Maflé !? Y o napflix

Os avez ti du mau d'fouére un sonme pér aprés avoér diner ? Én cachez pus ! Deux pubicitaires Barcelon.nés is ont treuvé l'bout qu'i vo dvant . Is ont ahansé* NAPFLIX ...éq ch'est eune chaine ed télé qu'al vo vous aidier à vos indordler* , os dormirez conme éch tchot jésus !

Napfix , ch'est in.ne chaine qu'al diffuse dés concours ed boules , dés vidéos d'pleuf' qu'al chambuque* su chés carrieux ; o bien dés cours ed physique quantique , o bien coér a mzure un match in chinq sets amon Roland Garros ! Marche , ej min vo quitter lo , piqu'éj voés qu'vos ziux is cminch'te à s'freumer et qu'os allez mie térder à piquer du nez pi fouére pringére* !!

　

*Ahansé = Conçue

*Indordler = S'endormir

*Chambuquer = Frapper

*Pringére (fouére) = Faire une siéste

 

Un crocrodile amon chés pouléts

Quoé qu'ch'est qui peut pousser dés cadoreux* Sri Lankais à décarer* à toute bérzingue ed leu conmissariat ? ?

- Éne Koketaile molotof' garoté* pér chés galibiers dé l'casernemint* d'in fache ?...

NAN ..!

- Eune sringuie* d' kalachnikof' su chés carettes ed chés gindarmes pér nuit ?...

NON PUS ...!

Én tornons poin alintour dé ch'pot , j'min vo vous dire el bout qu'i vo dvant ; a coeuse éq chés gindarmes is ont décanillé rondébilis ed leu conmissariat . Ch'est pachqu'is ont vu s'abouler un crocrodile ed 2 métes é d'long . Ech bétal maoués i l'o été déssaqué d'la d-din foque él lindmain . Bin atombé qu'parson.ne i l'o té affolé* .

Probabe qu'éch crocro i n'avoait mie "les crocs"

　

*Cadoreux = Gendarme

*Décarer = Se sauver

*Garoter = Jeter ; lancer

*Casernemint = Ici utilisé dans le dens de bâtiment

*Sringuie = Contenue d'une seringue .Ici utulisé dans le sens de rafale

*Affolé = Blessé

  

Min train i n'est poin d'l avant

Écmint fouére pou n'pus arriver in r'tard à cho'f fabrique * ?? Est aisié ; i feut mier al pointelette* , én poin oblier d'déjeuner . Ch'est poin mi qu'i l'dit ch'est din chés gazettes amon chés Portougués* .
El chéf ed l'usine i sé dmindoait pér qué sin* qu'sés ouvériers is étoait'té janmoés d'l avant à leu traval ?! ... Ch'est raport à ch'train qui né ll'est poin non pus , qu'is r'déclaqu'té chés travailleux . Forchémint si ch'train i n'est poin aheuré chés ouvériers is n'peut'té mie ll'éte itou .

Adon , a coeuse éq chés trains is n'sont poin d'l avant ? Chol société dés écmints d'fer al rinfique qui n'y o dés gins qu'is ont dés faiblésses pi qu'is quait'té din lés peumes , pachqu'is n'ont rin din leu panche dpis timpe au matin . Du coeup ch'train i l'est obligé d's arter* pi chés gins is sont in r'tard à leu ouvrache .

Chol société dés écmints d'fér al o don décidé ed bailler* dol noriture ( dés yaourts , dés peumes ) pour pus qu'chés gins is quait't éd din ( din lés peumes bien seur) ...

　

*Fabrique = Usine

*Al pointelette = La pointe du jour

*Portougués = Portuguais

*Pér qué sin = Pour quoi faire

*Timpe = Tôt

*Bailler = Donner

 

L'l histoére d'Albertine Sarrazin (conte in Picard)

http://france3-regions.francetvinfo.fr/picardie/emissions/picardie-matin/albertine-sarrazin-detenue-la-citadelle-de-doullens-et-auteure-de-roman.html

Chés grimpeux d'z abes

Dés concours os y sonme habitué.ye i nn'o al gron.né , à houle * conme on dit coér amon chés Berckoés . Adon ervénons a nou berbis ... N'y o dés concours ed décortiqueux d'seutrélles , ed raquache* ed noéyeux d'péques , o bien d'prunieux à mzure .

Atandis* ch'témps lo chés Reunion.nés , euss is s'amus'te à ch'ti qu'i grimpero l'pus vite à ch'couplet d'chés cocotiérs . Tertous chés grimpeux is sont lo in bos* dé ch' l abe à gueugue ed coco ; pi à ch'signal i feuro qu'is attinch'té chol cime el pus vite possibe in grimpant foque avu leu man.yes* et leu piéds .

Él champion , ech crack conme on dit coér , i l'o mit sépt ésgondes quarante neu* pour arriver tout in heut . Ti poin bieu.ye ?! ...

　

*A houle = Plein

*Raquache = Vient de raquer : cracher

*Atandis = Pendant

* In bos = En bas

*Man.yes = Mains

*Neu = Neuf

 

S'invoéyer in l'air !

Bé lo ch'est l'pastorelle*més amis , aprés on vara* dire qui n'y o coér un aréoplane qu'i s'a écati* , écrabouillé din chés montaingnes . Acoutez bien est court mais cha veut 10

In.ne hotesse ed l'air Hollaindaise dé l'compannie TRANSAVIA consignoait* din un cannepin* sés pérties d'gambes in l'air qu'a fsoait aveuc sés collégues din ch'"cokBit" ...'Scusez , j'm a bérluré j'voloais dire din ch'cokpit in plein vol .

Ch'est s'n honme à ch'l hotesse qu'i l'o queu* pér hasard su sin cannepin . Jai idée qu' din l'témps al oeuvroait din un bar à hotesses in Bégike* ; cachez l'naturel i r'vara au galop

　

*Pastorelle= Le comble

*Ecati = Ecraser

*Consignoait = vient de :consigner

*Cannepin = Calepin

**Queu= vient de quaire : tomber

*Bégike = Belgique

 

Qué cinéma !

EST INI !! Oués ch'est fini , fini l'témps adou qu'os povoéte mier vo " pop corn" o bien léquer vo gelco fin bénaise bien aplonqué* di vo cadot* in vlours rouche ; asteur pour érbeyer feuro pédaler !

El pédalociné qu'is appel'té cho . Ch'est à Caen qu'is ont yeu l'idée ed proposer in.ne séanche* al belle étoéle , ch'est grace à chés spéctateux qui in pédalant conme dés dératés produiront d'l étrécité pour raviser leu fime !

Isanne à lire qu'a sro a l'intrée* d'juhiet 2016 quante ech tour de France i vo s'radiner in Normandie qu'is passeront leu fime !

　

*Aplonqué = Bien installé

*Cadot = Fauteuil

*Séanche = séance

*Al'intrée = Au début

 

Un " mexi-con" ed Mexico

Asseuré qu'dés cons in'n o tout pértout du nord au sud , éd gueuche et 'droéte . A mzure * os pouvez oblier o bien pérde din ch'train , vo keuchure , vou clés , vo carnasse , vo téléfon.ne ...tanqu'é pi coér* ....

Mais lo , din ch'métro à Mexico mon chés grands capieu.yes* , n'y o un Méxicain qu'i l'o oblié 2 urnes funéraires . Ma pinse , ej sais bien qu'din chés vases i n'y-o foque eq des chindes , mais ch'étoait ti eune raison ed "déchinde" sains chés urnes , népoint? *

Voilo , ch'est toute , ch'étoait ch'l histoére d'un mexi-con ed'Mexico

　

*A mzure = Parfois

*Tanq'é pi coér = Et puis tant d'autre

*Chés grands capieu.yes = Sombréros

*Népoint = N'est ce pas

 

Phare ed Berck

Qu'il est bieu.ye hein ch'phare ed Berck . Bati in 1950 , d'in.ne heuteur ed 44.50 M , 1 éclat blanc touté 5 ésgondes , os povez l'vir briller dusqu'a 44 km ed bistimbout ! ...Pér driére chés casernemints qu'os voéyéche ch'est chu lycée pi ch'collége ; maginez un molé el chance qu'os avoéme quanq'os fsoéme l'école pichognére (buissoniere) ; chés dunes pi l'baie d'uthie ...
Bon amérrons la chés ramintuveries ; adé .....Posté-scriptoum: Jai quére ed fouére dol peinturache ,mais ch'est poin mi qu'i l'lo peinturluré

Un coulon in gayole* !

Nin vlo d'ein eute , is n'rigolt'té poin amon chés Indiens ! Vlo ti poin qu'is ont aplaché un coulon in déteintion . Pér qué sin qu'os vos disez seurmint?!

Figurez vous qu'éch coulon i tringbaloait un mot d'billet acreuché à sin cou avoék dés mnaches* à l'inconte ed l'Inde , ecrit in Ourdou éq ch'est chol langue ed chés Pakistanais .

Feut savoér éq chés Pakistanais pi chés Indiens cha n'est mie lés pu grand z'amis du monne . Is n'passeront poin leu vagances insanne !!

　

*Gayole = cage

Mnaches = Menaces

 

Eune boule din l'panche

　
Os savez ti quoé qu'ch'est qu'la trichophagie ? Rin à vir avoék ceuss qu'is foait't é du tricot ... Nan la trichophagie ch'est dés gins qu'is maqut'té leu caveux .

El moés passé chés métçins Améritchains is ont vu s'abouler in.ne fenme ed 38 ans d'age avuc éd'z angouches* du diabes din s'panche , pi d'z invies d-dégobiller* . Vlo ti poin qu'is ont démuché in.ne boule ed 15 chintimétes ed caveux bin aniché din s'n éstomac .

Ej sais bien qu'ch'est la crise mais quaind min.ne ...maquer sés caveux ! O ti du séns ?

　

*Angouches = Douleurs

*Dégobiller= Vomir

 

Du hollande ! ...j'vous in brie

Du Hollande ! ...j'vous in Brie

I sanne à vir qu'chés jours qu'is viénn'te os allons souvint intinde berdler* d'Hollande .

Mi tou* j'vai vos n-nin pérler un molé . Mais soin , ch'est poin d'politique qué j'vai vous dviser ; seuré qu'nan os allez djo nn'éte échoui assez chés moés qu'is s'aboul'te .

Nan , j'vai vous causer d'fromaches , dé ch'pu grand platieu d'fromaches au monne . 40 métes ed long ; pu d'sept chint trintes variétés ...qu'is seuch'te à pates tchuites , mo*; pérsillés , ed vakes , o bien d'berbis ; au final cha fro quaind minme quazi chonq ton.nes !

Ch'est à Nancy qu'chu Guiness Book i dvroait homologuer ch'record

　

*Berdler = Parler

*Tou = (é) tou = Aussi

*Mo = Mou , molle

 

Eune bouéne " péke-é-mone" GO

Mi j'én jue poin à ch'ju la ! J ai eute cose à brasser qué d'rouler din chés rues pour cacher in.ne bétal bitaclé* . Fuche ! In Autriche din un titchot villache , y o un gazier qu'i cachoait pér aprés chés bétals quante i s'a r'treuvé din ch'gardin d'la commeune , pi lo , i l'o été surprins pér in.ne flair* poin ordinaire .

In s'rapreuchant un molé i l'o déteupé in.ne sécant d'plants d'cannabis qu'is poussoait't din in.ne sérre . Ch'proprio ed chinquante ans d'age i l'o té mis à ch'bédoufe * rondébilis .

　

*A l'arbout = A l'envers

*Bitaclé = De 2 couleurs

*Flair = Odeur désagréable

*Ch'bédoufe = Beffroi qui avant la guerre de 1940 servait d'abri momentané aux ivrognes et aux délinquants qu'on y envoyait cuver leur vin

 

El queue d'nou cat al est bienvnue

Éh ouais , toute i fini pér arriver ! Attinde et pi vir conme is dit'té chés grands Bretons*

Ej connoés in.ne gin qui reuve d'éte boulinger , ch'est sin papin* à li la boulangerie , i n'n est ravagé . mais cmint fouére piq'ch'est pu un jone nivlet* i l'o déjo passé lés quarantes énnées , adon ...Ch'étoait sains compter su Natacha Bouchart ( Maire ed Calais) qu'al o décidé d'batir in.ne boulingerie solidaire " BIO" .

Un liu d'ou qu'on apprind à chés chomeux pi chés paures lapides* qu'is ont té àl'école din chés courts jours à fouére du pain bio pou chés colléctivités , chés écoles , chés z'hopitals . Chés gins is sront formés pindant 6 moés qu'is peut'té s'rallonger dusqu'a 24 moés . Pér aprés avoér passé ch'l éxamén , tertous chés candidats is sront prinds in charge pér ch'l achuchon* qu'a leu baillero un molét d'ayude* pour démucher d'l ouvrache .

Ti poin bieu tout cho !!! Cha marche à la baguette ! ( baguette bio bin seur) !!

　

*Grands Bretons = Anglais

*Sin papin = Sa passion

*Nivlet = Adolescent

*Lapide = Malheureux

*Ayude = Aide

 

Souffler chés leumiéres

 
Pour seur qu'a sro miu ainsin . Cho'v ville ed Reykjavik al o décidé d'coper tous chés leumiéres ed la ville ed 10 h à 11h du soér pour eq tous chés gins is peuch't r'luquer chés z'aurores boréales .

Ch'est à Reykjavik qu'on proufite el miu dé ch'phénoméne naturél ...Manifique .

Pardu din la Taïga

Siq'din banga i o dé l'ieu.ye , alorss' quoé qui n'y o din la Taïga ?? Ben , n'cachez poin y o rien ; ò* tout du moins poin grand cose .
La Taïga ch'est un Sibérie , la bos quante vos quittez un villache , ech prochain i l'est a troés chints tchilométes . Ech jour lo , és taïon.ne* al étoait seurmint otchupée à foaire sin tripot* , et sin tchot fiu ed troés ans d'age i y-o écapé* , et i s'a inseuvé din la Taïga .

Bin atombé qu'i l'avoait sin tchien avoék li pour és ramoncheler à sés cotés pér nuit pour qu'i n'prinche poin froéd . Ch'l infér lo i l'éro duré troés jours , troés longs jours à mier dés chucrates qu'is trainnnoait't din l'poke ed sin palto* . Per bonheur i l'o té r'treuvé vivaint pér chés scours .

　

*ò = ou

*Taïon.ne = Grand -mére

Tripot = Ménage

*Ecapé = Echappé

*Palto = Manteau

 

Cha préte à rire !

Ben , i minqueroait pu qu'a m'foaiche braire ! Margré tout n'y o pététe dés poéys* qu'is n-n ont moins dzoin qu'd eutes .

Quoé qu'éj touille qu'os vos disez seurmint ; ouais i feuroait pététe qué j'vos in dvise un molé . A Nantes din cho's salle d'atteinte dé ch'l éstation* is ont aplaché un distributeu d'cacouilles* ; pi in ramindo* os n'érez poin d-doubes à saquer d'vo boursicot* . Et os porez coésir dés cafougnettes d'eune , ed troés , o bien d'chinq minutes ch'est s'lon ; foaite a vou mode . D'ichi fin 2016 trinte chinq éstations in France is n-nin sront équipées .

　

*Poéys = Employé ici dans le sens de ville , village

*Éstation = gare

*Distibuteu d'cacouilles = Distributeur d'histoires droles

*In ramindo = En plus

*Boursicot = Porte monnaie

 

Chés dormeus d'Compiegne

http://france3-regions.francetvinfo.fr/picardie/emissions/picardie-matin/pourquoi-appelle-t-les-compiegnois-ches-dormeus-d-compiegne.html#

R'béyez cho't tchote vidéo d'chonq minutes !

Dés batieu.yes tout seu !

Tout cho ch'est fin bien mais cha foait coér in.ne quérque ed gins qu'is voaich'té s'értreuver à joke *. Mande un peu , chés blouses blanques* is ont invintion.nés dés batieu.yes qui navigue'té tout -seu . Sié min capitain.ne .

Pi figurez vous qu'os pourez biétôt z'zés vir su chés canals d'Amesterdam . Dés batieu.yes sains capitain.nes qu'is trainsporteront  dés gins ; ed'z agobilles* ; pi dél maquerie* .

Premiere mise à l'ieu.ye ed chés "ROBOATS "* ch'l énnée qui vient

　

*A joke = Sans travail

*Blouse blanque = Scientifique

Maqueries = Nourritures

*Agobilles = Objets usuels

*Roboat = Nom du bateau

 

Bé à ti !

Soin* à chés fotos qu'os méttéche su ch'l arnitoéle* . Chés gins is s'réjouit't é-télmint d'partir in vagances eq du coup is bzine'te su chés reseau social pour fouére vir leu carte é-d'imbarquation à leu z' AMIS .

Adon , is sont loin dé s'douter dé ch'l infilure * qu'a s'trame driére leu dos . N'y o la des rutes cocos* qu'is milt't é-vo fotos d'réservation et is cange'te é-vo noms pi l'indroét d'ou qu'os allez , et in.ne sécants d'tchots détails qu'is leu pérmet'te ed modifier voér minme d'annuler vo billet

　

*Soin = Attention

*L'arnitoéte = la toile , le net

* L'infilure = La ruse

*Cocos = Individus peu fréquentables

Pi aprés cho'b blouse ...

Cha faisoait un momint qu'a li trutoait* din s'caouéte à Clarisse Walet , maristresse ed l'école Jeanne d'Arc à Calais . Edpis eune coupe d'énée al avoait l'invie ed fouére érmette in.ne rouillére* à chés gamins dé s'n établissemint . Mais cmint s'i prinde pou n'poin offfusquer chés pérints .

Al o coési* l'fin d'l énée pour inroéyer* sin projet . Chés pérints is ont défini d' coésir un modéle pi cho'm marque qu'is leu plaisoait't é-l'miu , hormis cho'c couleur; n'y o poin d'tchutchute* al doét éte él minme pour tartous .

Quante on dminde à Clarisse Walet pourquoé qu'alo volu chu r'tour ed cho'b blouse ; vlo ch'qu'al rinfique , n'y troés raisons : Un preume , quéstion d'égalité , quand qu'oz est harnéqué d'in.ne blouse , on foait pértie d'un minme groupe . In deuze ; cho qu'j ai l'pluss quére : Infiler s'blouse , ch'est cmincher s'n ouvrache . Pi d'troése : On n'ésquinte poin sés habits ; pour sur qu'a n'doét mie déplaire à chés parints .

　

* Truter = Tourner , fermenter . Ici employé dans le sens de tracasser

Caouéte = Tête

Rouillére = Blouse

*Inroéyer = Commencer

*Poin d'tchutchute = Il n'y a pas de discussion