Ch'darin ed 2016

　

Bon; os i sonme tarte a prone !!!! Voila ch'est ch' darin billet d'l énnée 2016 . Bah , cha n'est poin qué j'sus mate d'écrire un Picard coér eune coupe ed jours ; os vous berlurez . D'autchun d'intre vous qu'is m'connoait'te , is sait'te eq quante ej parte in vagances o bien in wouiquéne à Merlimont qué j'én peux mie prinde min manicraque pisque din cho'm moaison os n'avons poin d'wouifi !

Pi j'én mé sint poin d'appler SFR pou leu dminder si l'éziste inne saquoé pour povoér glicher su le net pindant inne tchoté smaingne ! Ha ti du sén ??! Mi j'ém dit qu'i feut " Laisser faire" Notez bin qu'ch'est un jus d'mot qu'os povez foute à l'ouste si qu'os éte abon.né mon Orange !Ti poin vrai !

Pindant més vagances j'vais fouére dés cramiques a corinthes ou a ch'chuques pérlés ! Edpis qu'j ai quitté Nice j'ai arté d'in fouére ! Ben forchémint din chés heuts , on in vind ! L'éroait fallu qu'ej seuche puss qu"el mitan d'un braque pou nn'in fouére !! M'infin , ch'est l'paiji ed fouére li minme !

　

Adé més gins , bouéne fêtes ed fin d'énnee a tartous , rindez vous in 2017 si diu i l'vut bien !

Pi conme diroait lafleur : Bien boére , bien maquer , pi surtout né rien fouére !!!!!!!

Éq diu t'prothése !

Ej l ai vu pi j'm ai dit " Oh qu'i l'est bélot " Os devez vos dminder ed tchiéche qué j'vux bien pérler , point* ?? Ben ; d'un kangourou !

Ch'est cho qu'al o dit inne fenme à s'copine quante al o vu un kangourou in foaisant do'b bicyclette .... Oué d'accord i l'est pététe fin rétu* ch'bétal la mais feut vir s'qué ch'marsupi li à mis (Humm) !! Sains crier garde d'un ébondi du diabe ech bétal i l'o seuté d'sur eune dés deux fenmes et i s'a sérvi dé s'panche pour érprinde és n' élan et r'pértir .

Maginez un molé l'massac : Troés cotes ed bérzillées ; és pieu.ye houlée* d'égratignures ; pi surtout chés implants d'sa mére ...euh scusez j'vouloais dire chés implants mammaires rompus . El puss pire ch'est qu'chu silicone i continue d'durchir ; cha dvient doreux * , probabe eq din quiques jours a dvro passer su ch'billard .

Pi s'copine qu'os vous disez seurmint ? Ben elle , al o yeu sin cerveau d'éscoué , ed déplaché din s'boéte ed sin crâne* . Marchez* , conme és n'honme i l est coér un molé farce , in s'n allant i rinde visite à l'hosto i y-o baillé un kangourou avoék dés gants d'bosc .!

　

*Point = Pas vrai ?

Rétu = Mignon

Houlée = Remplie

Doreux = Sensible , douloureux

*Déplaché din..... = Commotion cérébral

*Marchez = Ne vous en faites pas

un boin coup amon ch'cabartier

Pour chétlo qu'is cminch't d'éte myope conme inne taupe , os pouvez buquer su ch'l imache pou miux l'lire !  Adé ez zéf

Dés piches-trottoérs

　

Quoé qu'cha nn'est qu'cho qu'os vos disez seurmint ?! Ch'est d'z urinoérs qu'is r'sanne'te à dés bacs à fleurs . Ecmint qu'a marche ? Conme dés toélettes séc . Din ch'o pértie in bos* dé ch'bac n'y o un touillache ed frouetes ed bos * , do'f feure* , pi d'copeaux qu'i vienne'té prinne* cho'p pichate .

N'y o minme un molé d'aléctronic la d'din , pisque grace à chés capteurs n'y o inne gin qu'i sait quanjou* qu'i feut érnouveler ch'mélinge ed feure . Un mélinge qu'i dvaro composs' pi qu'i sro utilisé pour chés jardiniéres qu'is s'treuve'té autsu d'chés urinoérs .

Grace à chés piches-trottoérs ...adé chés flairinés* d'pichate din chés rues ....M'infin ch'est poin mi qu'i l'dit .

　

*In bos = En bas

*Frouette ed bos = Sciure

*Feure = Paille

*Prinne = Ici utilisé dans le sens d'absorber

*Quanjou = Quand est ce

*Flairinés = Mauvaises odeurs

 

Bouque a bouque à un tchien

Maginez un appartemint in flanme , dés flanmes à des heuteurs du diape ! Chés honmes du fu* qu'is s'rabzine'te à toute barzingue siréne gueulante . Is rint'té din ch'l appartemint atandis ch'témps la , leu collégues conme in dit , is inséye'té d'éteinde ech fu mawoés* .
Chés pompiers qu'is sont d'din euss, is seuve'te inne gin ed chinquante ans d'age . Au momint d'décaniller * Mugurel Costache un jone éd pompier i l'apercheut un tchien coutché ; i n'réspire pus , impoéson.né qu'i l'est pér cho'f funquée .

Austôt * i li foait du bouque à bouque pi inne massage cardiac , et quéque témps pér aprés ch'tchien i s'déhale * ed'pus belle .

Vlo inne histoére qu'al finie bien , aprés cho j'croés qu'on peut r'tirer l'équelle (ed pompier bien seur) .

　

*Chés honmes du fu = Pompiers

*Mawoés = Mauvais , méchant

*Décaniller = Partir

*Austôt = Aussitôt

*S'déhaler = Marcher péniblement

 

Ouéche éq j 'habite !

A mi cha n'm a janmoés arrivé dé n'pus ramintuver* adou qu'j habite , o bien d'ou qu'j ai pérqué m'n auto ...Adon j'pouroais quair d'sur quéqu'un qu'i l'est un molé zazamér* , o bien a mitan braque pi qu'i n'saiche pus r'treuver s'moaison . Ej srais fin contint d'tomber su dés gins qu'is pouroait't leu bailler un molé d'ayude pour értreuver leu logis !

Amon chés Japon.nés tout prés d'Tokyo is foait't inne éspériénche , is ont invintion.néye dés titchots plaque-tout seu* avoék un "code barres" qu'on plaque su chés ongues ed la main.ye o bien d'sur un caqueuw avoék un liméro d'idintité ( Nom , tchot nom , sésque, adréche ... tanq'é pi coér !

In puss chés pastiles* minme fraiques is peut'té coér réster plaquer pindant 2 smaingnes ...Ti poin bieu.ye !

*Ramintuver = se souvenir

*Zazamér = Alzheimer

*Plaque-tout seu = Autocollant

*Pastiles = ici désigne le code barres

 

Football mon ch'cabartier !

Pour miux l'lire buquez su ch'l imache ! sains vous cmindez bien seur ! adé  ez zéf

Aréo- "PORC"

A sroait ti inne pécavie dé ch'nouvieu pérsidént Améritchain pour bouter hors ed sin poéys eune çartaine race ed chés gins ?? Nan heureusmint , ch'est l'aréoport ed San Francisco qu'i l'o yeu l'idée ed fouér vénir un coéchon , inne truie pour rapurer un molé chés pratiques qu'is n'sont poin si trape* quante is sont din ch'témps* .

Du coup chés gins is vont s'assir a coté dé ch'bétal et is s'mét'te à ll'afflater ; i sanne à vir qué d'fouére quéques fla-flateries à inne truie cha froait pértir chés frayeurs ed chés gins

Pi pour éte seur dé n'poin l'louper et au cas qu'os sroéte miope conme inne taupe , is ont atifés* ch'bétal d'inne lévite* bleusse avoék mérqué d'sur " PET-ME " Mi qu'i n'bérdéle poin un mot d'Inglés , si j'voés eune plancarte* conme cho ; j'ém dit qu'a n'est mie 'tonant qu'i y-euche dés drole éd sintimints din ch'l aréoport !!

　

*Poin si trape : Ne pas être si trape = Ne pas être si fier , ne pas faire son malin

*Ch'témps = ici employé pour désigner le ciel

* L'afflater = Le caresser

*Atifer = Habiller

*Lévite = Veste

*Plancarte = Pancarte

 

Os avons pardu no tchien

Qué décarsure m'z amis , én baillez* janmoés du KROÉKWI à mier a vou tchien i nn'in crévroait . Ch'est cho qu'i s'a passé pour nouzote .

Ch'est min fiu d'douze ans d'age qu'i s'én otchupoait , i l'sortoait , i li don.noait à mier* ; nous deux m'fenme os n'avoéme mie l'témps dé s'n otchuper avoék not' travaille al fabrique , pi ch'tripot a l'baraque ....bref i nn'o su l'pont conme in dit !

Mais os éroéme quaind minme du nos déméfier , cho qu'i m'o mis el puche à l'oréle ch'est quante ech véto i m'o déclaqué : Vo tchien i l'est mort ed faim.ye !! Os éte seur éq j'i r'torne ? pachque min fiu in m'o dit eq tous lés jours i li don.noait du KROÉKWI ! Quoé qu'cha nn'est qu'cho qu'i m'rinfique ech véto à mitan ébeubi ? J'sais ti mi ; cha doét éte dés croquettes !?

Au vrépe , a peine éq sin fiu i l'euche yeu l'témps ed poser s'carnasse din ch'racoin dé l'tchuisine , éq sin pére i li dminde : Parle don* un molé fiu , i sanne a vir eq nou tchien i sroait mort ed faim.ye ? Té m'o bien dit qu'té li don.noait a mier tous lés jours ?

Et lo ch'galibier i r'guette sin pére un molé étombi et i li déclaque : EJ CROÉS QU'OUI !!!

　

*Bailler = Donner

*Mier = Manger

*Parle don = Parle moi

 

El live oblié

Conme diroait cho'g guérnoule , veut miux tétard qué janmoés !!

A cho'b bibiotéque ed North Walsham din l'EST ed l Ingleterre , is ont vu s'abouler inne fenme pour rinde un live ...normal qu'os vous disez piq'ch'est eune bibiotéque . Stapindant* cho'f fenme al éroait djo du l'rinde d'pus ...63 ans .

Alors mi j'ai pinsé à 2 coses :

Seuche qué ch'live i dvoait avoér au moinss quate à chinq chint mille paches

O bien alorss oz nous o raconté dés bléttes* su ch'tite dé ch'live : " Voyage avec un âne dans les Cevénnes " M'oué !! A vir cho'v vitéche avoék el tchél cho'l léctrice al o li* ch'live ; ej diroait putôt qué ch'tite ch'est : Voéyache avoék un calimuchon din lés Cevénnes !

Ed tout sin, heurésmint por elle qu'amon chés Inglés on n'mét poin d'ameinde pour chés r'terds*

　

*Stapindant = Cependant

*Bléttes = Des histoires

*Li = Lu

*Chés r"térds = Les retards

 

Cirtchulation alternée !

Pizza-renne

Nan mais ch'est dés rutes agozils os savez . Biétôt qu'is mettroait'té cho su l'dos d'chés bétals !...Cha mérite un molé d'asplique

Amon chés ziux bridés* cho'f fabrique ed pizzas Domino's is leu z'ont prins inne lubrie* ed fouére livrer chés pizzas pér dés rennes; mais ch'projet i l'o été aboli , a coeuse eq chés bétals is sont d'trop arvleux* ; trop épinés , " difficile à controler" qu'is dit'té din cho'g gazette .

Ma pinse* ! quoé qu'is croéyoait't ? Eq ch'étoait conme un bidet , bien édutché, bien dréssé , fin amiteux ; oué des prones! Os éroét't vu ch'l éssai qu'is ont foait ; Ha rien l'tableau ; chés livreux is ont r'treuvé cho'p pizza écrabouillé.ye din cho'b boéte . ! On n'foait poin tours s'qu on vut avoék chés bétals , pi ch'est ta miux !!

　

*Ziux bridés = ici des japonais

*Lubrie = Lubie

*Arvleux = Nerveux

*Ma pinse = A mon idée

 

Glicher su la mér

Y-o dés "suchis" à s'fouére ! Nan , mi tout i vo pour lé miux , j 'n ai mie d'problémes ! Ch'est ch'parc d'attraction Japon.nés qu'i vo n'n avoér .

Os nn'avez ti intindu dviser eq chés Japon.nés is glichoait'té d'sur dés pichons congelé.yes !? 5000 pichons prins din chés glaches , minme si chés pichons is étoait'té occis* , cho ti du sin tout cho ? Ech' chéf ed chjo'p patinoére i l'éroait dit : Os vouloéme eq chés pratiques* is connoaich'té l'sinsation ed glicher su la mér ! Nan mais ; On voéro d'toute !

Bin atombé qu'l achuchon* ...FINDUS ed défénse ed chés bétals congelés al o sui* ch'dossier pi qu'al o réussi a fouére freumer cho'g glichoére* qu'a dvoait seurmint éte sponsorisé pér chés magasins PICARD !!! Ben quoé ? chés pichons congelé.yes , ch'est poin cha ? Hein !

　

Occis = Morts

*Pratiques = Clients

*L'achuchon = L'association

*Sui = Suivie

*Glichoére = Patinoire

　

Chés quérpions roulants

D'trop d'carettes , trop d'carettes din chés villes ! Est vrai qu'est tenant* ed cirtchuler din dés cintré-ville baqués à foait* . Cha cminchoait à épiner chés Suisses , qu'is n'n étoait't érmonter conme inne pindule (poin éton.nant pour dés Suisses) ...

Tours* est ti qu'chés blouses blanques (tojours eux) is ont invintion.néye dés trotoérs roulant , conme din chés éstations d'métros , o bien chés grands magasins . Pour seur qu'a 15 KM/H , os n'attraperez poin inne chifarnure* . Ta miux ; éch'trotoér roulant i pourro querquer 7000 gins pér heure . Tout cho est fin bien ;, cha péroait cologique* , mais soin , a coute sitant quére à construire qu'eune line ed tram' ...Bernique !

　

*Tenant = Fatigant

*Baqués à foait = Utilisé ici dans le sens de saturés

*Tours = Toujours

*Chifarnure = Rhume

 

Chatchun St NICOLAS

Edpis inne ésmaingne on pérle granmint ed Nicolas ...Minme si i sanne à vir qué chtilo os nn'in pérlerons ed moins in moins ! In-nhui on pérle coér ed Nicolas , mais li ch'est un Saint qu'i baille dés chucolats à chés margats .

 Ej su t'aller triner mes guettes mon ch'cabartier pour értreuver no 2 bibron.neux ; pasqué eux pour seur qu'is ont puss quére dé s'présinter au BAR putôt qu'a chés présidintiels !!

Os y éte dui (habitué) asteure , si qu'os n'arrivez poin à l'lire , seuche qu'os r'prindez un dmi , o bien os buquez su ch'l imache !! (PDMM) ... Bouéne St Nicolas a chés tchotins , chés nazus , chés nivlets , chés margats , chés moucrons , chés papars , chés tchiars à tchulottes !  bréf ; tous chés fius quoé !

Os avons poin d'pétrole mais...

...Mais os ons chés BARYL ! Hé hé hé .. Ch'est qu'a la SNCF is n'minqu'té poin d'gingin* . Si qu'os n'allez poin à cho'p poubelle , ch'est cho'p poubelle qu'al vara* à vous . Pou ceux qu'is voéyage'te un molé pi qu'is s'rind'té souvint à " la gare de Lyon" à Paris ; ayez soin dé n'poin vous inchper din ch'robot poubelle qu'i ranse din ch'l éstation* du chinq au dix déchimbe .

Ech baryl qu'i ll'on délonmé , i roule tout seu pi i vous mile pour vir si qu'os avez inne saquoé* à jejter din s'gueule , ch'est ti poin bieu.ye ! Bé, ch'est poin toute , ch'est qu'i l'est poli avoék cho ; si qu'os l'saluéche , i vos l'rinfiquero !

　

*Gingin = d'imagination

*Vara = viendra

*L'éstation = La gare

*Inne saquoé = Quelque chose

Du nouvieu din chés grands magasins

　
Attation , du nouvieu ch'est vite dit pisqu'oz i vind du viux ! 20 couronnes qu'al dit cho'p pratique* !! Bé , n' vous berlurez poin a n'sort poin mon ch'l aracheux d-dints !

Nan , 20 couronnes , ch'est l'prix d'inne boéne boutéle d'heule d'olive " haut de gamme" . Cha foait (2€70 ) . Pour chétlo qu'i n'éroait mie tout comprins , chés couronnes ch'est cho'm monnaie d'éch Danemarck .

Pi la bos , n'y o un grand magasin qu'i o ouvert , pi d-din is vind'té foque*chés invindus ! Chés produits qu'cho'd date al est finite ; o bien coér qu'éch l imbale* i l'est d'trop ésquinté . Pi tous chés profits is vont a inne achuchon*caritatve .

　

*Pratique = Client

Foque = Seulement

*L'imbale = l'emballage

 

Un diminche mon ch'cabartier

Pou chés viux qu'is cminch'té d'avoér leu vue qu'i bache , os povez buquer su ch'l imache  !  PDMM  ....( PDMM pou chétlo qu'is n'él sait'té poin cha vut dire : piche din mes maron.nes ; ch'est le LOL al mote Picard)  Adé et boin diminche a tartous

Chés sinches à leunettes

Os savons tartous qu'éch chimpanzé , pi chés bonobos is sont chés pus proche cousin.yes d'éch l honme . Chés blouses blanques * d'éch l université ed Kyoto is ont démuché qu'chés sinches is pouvoait't tout conme nouzote avoér do'p présbytie .

Chés sciéntifiques is ont rmerqué eq chés pus viux bonobos quand qu'is foait't cho't toélette à lés z'eutes sinches , qu'is étoait't obligés ed s'értchuler pour miux vir chés puches , et tous lés z'eutes bétal ed parasites .

M'afin , ed la à leu fouére métte dés leunettes , os i sonme poin coér ...Ch'est poin à chés viux sinches qu'oz apprind à fouére dés grignées *

　

*Blouse blanque =Chercheur

*Grignée = Grimace

 

Z'z hérins d'no côte

Ch'est coér el momint proufitons nn'in ! On peut l'tchuisiner ed granmint d'méniére : Mariné au vinaigue , o bien in pilchard (aveuc do's seuce tomate) ..

Mi j'ai quére quante ch'est feumée , qu'a seuche in sorét (hérin sor) , boufie (édmi feumée in intier) ; kipper ( ouvert , vuidier, dédoublé et feumé) gendarme (salé et feumé in intier)

Oz o inne quérque d'éspressions aveuc chés hérins , nin vlo éne coupe :

El plus connut' : Chacun sin pain et s'n hérin

- Ojourd'hui sab' édmain hérin ( Aujourd'hui on raméne du sable , demain du hareng)

- Prie pour ti ch'est d'l hérin plein ( tu me raconte des histoires à ta maniére)

- I l'a l'bouke ouverte conme un hérin prins par lés ouies ( se dit de celui qui a toujours la bouche ouverte conme un hareng pris par les ouies)

- Icomminche à vir ed'z hérins sors amatays(accrochés) el long dés ridiaws (se dit de l'ivrogne qui délire )

-T'es conme léz hérins ét'gueule artiraye i résse pus rin ( se dit à celui qui est fort en gueule)

- Sérrays conme éd'z hérins in cake ( sérrés comme des harengs en baril)

J'ai démuché chés éspressions din min live "le patois de la côte" de J-P Dickés

N y-o conme un malintindu

L'eute coup j'étoais à ch'comptoér in route à siroter min nmi ; quanq'éj voés s'abouler 2 louloutes un molé épinées* . I coésit't inne tabe din ch'fin fond d'cho's salle , probabe qu'is n'volouéte poin t'éte déturbées* . Eune dés 2 pouillettes à s'radine a chu zinc ; pi al s'égosille :

- Euh ...sains vous cminder ; os éroéte ti inne seize ??

-Ch'cabartier : Sié , avoék granmint d'mousse ?

- Nan , j'vux inne seize !

Oué , inne biére , j'avoais comprins !

Nan inne seize ...inne seize pour s'assir , éne cayelle siqu'os ainmez miux . Ch'est mie d'ém feute siq j'ai un caveux su m'langue , crénon dés z'os !!!

*Epiner = Agacer
*Deturber =Deranger

Lés bonnets du tchoeur

　

Quoé qu'on peut bien fouére ed sés 10 doégts din inne moaison d'értraite? O peut juer à cartes , on peut danser , fouére dés gatieu.ye à mzure* .

Hormis qu'la cho'm moaison d'értraite al o dmindé à chés pinsion.naires si qu'is vourroéte bien tricoter pour bailler* dés bonnets in laines fin rétus pou chés papars qu'is sont nés dvant* .

Dautchuns is ont dit non , piq'is n'sait'té poin tricoter . Hormis ED Hoseley 86 énnées ; li conme i n'sait mie tricoter étou , i l'o dmindé à s'file ed li acater ch'live : Ech tricot pour chés malapattes*

In-nhui i coeud * un bonnet in 1h30 et i nn'o djo coeusu pu d'chinquante chinq

　

*A mzure = Parfois

*Bailler = donner

*Nés dvant = Prématurés

*Malapatte = Maladroit

　

Oz on voté din l'éspace

Edpis cho'l loé* adoptée a Texas in 1997 , chés Améritchains qu'is sont din l'éspace is ont l'droét d'voté . Rasseurez vous is n'sont mie din un racoin d'chol station internation.nale avu leu tchot billet qu'is intiqu'té din ch'l inveloppe pi qu'is garot'té pér chu tchot cassis* .
Nan, a n'marche poin ainsin . Por povoér voter chés astronautes is doév'té cmincher leu démarches én énnée dvant ch'décollache , in coésissant chés scrutins qu'is souhait'té participer quante is sront tout la heut din chés étoéles !

Ahhh chés ricains is ont l'séns du spéctake !!

　

*Loé = Loi

*Cassis = Petit carreau

 

Do'p pieu d'soéris

Pér aprés avoér acaté s'casaque , pi ll'avoér mis pou l'premier coeup ; in.ne Nouillorkése ed 24 ans d'age al o démuché din cho'd doublure éne soéris* quérvée .

N'y avoait dés flairs * du diabe ; pi aprés j'ai apercheut in.ne patte qu'a s'déssaquoait d'cho d' doublure , qu'al o dit din chu jornal .

Un maintieu.ye in pieu d'soéris , os m'avourez qu'a n' court poin chés rues , minme chés camps ...On'in trouvarez maison " ZA-RAT "

　

*Soéris = souris

*Flair = Odeur désagréable

*Un maintieu.ye = Un manteau

 

Té veux o bien té veux poin

Os étoéme portant poin ch'preume d'avri . Quoé qu'i o bien pu s'passer pour qu'chés 2 tourtereaux is n'vienn'té poin a l'mairrie el jour ed leu mariache.

Ech' maire i n'n est résté conme 2 ronds d'flan , avuc chés 5 témoins qu'is sont r'pértis avoék éch'qu'is ont d'prones ed cueillés .

Ed tout lés façons qu'i déclaque ech maire à chés témoins : ch't aladon qu'au soér a ch'poste ed télé is pass'te él " silénche dés anneaux " Os porrez l'erbeyer os n'erez poin tout perdu !!

 

Si qu'os éte mort , os n'vivez poin !

Maginez un molé qu'os ouvrez vo manicraque* , pi qu'os allez su face ed madjette* conme d'habitute , pi lo in plache éd lire vo nom pi chétlo d'vou z'amis , cha sroait mérqué DEFUNCTÉ !! Sié ! Freume ét bouke tin nez i vo quair éd din !

Os nin définiroéte poin d'grouler* , d'vos délaminter , os iroéte minme seurmint dusqu'a appeler éne ami ( sains dminder l'permission a J-P Foucaut ) pour savoér si qu'os n'reuvez poin . Marche ... asseuré qu'os n'éte poin à ch'camp dés allongés j'él sais bien vous étou . Ch'est " Facebook" qu'i s'a blousé* , i l'o signalé eq pus d'deux millions d'gins is avoait'té cassé leu pipe ! Ma pinse ! Ech groupe Améritchain i s'a estchusé rondébilis* d'eune "terrible erreur " conme is dit'té si bien

　

*Manicraque = Ordinateur

*Face ed madjette = Facebook

*Grouler = Bouder

*S'Blouser = Se tromper , s'embrouiller

*Rondébilis = Vite fait

 

Ech sapin " i l-l' a belle "

 
El bieuté pi l'fraicheur is vous sront garainties ! Os pinsez pététe qu'éj vos pérle ed cho'p pourdin.ne * o bien dé ch'darin fromache à la mode pou chés fêtes ; poin du toute ; ej vous cause ed chés sapins d'Noé , qu'asteure os porrez nn'acater in Label rouge .

Quoé qu'is éront d'puss qu'éz-z eutes ? I doét avoér in.ne bieuté supérieure , bien dru , in forme conique , pi in.ne fléque* qu'a n'foaiche poin in.ne longueur du diabe .

Si qu'os n'in volez un , n'trainez poin i nn'éro poin pour tertous , foque éne flopée d'gardineries is sront approvisionné.ye ch't énnée chi .

　

*Pourdin.ne = Dinde

*Fléque = Flêche

 

Un phare " in T " cha fou la frousse

Oué , bon os m'avourez qu'min jus d'mot i l'est un molé casvel* . Ech phare ed Calais i n'est poin plus in T qu'in B o bien in Z .

I l'est lo qu'i s'care * fier conme un tchot banc .... Stapindant , i sanne a lire din chol gazette éd hier qu'éch phare ed Calais i sroait "hanté " France 3 i l'o pubiyé diminche eune liste ed chés 15 moaisons hantées ed nou région , et ch'phare ed Calais i l'est classé 4ém . Edpis 2007 chés meinbes ed l'achuchon* Opale tour is dit't avoér érsintu granmint d'foés el présinche d'un fanton.me ; dés wignemints , dés craquemints , éd'z ombes ; dés voéles blancs ; conme cho'd dame blanque , qu'i nn'o qu'is dit't avoér vu su chés routes al brune* ( mi , hormis a ch'réstaurant au momint du déssert , sin cha j'ai janmoés vu d'dame blanque ) .

Alorss , si os n'trannez* poin coér din vo maron.ne ; viendez fouére in.ne vérlée à ch'phare éd Calais .

　

*Casvel = Fragile (employé ici dans le sens de difficile à comprendre)

* Se carer = se dresser fièrement

*Achuchon = Association

*Al brune = Le soir

*Tranner = Trembler

　

N'foait poin tés dvoérs min fiu !

Diu dé diu , éq j'éroais yeu quére d'avoér dés pérints* conme cho . Ém mére qu'al méroait dit : Freume tin live éd jographie min fiu , rainge lés din t'carnasse* pi vo t'in t'éjuer déhors avoék tés copains .

Nan, ch'est du réve , j'n ai mie yeu l'droét à un jus parél ...Falloait fouére sés dvoérs , vous étou probabe ? ! On n'povoait poin i-récaper

Tout du contraire ; amon chés castagnéttes* chés pérints is n'veut'té poin qu'leu z'éfants is foaich'té leu dvoérs . A coeuse don ? Ben , is dit't éq cha gache el vie d'leu gamain.ye , pi qu'a n'améne wére* puss ed résultat . Ej vous donne chol phrase in Français pisqu'i n'y o sécants mots qu'is n'sont poin aisiés d'értraduire in Picard :: " Les devoirs sont préjudiciables car ils empêchent le developpement complet des enfants au dela de l'acquisition de connaissances purement académiques ! "

Vintchousse ! Ej croés qu'aprés cho on peut r'tirer l'équelle ! Adé

　

*pérints = Parents

*Carnasse = Cartable

*Castagnettes = Les Espagnols

*Wère = Guère , peu

Carcules mon ch'cabartier

Buquez su ch'l imache , cha sro pus aisié dé l'lire !

Un serpént din l'aréoplane

A n'est mie pachqu'os éte in premiére classe qu'os éte garanti d'toute .

D'autchuns* passagers d'un vol Méxicains " Aéroméxico " is ont été surprins d'vir un serpént din ch'compartimint à bagaches . Bin atombé qué ch'bétail i n'étoait poin vrimeux *; i s'a laissié quair su chés cadots ! Heureusmint chés passagers is nn'ont vnus à bout in l'péquant avoék eune couverte* !

J'ai idée qu' TRUMP i l'o déjo ahansé* sin mur al frontiére avu ch'Méxique ; du coup minme chés serpénts pour passer mon chés ricains is s'camuch'té din chés aréos !

　

*D'autchuns = certains

*Vrimeux = venimeux

*Couverte = Couverture

*Ahansé = Construit , bâti

 

Un "HAMBUTELLA" sains vos cminder !

　

Én busez* poin d'trop din vo cawoéte * , os n'trovarez poin . Forchémint , ha n'éziste poin in France , pou l'momint . Ed quoé qu'i nn'in rtorne :

Un preume , un hambutella ch'est mi minme qu'i l'o invintioné.ye , si qu'os voulez ch'est un touillache * inter un hamburger pi du nutella . Os savez cho'p pate à tértiner qu'a n'foait mie dégrossir* chés gins .

Amon chés Ritals Mc DO i s'a achuchon.né* aveuc Ferrero pour fouére un burger au "nutella" qu'is ont délonmé sweety . Tours* est ti qu'si vos prins l'pécavie d'vouloér n'in maquer éne , i vous feuro passer lés Alpes , pachque si in Italie NUTELLA , in France " NUT' EST PAS LA" ... Oué bon...amarons la pour in-nhui !!

　

*Buser = Penser

*Cawoéte = Tête

*Touillache = mélange

*Dégrossir = Maigrir

*S'achuchon.ner = S'associer

*Tours = Toujours

 

Minme à ch'camp dés allongés , feut raquer !

I nn'o d'autchuns * qu'is ont djo foait batir leu résidinche ésgondaire , mais qu'a dvaro* leu résidinche principale eune foés défuncté .Conme ti pi mi quoé ...( El pus térd possibe ). Pi quante os srez à ch'camp d'soéle* , én croéyez poin qu'os nn'érez défini aveuc vo taxe fonciére ; DU CHUQUE oué ! Feuro coér qu'os raquéche *

Pour preufe , el mairie d'Sarzeau , al o rcheut un courrier ed chés impots qu'i étoait adréché à in.ne morte !! Avoék éch l'implachmint éxac' ed chol sépulture à chol chinmetiére .

I sanne à vir d'aprés ch'trésoriér poéyeur du Morbihan , eq cha sroait l'un d'chés suivants* qu'i l'éroait foait in.ne niche * , à coeuse qu'i n'étoait mie décidé d'poéyer cho't taxe fonciére ... Vraimint lés gins j'vous jure , i nn'o dés droles hein !!

　

*D'autchuns = Certains

*Dvaro = Deviendra

*Raquéche = Vient de raquer : payer

*ch'camp d'soéle = Camp de seigle : cimetiére ( local)

*Suivant = Heritier

*In.ne niche = Une farce

 

El cangemint ch'est asteure

Qu'is dit'té chés jueux d'musik dé ch'groupe ed Rock " TRUMPS" ahansé* in 2014 .
Hormis qu'in-nhui Trump Donald i l'o été éli pérsidént dés states . Du coup is ont décidé d'canger d'nom pour éviter tout' bérlure* conme is dit't , pisqu'is n'sont poin d'avis avuc tout ch'qu'i bave éch t'honme lo .

 Pour se fouére is ont coési d's'appeler " OLD ZOO " qu'i vut dire zoo bizarre . Ed tout sin* , Trump avoék sés caveux oranges , on porroait étou l'v...ir din un zoo . Bén quoé ! Un Donald orange , ch'est bin un canérd orange .... ( oz in voét poin souvint) . O bien din un couét siq'os ainmez miux , pour fouére un canérd à l'orange ... A vous d'vir

*Ahansé = Crée
*Bérlure = Ici dans le sens de confusion
*Ed tout sin = De toute façon

 

Quo qu'i dit ch'co !!

Quo qu'i dit ch'co ?! Éh ben i dit un grand COCRICO . In-nhui j'm in vo vous pérler ed Yohann Pruvost ; ahhhh pour seur qu'i l'est moins connut' eq Ronaldo ; Méssi , Zidane ; Parker ; pi toute choc' clique d'ésportifs maqués à millions !

Nan, li Yohann Pruvost ch'est un marathonniens qu'i l'est d'chés Heuts* pus ézactemint ed marck à 1 liue* à peine ed Calais . Smaingne passée i l'o fini 29 éme dé ch'marathon d'nouillorke* ; pi ch'est poin toute ch'est l' 3éme Européen , et surtout el preume ed chés Français ; i l'o bouclé sin marathon in 2h 26min 50 s ; 17 km/h ed moéyenne !

Adon vlo pourquoé qu'j avoais invie d'berdler* dé ch'boin gars d'nou poéys . Pour preufe eq din chés Heuts i n'y-o poin toudis dom'misére su fond d'buvatrie* . BRAVO YOHANN

　

*Chés Heuts = Les Hauts de France

Liue = Lieue ; mesure itinéraire 1 lieue valant 4 km

*Nouillorke = New-york

*Berdler= Parler

*Buvatrie = Boire sans discrétion

 

Blockaus à vinde

Os cachez eune moaison ? Os avez ti pinsé à un blockaus ? Ben quoé ? Os n'srez mie géné pér vo voésins ; feut jusse avoér soin à chés vavars * qu'is n'rinté poin pér nuit pincher vo caqueuw . Mais bon , feuro qu'os quittéche chés Heuts* , raport qué ch'blockaus i est à Ver-sur Mer in Normandie .

Feuro étou qu'os saquéche* 214 000 € pour foque eune piéche ed 75 méte carré tout équipé.ye . Tchuisine , salle d'ieu.ye ; koeuffache pér in.ne pompe à kaleur . Mais n'y o poin d'cambe ; bé lo ch'est l'passe-route* ....Cmint cho ? n'y o poin d'champ d'tir din un blockaus ? Os y voéro d'toute !

　

*Vavars = Crabes

* Ches heuts = Les hauts de France

*Saquéche = Vient de saquer ; ici dans le sens de donner de l'argent

*Passe-route = Le comble

*Champ d'tir =ici, la chambre (sans commentaire...LOL)

 

Ch'est boin pour un "coup"

Au Pakistan in.ne file* al o capigné s'mére , al i o foutu dés rutes paoins* din les loupes , paure* fenme , al o rcheut in.ne pignée du diabe !

I n'y o poin qu'amon chés Pakistanés qu'on s'capigne in famille ...Minme din chés heuts d'France ! m'afin , si j'vos pérle ed cho in-nhui ch'est surtout pour vos dire eq pour la prémiere foés in.ne école éd boxe pou chés fenmes al o ouvert au Pakistan ; cha n'sé faisoait poin dvant* .

Pi la ch'est aladon qu'cho'c compétition al alloait vir s'affronter in combat d'famille ; piqu'ch'est cho'm mére conte és propré- file ! Allez vous in vir ...cha proumet !

　

*File = fille

*Paoins = Coups , gifles

*Paure = Pauvre

*Dvant = Avant , devant

 

Dés berbis su ch'périf' !

Os avez ti djo prins ch'périf' mon chés Parigots ?? Si qu'os l'avez djo prins , os avez seurmint croésé dés 2 bidets* o bien dés 2 gvo ch'est du minme parél ( margré qu'on in voét éd moins in moinss su chés routes ) ... 
Bé , réstons i din chés bétals ; vlo ti poin qu'cho'v ville ed Péris al o décidé d'fouére s'abouler ed Ouéssant , in.ne coupe ed bérbis pou z-zés métte su chés roéyons* alintour dé ch'périf' pour favoriser conme is dit't l éco paturache , pi abolir* eune boéne foés pour toute chés tondeusses qu'is impoésonne'te un molé d'plus l'air ed cho'c capaitale .

　

*Chés 2 bidets ou 2 gvo = Deudeuches

*Roéyons = Talus

*Abolir = Supprimer

 

Ch'lac dés cygnes

Non dés z'OS !

Non dés z'OS !

　

Té voéros tu n'peux mie t'tromper , éch caveau i l'est jusse édvant l'sortie conte éch mur , là ouéche qu'a cminche chol ringuie d'carolines* él long dé l'coeuchie* .

Oué ! Ej vouroais bien li vir li , est aisié qu'i m'o dit ed déteuper* ch'l implachmint d'cho's sépulture ... Ma pinse ; j'in connais d'autchuns* qu'is tourn'té coér avu leu pot d'ponpon.nettes ; dés coups à claquer sur plache , népoint* ! ?

A Monaco is n'minqu'té poin d'gingin* . Minme si is ont quére el chucolat , is n'pass'té poin tout leu témps a maquer dés ROCHERS ....! Oué !! Adon , is ont invintion.né dés bornes connéctés pour démucher chés sépultures .

D'éxémpe : Os rintrez ch'nom din cho'b boéte pi os n'avez pus qu'a suire* chu cmin . Tout cho est fin bien qu'os m'direz , mais cha méttro seurmint un térme à ch'métier d'gardien d'chinmetiére .

　

*Carolines = Especes de peupliers

*Coeuchie = Route

*Déteuper = Trouver

*D'autchuns = Certains

*Népoint = N'est ce pas

*Gingin = Savoir faire

*Suire = Suivre

 

　

 

Eune mêlée pértitchuyére !

Eune foés n'est poin costume , j'min vo vos pérler dé sport . I n'est mie d'trop térd pour écmincher . J'ai li din chol gazette éq chés jueux d'rugby ed l'USAP (ch'est ch'clup' ed Perpignan ) qu'aprés avoér jué leu match in pro D2 conte Angouléme ; alorss qu'is étoait't su l'értour* leu autocar i l'o queu in raque in plein miyu d'neune pért* .
N'y o poin d'tchutchute* is ont tartous déchindu dé ch'car pour fouére in.ne mêlée pi pousser ch'bus dusqu'a ch'parkinge d'un grand magasin , histoére dé l'parker lo in attindant ch'réparateu

　

*L'értour = le retour

*Neune pért = nul part

*Poin d'tchutchute = pas de discussion possible