Seuvons no kiosques !

Chés Parigots is leu z'ont achuchon.nés* pour seuver leu kiosque à jornal , aveuc leu pétition qu'is ont lanché d'sur l'arnitoéle ch'est déjo pus d'dix mille signures qu'is ont récoué .

Est i poin honteux, d'la pért ed'cho'm mairie d'vouloér démaingler* pi rimplacher chés 360 kiosques ahansé pér chu célébe architéc Hausmanien Gabriel Davioud ; pour atampir* a plache dés cahutes ordinaires poin racachants , sains tchote frise pi dôme su ch'toét !

Ch'est l'progrés ...Fuche !

　

*Achuchon.ner = S'associer

*Démaingler =Démolir

*Atampir = Dresser

 

Hooligan !

Pi qu'on pérle ed Footéball el long du jour , i feut s'edviser étou d'chés supporters, qu'i nn'o dés boins pi dés maoués . Os savez ti cmint qu'ch'est qu'i l'est né chu HOLIGANISME ??.

J'o intindu cha l'eute coeup à ch'poste éd radio ? Chétlo qu'is l'sait'té ta miux pour eux; mais pou léz eutes j'm in va vos nn-in dviser un molé .

Tout i l'o cminché din zz'énnées 1890 din eune tchoté ville Irlandaise . N'y avoait la bos un délonmé Patrick qu'i n'minquoait mie éne occasion ed fouére pérler d'li . I mnachoait* chés gins , et i leu foutoait eune frousse à z-zés térrorisers , li ,pi tout s'famille .. . ch'étoait conme qui diroait dés maoués la galle , qu'is avoait't el diabe din l'panche .

Ch'est chés jornalisses un preume qu'is ont cminchés à s' intéresser à cho'b binde ed rastaquoéres* lo, in déteupant* leu nom et ch'est lo pou l'premier coeup qu'oz o intindu pérler d'cho'f famille Hooligan....Et ch'est dpis ch'témps lo qu'chu hooliganisme i l'o pointé l'bout d'sin néz !!

　

*Mnacher= Menacer

*Rastaquoére= Individu bizarre

        

Coére dés croquettes au souper !?

Os savez ti quoé qu'cha n-n est qu'chu PUP PLAY ? Os l-l érez comprins ch'est coére un mot d'chés grands Bretons* . A sroait poin drole qu'os n-n' ayéche janmoés intindu pérler dé ch'mot là ; pi qu'i n'y o foque dix mille Inglés qu'is l-lé pratique , alors à malaise in France qu'oz est toudis à l'atarge* su chés Inglés pi chés Ritchains . El pup play ch'est un jux "de role" ; soin , ha n'est mie séssuél (poin seulmint ) . Ch'est dés gins qu'is s'prind'té pou dés bétails , el pus souvint pou dés tchiens : is maqu'té din eune gamelle , is s' foait'té fouére dés flattes su leu panche pér leu fenme . D'autchuns* is intiqu'té minme dés loques qu'is r'sann'te à dés tchiens ( vir foto) pi sont coutchés su ch'canapé au côté d'leu blanc-bonnet .

cha arrive coére pus souvint qu'a sin tour eq ch'est cho'f fenme qu'al foait ch'moaite o bien ch'sogneu*

Ben, on voéro d'toute , minquroait pus qué ch't hocleux la , i foaiche sés dzoins su ch'trottoér pi qu'a sroait s'fenme qu'al raveindroait ch'bren ! A s'roait l'pastorelle* !

　

*Grands Bretons = Les Anglais

*A l'atarge = En retard

D'autchuns = Certains

*Sogneu = Soigneur

* Pastorelle =Le bouquet

 

Al sine 151 ...CDD

Etoait à prévoér eq tout cho finiche mon chés prud'hommes . Bé mettez vos à l'plache ed cho'p paure fenme ed 49 ans d'age qu'al oeuve din in.ne moaison d'értraite ed l'Ain (01)

Pér aprés avoér oeuvré six ans al o té bouté à l'oust* pér sin chéf . Fuche ....al n'avoait mie d' CDI , mais a n'n étoait qua minme à sin 151 ém CDD ... Alors quante al s'o aboulé din ch'burieu d'sin patron pou li dminder d'li fouére siner un CDI ; i -y o rinfitché eq taseulmint a n'n éroait poin , mais in ramindo* qu'i l'alloait l'métte à Joque* .

Quaind minme , est i poin honteux ?!

　

*A l'oust = Dehors

*Ramindo = en plus

*A joque = Joquer , c'est stoper le travail plus ou moins longtemps

 

Sz' alimints qui vos rind'te héreux

　

Tchiéche qu'i n'o poin reuvé d'éte héreux , à tout du moinss un molé pus héreux . J'o intindu n'y o quéques jours à ch'poste éd radio , qu'éslon s'qu'on minge ha peut canger no comportémint el long du jour pi à mzure ed l'énée si qu'os suivez bien chés rcommandations ! Adon quoé qu'ch'est qui feut mier ?

- Dés bananes

- Éd' z avocats

- Dés sardines

- Pi surtout chu chucolat noér

Pou chés sardines in boétes ch'est boin étou ; surtout chélle à l'heule d'olive .

Bé, soin à vouzote , pi qu'i n'y o dés foés qu'vo avocat minme si l'est fin boin ; i pourro mie rien fouére pour vous ....Os finirez in cabéne !!

 

Ch'darin menu

Ch'est su du papier dévnu ganne , daté de ch' quatore d'avril 1912 , qu'os ons r'treuvé ch'menu dé ch'darin dîner , pi ch'est lo qu'os ons seu quoé qu'ch'est qu'is avoait'té mié chés passagers d'prémiere classe à bord dé ch' TITANIC .

Vindu à chés inchéres el trinte séctimbe darnier , ech papier i dvoait rasanner 50 000€ ! Oué , des pron.nes ! Un acateu alonyme* i l'o balé 88 000 € . I sanne à vir qu'a seuche un déchindant d'chés 700 parsonnes qu'is n-n ont récapé dé ch'naufrache .

Quoé qu'ch'est qu'is ont mié ?

Ech menu i comptoait dusqu'a 13 plots* (aprés on s'éton.ne qué ch'batieu i l'euche coulé)

Ech darin dîner i comprindoait :

"Un consommé fermier, un cock-a-leekie (soupe écossaise traditionnelle à base de poérions et d'peumes éd terre dains un bouillon d'glaine), filets de barbue, oeus à l'Argenteuil, Glaine à la Maryland, corned-beef, lédjeumes, boulettes, côtelettes de mouton grillées, purée, frites, peumes éd terre in robe dé chambe, pouding à la crème anglaise, meringue à la peumes, pâtisseries."

Vinguette !! Is éroait't dû tartous prinde inn ile flotante... is sroait't pététe coér vivant !!

J'a li étou din eune gazette qu'on peut i avoér fiate* , qu'i-y avoait in tout 3 ménus , pi fidjurez vous qu'din un d'chés menus i y avoait conme désert dél glache (ice) ....Allez vous in vir !

　

*Alonyme =Anonyme

*Plots =Plats

*Avoér fiate = Faire confiance

Un guide ..cha guide ..parfoés un dauphin

Seuver un dauphin à l'artic ed la mort d'sur inn plage ; ha vos arrive qu'eune foés din vo vie . Pour seur qu'ech guide touristique i s'in raminturo* longtimps .

I l'étoait avu quéques pratiques* quante i l'o apperchu un jonne dauphin à mitan éstourbie* d'sur inn plage in Namibie . Cha l'tracassoait i s'a don décidé à l'prinde din ses bros pi dé l'ermette à l'ieu .

J'n avoés wére d'éspoér qu'i nos raconte ech guide , mais dés qué ch'bétail i s'o rsintu din l'ieu pi qu'i l'o comprind qu'i l'étoait din s'n élémint , i l'o foayé conme eune fléque !

　

*Raminturo = Souviendra

*Pratiques = Clients

*Estourbie = Inconscient

 

Liberté in tchote coupure

Bé lo ch'est toute ; ej sais poin vous mais mi j'nin voérais déjo des ruses pour rasanner chinq chint euros in eune ésmaingne , alors à malaise chinq chint mille euros in neuf jours . J'vos dit quoé qui n-n est .

500 000 Euros ch'est ch'qu un prison.nier d' Moulin Yzeure din l'Allier , i l'o du poayer conme caution pour récouer* s'liberté . mais ch'tribunal i l'o overt eune intchéte pisqu'a y-o sanné drole qu'un gazier conme ho ed 30 ans i peuche rasanner un tél magot in si peu d'temps ; pi in ramindo* tout ho poayé in tchoté coupure ( 1000 billets ed 500 € )

Ch'rastacouére* la i n'est poin blanc conme neiche , in ziutant d'un molé pus prés sin dossier , on s'o appercheut qu'i l'avoét djo trafitché dés drogues , pi tou* d'z achuchonnages* avoék dés rutes cocos pou blinchimint d'pécailles .

Oué ! Qué siéque ...


　

*Recouer = Conserver

*Ramindo = En plus

*Rastacouére = Drôle d'individu

*Tou d'z achuchonnages = Aussi des associations

 

Ch'titations

A 300 Touché - coulé !

Én n'vos bérlurez poin , ej sus mie in train d'juer à cho'b bataille éd l'air , un jux d'ou qu'i feudroait canarder chés aréoplanes a plache ed chés tchuirassés .

Nan , ch'est chés cawoétes* interligintes Turques qu'i leu z'o prind éne pécavie* d'couler un Airbus A 300 au lérgue* ed Kusadasi ; eq ch'est un indroét houlé* d' plongeux à boutéles in mér Egée ; tout ho pour qu'chés honmes guérnoules is euch't un récif artificiél ! Manne un peu !

Pététe , mais 82 000€ ha foait tchér dé ch'récif . Pi os croéyez ti qu'chés pichons in "classe affaire " is sront pus goutteux qu'ész eutes ??!



*Cawoétes interligintes = Têtes pensantes

*Pécavie = Envie soudaine

*Au lérgue = Au large

*Houlé = Rempli

 

Eune princesse Belge in banlieue

Edpis quand qu' la Princesse Astrid soeur dé ch'roé Philippe qu'al n'éroait mie l'droét dé vnir dépinser ses monacos* in limousine à Aubervilliers in Seine Saint Denis ?

Seuré qu'al o l'droét , mais slon chés tchuins d'ou qu'al iro rouler feudro qu'al euche soin à ses dorlots* et sin sac a main.ye . Adon ch'qui dvoait arrivé i est arrivé . Au momint d'ou qu'cho'v voéture dé lusque* al o cangé d'voés pou s'n aller à ch'péage , un noércassier i leu z'o berzillé leu cassi et i l'o aherdé* chu sac a main.ye d'la Princesse aveuc 2000 € d-din pi i l'o foayé conme inn balle boche .

Est i poin hontabe ed vir cho ; pinsez à chés paures lapides din leu boutikes alintour qu'is s'attindoait't seurmint à rimplir leu tiroér tchaisse ! S'sont rvénus avoék ech'qu'is ont d'preunes ed tcheuillés !


*Monacos = Argent

* Dorlots = Bijoux

*Lusque = Luxe

*Aherdé = Saisir

 

Watieu battu

Éspécialitée d'cho'p Picardie Maritime , pou ceuss qu'is froait't du choléstérol passez vou cmin ! Dix gannes d'eus pour ahanser foque un watieu battu . Chés r'cettes is s'touill'té d'un tchuin a éne eute ; mais chol confrérie dé ch'watieu battu qu'al défind ch'plot avoék forche , al s'otchupe d'organiser sécant* concours ed dédjustation pi bailler ch'prix et chés médales à ch'crake*

Vlo min scrét pou qu'os réussichéche un boin watieu battu ! JANMOÉS ed courrant d'air su cho'p pate , al doét s'atampir* au rados à bouéne témpérature édvant dé l'tchuire . Un molé d'vint d'sus , ha peut abolir éd z heures d'ouvrage in quiques minutes !



*Sécant = Quelques

* Ch'crake = le meilleur

* S'atampir = Se dresser ; ici utilisé dans le sens de lever

 

Os voudroéte ti léquer vo cat ?

Nan , nan j'én décaroche poin piqu'ej la li din chol gazette ech preume ed juin . Asteure os pouvez léquer vo cat ch'est eune blouse blanque * ed Portland mon chés ritchains qu'i o invintion.né inn saquoé d'rédeux* et qu'i l'o délonmée " licki brush" .
Os voulez ti savoér ech bout qui va dvant , os baillez vou laingue à ch'cat ? J vos asplitche un molé : ch'est inn laingue in silicone qu'al pérmet d'léquer vo cat pisqu'al érproduit chol tésture rapeuse ed chol laingue dé ch'félin qui li pérmet d'léquer !

Aorss si os voulez fouére des léquettes à vou cat , i vos in coutero intre 15 et 20 € . Mais soin i vos feudro attinde un molé edvant qu'a seuche din chés grainds magasins o bien su ch'l arnitoéle* , a coeuse qu'i leu mainque coér 12 000 €


*Blouse blanque = Chercheur

*Rédeux = Ici employé dans le sens de drole , bizarre

*Ch'l arnitoéle = La toile (sur le net)

 

Al o vu du poéys

Ej pinse eq si Victor Sheppard un Améritchain i vindoait s'n auto i pouroait cmincher conme ho : Voèture à vinde gramint sarvie . Ch'est peut dé l'dire ; maginez qué ch't honme la i l'o roulé 1 million six chint mille tchilométes in 9 ans avoék sin Pik up éne Toyota tundra .

Feut dire étou qu'i résse din l'Wyoming pi qu'i oeuve in Virginia ; est don aisié d'carculer qu'chaque énée i l'éra roulé : deux chint mille tchilométes avu s'n auto . Ch'est putôt rére os m'avourez ! ...Aprés tout ho , qu'on vienche poin m'dire eq chés mérques Japonnaises ch'est " NIPPON , NI MAWOÉS*


*Mawoés = Mauvais

 

Qué courage !

I nn-o qu'is sont à chu sommet pi d'z eutes qu'is voudroait't bien n'in vnir à bout .

Ej m'in va vos causer in-nhui d'un alpinisse ed 41 ans d'age qu'i veut réaliser l'ésploit d'atteinne el couplet d'cho'm montaingne K2* eq ch'est l'deuxiéme sommet l'pus heut aprés l'Evrest . D'z autchuns* is l-l'ont déjo foait dvant li qu'os vos disez seurmint . Oué , mais a l'différinche qué ch't honme lo i est affligé , éstropié d'sin pié droét et d'sin gueuche i l'o foque el mitan d'ses 2 piés , in plache chés céruziens is li ont bouté dés prothéses pour qu'i peuche és déhaler un molé . Cho'd décarsure lo , a li o arrivé pindant s'prémiere grimpette ed l' Aconcagua eq ch'est chu sommet el'pus heut d' chol cordilleres des Andes .

A n'est mie diu croéyape ed vouloér i r'torner ( pététe qu'i veut récouer sés piés ; ah ben ch'froéd cha conserve, pi forchémint is ont poin bougés d'eune flépe ) . Adon el 13 ed juin i vo s'laincher pou cho'd deuxiéme foés ed gravir chu mont " sans pitié " ch'est sin surpitchét à ch' K2.

Ch'est qu'i est coér daingereux ch'K2 la; pi qui sanne à vir qu'i l éroait acouftée pus d'quatré vingt parsonnes . Pér aprés l'Annapurna ch'est l'sommet el pus daingereux au monne ....Gageons qu'i n'i laiche poin ses main.yes la heut ; ha sroait l'pastorelle*



*K2 = Surnom du sommet du massif du Karakoram situé sur la frontiere Sino-Pakistanaise : 8611 Métres

*d'z autchuns = certains

*Pastorelle = Le bouquet final; le comble

 

Emma...

Emma Morano éne Itaïenne ed 116 ans d'age , péroait bien pértie pour batte chu rcord ed cho'f Française Jeanne Calment défunctée à l'age ed 122 ans .

In-nhui ch'est un graind jour pour Emma qu'al reste din sin tchot appartémint à Verbania tchote ville du Nord ed l'Italie su lés bords dé ch'lac Majeur . Al attind fiére conme un tchot banc el visite d'un journalisse . A pein.ne qu'al o fini s'pringére qu'on buque al porte . Qu'importe , al est bien écanillée pi fin prête pou cho'f foto . Risotante , bien étampie su l'bord ed sin lit avuc sin cavet brodé à sin nom posé su sin gron al prind la pose .

Tchiéche qu'os éte ? qu'a dminde d'éne voéx trannante qu'oz intind à pein.ne ! Ech journalisse i nos conte : Emma ch'est l'preume ed huit z'éfants ; née el 29 ed novimbe 1899 , tout ses gins is sont à ch'camp d'soéle* , a n'peut pus arquer ni minme érbeyer ch'poste ed télé ; al n'o poin tchitté sés agis* dpis 25 ans , al n'ércheut parsonne hormis ch'guéritoute* . És n 'honme ch'étoait un maoués la galle , qu'i n'o janmoés rnue d'cho'g granne guerre !

A trinte ans pou survive al o oeuvré din eune frabrique ed toéle ed jute . Souffrant d'anémie sin métçin li o conseillé ed mier troés eus pér jour ( deux crus et un tchuit ) ! Al l'o foait durant 90 ans . Emma ch'est éne fenme d'habitude ; Déjoutchée chaque jour à 8 h , dîner à 11h et souper à 6 h au vrépe ; sains oblier d'fouére un sonme pér aprés chés rpas ; et à chloffe* à 11h du soér . Voilo un tchout résumé ed cho'f fenme el pus vielle su nou terre . Ed tout ho , j'értarais* surtout chés deux- troés mots qu'al o dit à ch'métçin quante il o vnue li annoncher qu'al étoait el pus viéle ed tout chés blanc-bonnets , al o dit : Ahh ben ch' qu'os m'disez lo docteur cha m'érdonne un coup d'jonne !!

* Ch'camp d'soéle = cimetiere

*Agis = Piéces de la maison

* Guéritoute = Docteur

* A chloffe = Au lit

 

Ch'titations

Pizzas por cho'm mama

Os srez condané à eune Calzone et eune 4 saisons un wouiquéne d'sur deux . A préte à rire , ch'est pourtant l'vérité vraie qué j'min va vos conter in-nhui . ch't histoére a s'passe mon chés MACARONIS* , ha no cange un molé pi qu'ch'est souvint mon chés Ritchains o bien chés Rosbeefs qu'a s'passe tous chés litanies* la .

Ch'l histoére à cminche conme gramint d'eute mon ch'tribunal ed Padoue in Italie , un honme pi eune fenme i divorce l'un d'l eute ! El sintinche al tombe : ch't honme i dvro raquer 300€ chaque moés ed pinsion alimintaire ...ALÉA JACTA ESTE * ....Dusqu'a la ch'est du rékeufé , dés coupes qi'is s'déssépar'te in-no à houle* . hormis qu'ichi conme ech't honme i l'est à joque* et qu'i l'o quéques tracassemint d'pécailles ; ech juge i l'o don décidé qu'i poéro* l'pinsion alimintaire dé s'fenme in ...pizzas . Et oué i devro poéyer in nature , maginez un molé troés chints euros in pizzas ; j'éspere equ cho 'f fenme a n'est mie manequin . Ed tout sins al peut déjo canger s'gardé-robes !

*Macaronis= Italiens

Litanies = récits

* Aléa jacta este = sentence , qui veut dire , il n'y a rien d'autre à dire ou à faire

* A houle = Beaucoup

* Etre à joque = Ne pas travailler

 

El canérdite , eune rute maladie

El canardite ch'est un mau qu'oz attrape din chés "coins, coins " ouéche qu'i o gramint d'canérd . Mais rien à vir chog'grippe ed chés glaines . N'y o inn gin qu'i raconte , os l'l appélerons Ludo : J 'a chopé cho'c canardite quante j'étoais tchotain qu'i s'raminteu Ludo in bzinant din chés mérais avu min pére eq li minme i n-n étoait aragé .

I y awoait ch'jour la eune leumiére fin rétuse dsus ch'l étang pi quéques sintimints d'wase* avoék chés cants flutés d'chés moénieus ; j'étoais biénaise . D'un coeup, éne nuée d'maillards * s'a déssatchés dé ch'tahu* noér j'ai sintu min djidji* qu'i s-saroait . Min pére i l'o tiré un moénieu et i l'o tcheu ; ch'tchien i l'o seutè din l'ieu pour el raveine , ch'étoait un marle ed sarcelle , j'l o prind din més main.yes tout trannant ; j'a rcheu chés gouttés -d'ieu.ye touillée d'sang qu'is dégoulinoait't su s'gave . J'étoais saisi d'contintemint ; vlo cmint qu'j o attrapé ch'virus ed cho'c canardite . Pi i n'm o pus janmoés tchitté !


*Wase= Vase

* Tahu = Gros nuage

* Djidji = quiqui , gosier
 

Tchitter sin poéys

N'y o ti coér ed l'ouvrache din ch'poéys la , non dés z'os ! Sié , mais soin i vos feudro débagager* . Chu smaingne passé au vrépe j'érbeyoais inn émission avoék Franchoés Lenglet , fort intéressant . I l'ésplitchoait cmint qu'chés jones Espagnols is nn' étoait't arrivés dé dvoér tchitter leu poéys pour pouvoér oeuvrer .

Et n'y o mie qu'chés Espagnols ; quasi tout ch'sud ed l'Europe i s'rabzine oeuvrer din ch'Nord ed l'UE .... Pi à l'arbout* i o granmint d'pinsionnés d'l Europe du Nord qu'is s'aboul'té din chés poéys keuds dé ch'sud ed l' UE pou fouére bizir leu caqueus din chom'mér Meditérannée .

Est rédeux* quaind minme . Méttons , un jone Espagnol qu'i oeuve in Allemagne , ha veut dire qu'i cottérise* pou chés pinsionnés Allminds , qui euss sont in Espagne ! Qué jus ...

Ed tout sin , j'ai idée qu' pus térd os érons inn Europe du Nord batchée d' 20 - 50 ans . Pi inn Europe du Sud ed 50 - 90 ans ?? Ha fou la trouille quaind minme nan !?



*Débagager= faire ses bagages . mais ça peut vouloir dire aussi devenir fou

* A l'arbout = Au contraire

*Rédeux = Drole ; bizarre

* Cottérise = Cottise

 

D'z hortensias...avoék o sains filtre ?

Ahh, ém tante Félichiéne à fzoét bien éne vingtain.ne d'énées qu'os nos avoéme vu , el darin coeup ch'étoait din s'moaison d' Montreuil mie loin d'chés ramparts . mais dpis qu'mon onke i l'o rinvalé sn aluétte* al o volu rappreucher s'file qu'al résse à Boisjean din l' Montreuillois .

Os l-l ons don invité à souper mardi passé . Atandis qu'j étoais in route à coper ch'fricot , j l intindoais qu'al berdloait avu min bieu frére Jean-Louis , al étoait rudmint rmontée raport a chés drogués d'chés invirons qu'is coeup'té chés têtes ed chés fleurs !

Sitôt rnue* avoék min plot d'vianne , ej dis à Félichiéne : Quoé qu'tu touilles don la ma tante , chés drogués is cop'té chés fleurs ?? ....Oué fiu qu'a m'rinfique , a foait un bout d'témps qu'a dur ech t histoére lo ; al pointelette* chés gins is s'appercheut't eq pér nuit on cope chés têtes ed leu z'hortensias din ch'corti !! Adon j'i déclaque : A coeuse chés hortensias ?

Bé , eune foés sétchie pi touillée avu ch'toubac chés jonnes is fum'té cho conme un joint , ha leu foait l'minme ressintit qu'chu canabis voés tu ...M'afin , d'aprés intinne dire ches cadoreux pachque mi j'o poin inseuyé* té pinse bien !!

Nin vlo d'in.ne eute ! Bon asteure mingeons ; pi j'vos garanti qué j'nai poin mit d' fleurs din chés lédjeumes ! ..Ahh ben.. on sait janmoés hein!! Asteure ej pinserais à tizeute ma tante quante j'arrouserais mz' hortensias !!



* Rinvaler s'n aluétte= Mort

* Rnue = Revenue

* Al pointelette= Lever du jour

*Inseuyé = essayé

 

Ch'titations ...

9 éme GAINÉE d'Boulonne sur mér

S'wouiquéne à Boulonne ch'étoait " la GAINÉE " ahansée su chés quai.yes conme is dit'té chés Boulonnés . Edpis neuf énées ch'est ch'clup ed chés chint croates* qu'i sé n-n otchupe . Adon , quoé qu'a n-n est au juste eq la Gainée ?!

Un molé d'asplique : Chés tchots chalutiers putôt du coin d'chés zones cotiéres , is awoait't éne maniére a euss ed pértager chés bénefices . Pér aprés cho'v vinte dé ch'pichon din chés halles quante i nn' in réstoait, tout i l'alloait a ch'chéf pi à chés marins ...Asseuré qu'chol pért ed chu chéf al étoait gramint pus conséquant .

Mais si is n'awoait't quazimint rin péqués , ch'l étchipage i dvoait rimborser ch' l armateur in frais ingagés . Ha foait qui n'restoait pus qu'a chés marins qu'leu ziux pour braire !

I n'awoait't mie pus qu'chol Gainée pou leu continter . Ech mot la i vient ed "gaine" . Chés militaires quante is étoait't incorporés on leu bailloait in so* profond pour aherder* leu acrinquillage . Adon chés marins is pértoait't à cho'm mér avuc un so conme o , pi quante is awoait't fini d'péquer is pouvoait't tchitter ch'batieu avu sitant d'pichon qu'is pouvoait't intiquer din leu so (ch'étoait la gaine) . Quiques énées pus térd pour coeuse ed trafiquerie paralelles qui n'faisoait mie d'bien à chés patrons d'péque , du coeup chol gainée al o té modifiée pér inn line in ramindo* su chés feules ed poaye .



La Gainée = Barquette de poisson blanc ; légumes , 1 verre de vin blanc , et une tranche de pain

*Croates = cravates

*So = sac

* Aherder = porter

* Line in ramindo = Ligne supplémentaire

 

A laincher in l'air , ha t'értchait su t'gamelle

O ti du sins tout cho, chés laincheus d'toque pér aprés leu z'éxamins d'fin d'énnées is sroait't ti dévnus tertous totchés ! Ed quoé qui n-nin r'torne dé ch't histoére lo .

Fidjurez vos qu'mon chés Inglés cho't tradition ed laincher s'toque din ch'temps* eune foés qué ch'l éxamin i est fini , al o été bouté a l'ouste*( Tradition qu'al vient du début d'chés Améritchains) . A coeuse ? qu'os vos disez surmint . I sanne à vir eq cho't toque in r'tchaisant al éroait affolée sécants jonnes nivlets pi occasion.née d'z affolures coér conséquants assez !

Ch'est des jonnes qu'is minqu'té poin d'gingin ; mais qu'is froait'té miu d'porter dés leunettes



* Ch'temps = le ciel

*A l'ouste = dehors

 

Chés tiques attaqu'te !

Os savez ti quoé qu'a n-n est qu'cho'm maladie d'LYME ? On l-l'attrape el pus souvint din chés bos , chés foérets . Ej voés qu'os avez vo z'ésprits un molé truté* pi qu'os vos disez " lime , lime .....Ha doét s'attraper amon ch'bos d' Boulogne ? ... Poin seulmint , pi in plus on dit Lyme !

Marchez ... feut mie rire avoék cho , ch'est qu'on put nin moérir ed cho's saloprie lo ; ha vos foait d'z angouches du diabe , a trute vo nérfs , pi d'lo à finir cleué din un cadot à reule* i n'y o mie loin !

Ch'est à ch'boin témps pi ch'est bieux jours qu'is s'erdéssaqu'té chés bétails la , is s'much'té din chés fourrés , pi drés qu'is peut'té seuter d'sur un tchien ou a msure in.ne gin ; is intiqu'té leu reustre (eq ch'est éne sorte ed trompe) pi ha vos suche vo sang . Si os vos avez foait pitcher , feut bien détiquer ch'bétail maoués avuc in.ne pinche . N'y o bien un moéyen pou n'poin s'fouére attaquer , feut qu'os mércheche* in heuteur à pus d'un méte chinquante dé ch'sol ! Oué ; du chuque ! Écmint qu'os froéte pour mércher à quasi deux méte dé heut ? A moinss qu'os sroéte éne "draqueen" sin cha j'voés poin !

Soin à vouzote , si os allez ranser in foéret s'wouiquéne ; r'luquer vous bien in vos déloquetant . J'vos dminde poin d'avoér dés TOC , mais avu chés TIQUES on n'sait janmoés ; poin vrai !


*Trutè = Tournè dans la mauvais sens

*Mércheche = Vient du verbe marcher

 

Ch'darin conte ed Jean Marie François

http://france3-regions.francetvinfo.fr/picardie/emissions/picardie-matin/une-histoire-de-picard-sante-cecile-patronne-des-musiciens.html

Chés méres sont pus a l'fête avu leu cadeaux

Ouéche qu'i l'est ch'témps equ'pou chol fête dés méres chés nazus is offroait't un coïer d'nouilles , obien inn tirelire foaite in plate in forme ed pérrotchet , nénéfant , o d'z eutes bétals obien tout simplémint inn rime*

Nan , in plache ed cha ch'est pérints asteure is sont pér dvant leu manicraque* et is s'écang'te sécants fotos d'idées d'présints* ; nin vlo eune coupe béyez cha vaut 10 !

Éne bracelet XXXXL ahensé din chés classes .(A coeuse qu'is l'foait't si graind ?) ...Obien coér inn bidon d'gasoil eq ch'est fort utile in ch'momint ( mais feut coér awoér el droét d'rimplir ses bidons ) ....D'z autchuns is proposoait't ed laissier chol leunette ed chés waters prope el long du jour ! O d'z eutes qu'is prométtoait't ed ruchir* leu BAC .

Adon , os érez r'mertché qu'chés gins is n'minqu'té poin d'gingin . Mais mi j'éroais yeu tchére d'intinne : M'man , mi pi m'soeur on s'a cottérisé* pou t'offrir chu réstaurant ...obien , M'man cho's smaingne tchi vient ch'est qué j'passe el chuche porettes* conme o té pourros t'rapurer un molé !

Au liu d'cha os ons dés présints d'imbléyeux ! M'afin , ch'est pététe min coté romintique ; quoé qu'os voulez on s'érfoait mie !! Népoint !?


*Rime = poéme

*Présints = Cadeaux

*Ruchir = Réussir

* Cottériser = cottiser

* Chuche porettes = Aspirateur

 

frayeur su la " French riviéra"

Pér aprés avoér yeu chés gindarmes à St Tropez ; asteure os ons chés militaires à Antibes !

Maginez un moléqu'os éte aplontché din un cadot à rallonge* fin biénaise in train d'chucher un "koketail" avu vou camarate edvant un d'chés grainds hôtels dé ch'Cap d'Antibes , chés palaces conme is dit't la bos . Pi qu'tout d'un coup sains crier garde éne hord-é d'seuvage is z'accost't su ch'ponton afistolés* in militaires aveuc des bérboéres* seu leu trogne . Tertous chés gins alintour épaveudés à mort , qu'is foayt'té conme des rots ; pinsez avu tout ch'qui s'passe in ch'momint , n'y o d'quoé n-n avoér éne frousse du diape .

Finalmint poin d'térrorisse in vue , oz o su pér aprés qu'tout cho ch'étoait des blétes , du chiqué.ye* , du cinéma; mais in plein miyu dé ch'Féstival ed Cannes ha foait désorde . Ch'étoait jusse eune binde d'halbrans qu'is tornoait't eune publicité sains l'avis d'chés autorités ! Ed tout sin* cho'm mascaradelo al vo leu couter tchér ! Sains compter qu'is éroait't pu s'fouére treuer leu paillasse pér ech service ed sétchurité ,a vouloér rodayer la d'ou qu'is n'feut poin !

COPEZ !! Ch'est fini ....Sié !! É - i-nie ... Pi qu'éj vos l'dit !

　

* Un cadot à rallonge = Transat

*Affistolés = Habillés d'une drole de façon

* Berboére = Masque

* Des blétes , du chiqué.ye = Du faux

* Ed tout sin = De toute façon

 

Mélinge ed couleurs...

Raciste ,obien mie raciste !... Cmint qu'os in sonme arrivés lo ? Tout cho pour eune publicité su chol léssive ! Chu fabriquant d'produits a néttier chés habillures in.ne Chinoés d'Shangaï , Leishang Cosmétics , i'so foait atchuser d'racisse pér aprés awoér foait passer un jonne honme noér din eune laveuse* , pour qu'i s'in r'dessaque éd'la d-din sous lés traits d'én Asiatique ! Vraimin , a ti du sins tout cho ! is n'éroait't poin pousser ch'bouchon (d'léssive) un molé d'trop loin

Tours* est ti , vu ch'l éscandale qué ch'l affoaire al prindoait din chés jornal , pi ch'l arnitoéle ! Pi surtout, el désagrémint occasion.né à chés Afritchains . El Chinoés i l'o bouté cho'p PUB à l'ouste* , pi i s'o éstchusé tout moneux ; in manguon.nant qu'asteure is lavroait'té leu linche sale in famille !!
(Os pouvez r'béyer cho'v vidéo in dsous d'chés aspliques)

*Laveuse = Machine à laver

*Tours = Toujours

*L ouste = Dehors

http://dai.ly/x4d021d