i o volé  ch'l aréoplane !?..

Un moaite chucolatier Vosgien i s'o foét dérouffler à Arro éne réplike in chucolat ed six métes éd long ! ....I s'in alloét à ch'salon du chucolat ed Beaune adou qu'i dvoét présinter s'wouiquéne chol doublure gourminde d'un Airbus A 330-200 dé ch'l équelle 1/10éme. Ésposé din tout chés coins et racoins d'la France , i l'éro fallu oeuvrer intre 800 et 900 heures pour obténir un chéf d'oeuve parél

tojours chés doubes !!

Silinche , on dort

I couque din éne boutique ed meubes !

N'in vlo d'én eute !!

Sémdi al pointelette in honme réyu ,mort à jnou d'avoér lapé tout l'soérée !
Et vlo ti pon qué ch'flayeu lo i s'o adové din eune boutike ed meubes à Rorschach mon chés Suisses .
Un ouvérier dé'l boutike n-n'est resté bec et borne ed vir ech loustic qu'i deurmoét d'sur un lit d'ésposition . Ech ferlampier lo ed 31 ans d'age s'i sroét gliché quiques minutes aprés qu'ech commerce i l'euche ouvert ses portes , pour cuver sin vin bien al coyette ! Os l'croéyez ti vouzote

! ...

Ch'titation

Os srez privés d'pécaillons

J'vous bale ichi éne  histoére qu'al est véridique !


Edvant d'défunctée éne Grad-mére al o éfrouétée* pu d'un million d'Euros !
D' quoé qu'i n-n est !!

Quante chés eimpoïers d'chom moaison d'peinsionnés i z'ons reintrés din chol cambe is ons tartous cru avoér éne bleuse vue . Éne pinsionnée Autrichienne o décopée soégneusemint à peu prés 950.000 euros d'billets édvant d'mourir .... Chés billéts iz étoét'te plachés in mont su s'greute* .

Chol viéle féme ed 85 ans al o étou aboli ses livets d'épargne avoék éne somme qu'a grimpoét à six chiffes .
Chol tchote grad-mére a n'o point laissié d'mot d'billet pou aspliquer quoé qu'i o bien pu li passer pa s'caouéte ... Probabe qu'al étoét un brouille avoék ses décheindants ?? , o bien al vouloét ti z-zés priver d'eune béniautée dé ch' magot ??
A intin.ne dire chés policiers , o peut 'maginé toute !!

* Efrouéter : réduire en miette
* greute : lit

Drole ed boin temps

Ayez soin d'éne poin vous satchez d'trop térd , n'sait on janmoés siq'os dvoéte  dégratter chés cassis d'vo carette  !!!

Fotos

Nouzote din ch'Nord os ons toudis éne idée qu'al pousse l'eute !!

Berck sur mer , la d'où que j'sus né ...pi chom' MANIFIQUE  BAIE D'UTHIE  !!!

N'y o ti coér des frites ?

Avez vous déjo eintindu éne paréle histoére ! ....Cha s'o passé ein Bégike .
Vlo dé ch'qui nin r'tourne ....Din cho'p prison d' Lantin à coté d'Liége , un prisongnier i l'o r'fusé dé s'présinter amon dé ch'tribunal , pachque ch'étoét jour ed frites à l'cantine . Feut savoér qu'la bos chés frites is sont sarvies foque él mércrédi pi l'diminche .

Min coin ...

Adou qu'éj resse ....Manifique côte d'opale

Feut vive avoék sin témps !

Ah ch'progrés , qu'il est bieu ch'progrés ! Os avez ti r'merqué qu'i n'y o des coses qu'os n' foaisez pu édpis eine coupe d'énnées ; pi qu'os n'srez pu lo d'érfouére ch'est mi qu'i vos l'dit ! .....peuq'manquer quante os érez vu chol liste, os n'srez point méconteint d'vous in n' éte déchepés ed tous chés viusries lo !!!.... CH'EST L'PROGRÉS !!

Alors vlo dé s'qui n'in r'torne ! Quanjou l'darin coeup qu'os avez ...

- Preind ch'BAC pour aller rouler a l'Ile de Ré ??
- Érmonté vo révéle matin ??
- Souffler ch'poste ed télé sans cho't télécommande ??
- S'adover dvant cho'm MIR ? ( soin ! point ch'liquide pou laveinder z-zékwoéles)
- Foére el 12 ?
- Éne point busier d'trop longtémps quand qu'on s-saque su l-l'cache d'ieu ......Achteure feut point s'berlurer, piq' os avez 2 boutons pour einvoïer chom marée !
- Imprunter eine bande a cassette a ch'vidéo clube ?
- Accreucher sin K-WAY à ses hankes ?
- Accreucher un porté -clés a sin blue-jean ??
- Proufiter d'ech quart d'heure Améritchain ?
- Dminder sin kmein a quiqu'un ? (achteure tartous is ont un GPS )
- Éne point avoér fiate din sin lavabo ? ( achteure oz ons mie pu d'surprinses pisqu'oz ons tartous in mitigeur , mais din l'temps ch'étoét toudi d'trop keud ou d'trop froéd)

Pi pou nin définir j'vos ai wardé l'meilleu pour la fin .....N'y o cobien d'temps qu'os avez poin passé vou langue d'sur eine pile plate pour vir si al étoét coér karqué , pi si n'y avoét coér un molé d'jus ?? Os vous ramintuvez ti dé'ch gout ??... Os n'él froéte pu achteure pisqu' y o chés "testeurs " qu'is indiqu'te pér des titchots lumions verdé- rouges si vo piles is sont coér bien d'équerres obien à débléyer !!

CH'EST CH'PROGRÉS ..

..

ch'titation !!

Ecati - ville

Os voérons d'toute !! Edpis la fin d'z énnées 90 qu'a seuche ein Espanne ,ou amon d'chés Nipons , o bien a ch'poéys d'l oncle Sam ; pi coér bien méme ein Serbie , et asteure a Montréal ; tertous chés poéys is on leu " CASSE - CITÉ " qu'is z 'appele'té cho !! J'parie qu'os voudroéte bien savoér el bout qui vo dvant ...attindez un molé j'min vo vous dire toute !

Cha s'passe dens eune granne fabrique , o bien dens chés burieus a péris ! Leu moaite o bien ch'directeur i rasanne dens eine piéche eine flopée d'z ecwélles , ed gattes , ed manicraques , pi coér ed z-incrinquillaches aléctroniques ( laves-ekwélles ; poste ed télé , erfroédichoére (frigo)).......tant é pi coér ... y o méme éd z autos ! Allez vous ein vir !!

Eine foés qu'toute i l'est fin prét dens chol piéche ...Quoé qui s'passe !!?
Lo d'ein coeup os voéyez s'rabziner eine bénne (bande) ed geins avoék des gordins , des triques (batons) pi qu'is cmeinche'te a buquer, a écatir , pi a bérziller chés autos chés manicraques .....In moins d'deu.ye chol piéche al est a saque ... !!!!

Chés geins ércrans , réyus , mafflés conme si qu'is vnoét'te ed coeurir ech Marathon d' Péris , mais fin héreux d'leu déstruction .........Al fin dé fin ....A quoé qu'a sert tout ch'bataclan lo , qu'os éte ein train d vous dire .......A einténne dire ; a s'roét pou s'rapurer (s'calmer) , défouére chés tension a coeuse dé ch'l ouvrage ................Mande un peu ... is n'sait'té pu quoé inventionner chés geins d'la ville !!

Acouter du Picard

Lire du Picard est coér aisié dé l'fouére ; mais acouter ....cha ch'est eune eute poaire ed manche !Vlo  Vlo ichi eune boéne heure d'écoute ed Martine Boiron née native edPouy (hameau d'Aubers) a eune vingtain.ne ed tchilométes au sud ed Lille .

ALPic: Aubers (1)

Carton, Fernand

Picard

90 ans ....capieu !

Quante on z-a des freumions din les gambes ha n'est mie aisé d's'in défouaire ; j ai bieu bouter du sé din més pantouffes ...Wate ! is armont'te quaind minme chés bétails lo ! ...On m'o dit , qu'pour es'décheper d'chés freumions i feut éscofier cho'r reine . Pour seur qu'ch'est complitché a r'connoaite , mé i sanne à vir qu'a seuche chélale qui euche ech pus laid capieu ...

Ch'preume ...el vrai

Bojour , ou re (bojour) ...pour chétlo qu'is étoét't lo hier au vrépe , pér après chés premiers cafouillaches ; ém vlo fin prêt pour qué j'vos foéche pértager mes contes (dés foés a tuer chés leus à coeup d'bonnet) ; mes diries , mes ch'titations ; sécantes foto pi granmint d'eutes surprinses! os voérez bien ...Attinde pi vir conme is dite la bos amon chés grands Bretons ( z'z inglés) !
Os pouvez bien seur commintez n 'y o poin d'mo ! du momint qu'a seuche in Picard , Ch'ti , Rouchi , obien coér chu Hainaut Belge !   aller à s'érlire mes gins .
Marci d'vo comprintichoére .......Adé ez zéf


In -nhui j'min vo vous r'baler chu foto d'hier soér , bé ; conme ej sus poin un mawoés la gale os n-n érez 2 pou l'prix d'eune !