A coeuse qu'os n'él froait't poin?

Os cachez un molé d'ouvrache , os étes a joke* ? Ravisez ichi cho qu'j a démuché din chol gazette : Un coupe d'Améritchains is ont mis inne tchote vidéo d'sur "You tube" in disant qu'is cach'te inne "nounou" pour sogner leu 3 éfants !

Ah j'ai oblié d'vos dire , i feut ainmer chés voéyaches pi qu'ch'est pour fouére el tour du monne . Os srez poayé 1 300€ pér moés ; i feuro garder chés tchots , foaire à minger et ch'tripot* , pi bailler ...un molé d'ayude pou chés dvoérs .

Os n'saquerez poin inne doube ed vo boursicot . Cho'f famille al s'otchupe ed toute !
Alorss ; os n'avez poin coér foait vo valise?


*A joke = Sans travail
*Tripot = Ménage

Feut poin s'mélinger zz'aiguiles

O bien chés pincieuw si qu'os voulez !... Arrien l'tableau conme is dit't a Boulonne . Pour ceusse qu'is sont aragés d'peinture , euss is connoait'te ech tableau ed Claude Monet peinturer in 1896 qu'i s'délonme " La jeune fenme à l'ombrelle tournée vers la gauche "

Ben fidjurez vous qu'i n'y-o inne vérsion tricotée qu'al vient d'sortir . 115 000 piéches tricotées m'surant six métes d'sur quate qu'is ont été rasannés * .

Ch'est bieuw , tout l'monne n'el foait poin !

Mi j'a esséyé , mais cho m'a mis in "plote" ech'ju la !!

 

Du jambon din chés neiches

RAGOUT TOUTOU lé ragout dé mon toutou j'in su fou ! Cha ramintuve ech fime avoék Pierre Richard ; Drés qu'i s'agit d'maquer chés tchiens sont tours in fouféle !

I péroait qu'chés tchiens d'eune tchoté-ville dé Slovénie is sroait'té dévnus complétmint brake * , qu'is froait'te éd'z ébondis du diabe , pi qu'is couroait'té din chés neiches du nord au sut' , ed gueuche éd droéte ...Porquoé fouére qu'is froait'té cho ?

Ben , j'min va vos l'dire . Conme i l'o gramint neigé chés ouvriérs d'la commune is ont balé du sé su chés quérpions* pi cho'c coeuchie* , adon ch'probléme ch'est qu'chu sé i l'avoait sérvi y-o gramint du témps d'cho à fouére du PROSCIUTTO * et i nn'in réstoait sécant morcieuw d'din !

Os pinsez bien qu'a foait l'bonheur ed chés tchiens ! Dés neiches aveuc du gambon conme is dit'té din l' 59 ...i n'in falloait poin sitant pou z'z épinés* !

　

*Brake = fou

*Quérpions = Trottoirs

*Coeuchie = Chaussée

*Prosciutto = Jambon

*Epinés = Excités ; enervés

 

Éne marsupial in vadrouille

N'y-o un canteu qu'i cantoait "Z'avoait poin vu Mirza" La cha sroait putôt adou qu'i est passé Steve ?

Steve ch'est un quokka ( mais sains bulles ech'tilale) ... Un quokka ch'est éne marsupial . Chés policiers is cach'te aprés li pisqu'i sanne à vir qu'i sroait in danger dpis qu'i s'a écapé ed sin îlot au lérgue* ed chés cotes ouést ed L'Australie .

Edpis l'quate janvier i l'est su l'continent et chés gins is l'prind'té pour un rot* , i n'feudroait poin qu'is l'occich'te* , ch'est qu'a doét éte protégé chés bétales lo !!

　

*Au lérgue = Au large

*Rot = Rat

*Occir = tuer

 

Ch'est poin pérmis !

　

Asteure un molé tout pértout din chés villes os avez d'z indroéts réservés à chu " covoiturage" . Os pérkez vo voéture a ch'boin implachemint pi os intiquez deux , troés pérsonnes din vo carette . Dusqu'a la tout est fin bien , est aisié a comprinde .

Maginez qu'el 28 déchémbe n'y-o un gazier * qu'i s'a foait arter* pér chés gindarmes qu'is y-ont dmindé sés papiers ...os pinsez pététe qué j'min va vos dire qu'is zz'avoait oblié ! Wate* !!

I n'avoait carémint poin d'permis . Ech coco la i s'avoait inscrit d'sur un site ed covoéturache et i tringbaloait dés gins pou s'fouére un molé d'pécaille sans sin papier rose coér .

Pour n'in définir ch'est un d'chés 2 passagers qu'i avoait sin permis qu'i l'o du prinde ech volant pour terminer ch'voéyache ...Manne un peuw !

　

*Gazier = Drole d'individu

*Arter = Arreter

*Wate = Exprime le doute

Eune éstation pour décrasser vo bicyclette

　

Ch'est à Baintchun ...Bé a ti min camarate , j'n ai poin dit qu'i falloait qu'té foaiches prinne un bain à tin tchien ! Nan diu nan ! M'infin n'y o quaind minme un raport avu ch'néttiache *

Adon , ej disoais qu'ch'est a Baintchun un tchot poéys a quiques liu d'Boulonne pu précisémint a ch'tchoeur ed cho'f foérêt domaniale ed Boulonne . Is ont installé inne éstation ed décrapache pour chés vélos . Est simpe conme bonjour : Os intiquez chés reules din un rail qu'is sont t'nues pér un bros* a l'indroét dé ch'cade . Os n'avez pu qu'a métte éne tune* din ch'bastringue pi ch'est pérti pour 1mn 30s , et si os éte à "plat" poin vous hein, chés tneux* , a coté i n'y-o un eute compartimint adou qu'os porez z'zés gonffler !

Pi gratoss aveuc cho !



*Néttiache = Nettoyage

*Bros = Bras

*Tune = Ici jeton ; (qu'os acatrais a l'mairrie )

*Tneus = Pneus

 

Ech train fantôn.me !

Mais ouéche qu'i l'est ch'méneu d'train , non dé d'la !!

Cha ch'est l'pastorelle* m'z amis , pour eune foés qu'i n'y o mie d'gréve pi qu'éch train i est aheuré ch'est ch'méneu d'train qu'i est poin d'l avant .

A foait qu'ech train qu'i part' ed Deauville Trouville pi qu'i aboute Paris St Lazare i est pérti à vuide* . Chés gins is n'ont poin pu acceder à ch'quaï piq'ches portes ed l'éstation is étoait'té réstés freumés . I sanne à vir qu'chu chéf ed gare i l'euche yeu quiques problémes avu s'carette .

I l'avoait qu'a vnir in train , a n'li sroait poin arrivé !

　

**Pastorelle = Le comble

*Vuide = vide

 

Dalida su l'cote d'Opale

Sié qu'Dalida al o yeu un tchot ....mais jusse pour min jux d'mot pouri da l'diminche !! 

Os povez canter vous étou , qué bielle fenme Dalida !

https://youtu.be/kDgqgQZ_IuY

El féve dé ch'sémdi soér

　

Qué l'éstricade* ! Dautchuns diront qu'ch'est à morir éd rire , a dépind pour qui !

Ed quoé qu'i nn'in r'torne (ch'est l'cas dé l'dire , minute os allez comprinde) ... Conme tchaque énnée din inne école primaire ed ST Malo un pérent d'éléve i l'offe eune piéche* ed galette dés roés à chés margats qu'is l'mingeront au momint d'l archiner a leu moaison .

A peinne rintrée à s'barraque eune jone pouillette al croque a plein dint din cho'g galette, et la "crak" al quait su cho'f féve . Tout' in foufélle* al l'lé détique dé s'bouque pi sin vo l'moutrer à s'mére . NON DÉ D'LA qu'al foait l'mére in ravisant cho'f féve , est poin hontabe ed vir eune cose paréle qu'al s'égozille din tout l'barraque ; is éront d'més nouvelles ....Quoé qu'i s'a don passé qu'os vos disez seurmint pour qu'al seuche érmonté conme eune pindule avoék un r'sor in bos .Bé vlo :

Cho't tchote guérnoule al a tombé d'sur inne féve ÉROTIC aveuc mérqué levrette ed'sur . Cho'b boulingére al avoait baillé* l'galette réservée a un clup ed rugby . Ma pinse ; j'mé dminne bien qué féve qu'is ont yeu chés jueux d'rugby !

*Estricade = Coup dur

Piéche = Ici une part

*In foufelle = Exitée, énervée

*Baillé = Donné

 

Ch'est pon mi ch'est li

Os ons* déjo tartous intindu pérler din chés gazettes o bien a ch'poste ed télé qu'un jumeau i l'avoait djo ésseyé dé s'fouére passer pou sin frére a un égzamén , un concour .

Mais lo ch'chéf ed cho'p prison i n'o poin sintu vnir l'infilure*!

A s'passe mon chés Perouviens , un jumeau qu'i rindoait visite à sin frére in gayole* pour inne durée d'seize ans , n'a rien treuvé d'miux qué d'droguer sin frére in li offrant a boére pour l'indordler* .

Pi ch'condamné i l'est sorti pér chol grand porte fiér conme un tchot banc , arnaqué aveuc éz'z habillures ed sin fréres .

A l'heure d'in-nhui i queurt toudis ; is n'ont tours* poin réussi dé l'racacher ch'gazier la !

*Ons = Avons

*Infilure = Ruse

*Gayole = Ici dans le sens de prison

*Indordler = Endormir

*Tours = Toujours

Chés cacheux is foait't leu cinéma

　
I nn'o poin deux conme cho au Nord éd Péris qi'is disoait'té din chu jornal . Adon in n'in dvisant aveuc min bieu frére el jour dé ch'réveillon eq li ch'est un ravagé d'cache , ej pinsoais li apprinne quétchose , vlo ti poin qu'i m'déclaque qu'i nn'avoait djo foait à Montreuil ( poin 2 conme cho au nord éd Péris qu'is disoait't ...)

Marchez , j'vous in touche quiques mots . A s'passe din un grand magasin éspécialisé din l'cache et l'péque , a l'intrée is ont mis un simulateur ed tir pour chés bétals qu'is seucht'te a pleumes o bien à poilles ; cras Ó tchot gibier . Ch'est un acrinquillache* ed visée qu'o peut métte su tous chés fusils , cha carcule el trajéctoére ed chés projectiles , érproduit l'impac* ; corrige el line ed tir pindant l'visée pour qu'ech tireu i peuche comprinde a coeuse qu'i l'o loupé cho's cibe .

Os povez minme vous abouler aveuc vo propre é-fusil , chu systéme ed visée i l'est adaptabe su tous chés armes . Coésir ed cacher in plaine , o bien din chés huttes , coésir étou chés décors pér driére . Pi pour chétlo qu'is vourroait't bien ésséyer mais qu'is n'oseroait't poin tirer su dés bétals , os porez coésir ed flinguer dés platieux ( bal - trap) ....!

　

*Acrinquillache = Petit materiel divers
*Impac = Impact

 

Sale témps pou chés voleux

Deux galibiers d'eune quinjaine d'énnées is s'sont foait péquer pér chés cadoreux*. Atandis qu'is étoait't in route a déroufler* eune moaison ! Is n'avoait't seurmint poin prévu qu'pér nuit i-y éroait queut* dés neiches !

 Du coeup chés gindarmes is ont pu r'lever aisémint chés eimprintes laissiés pér leu keuchures ; pi z-zés suire* pour arriver diréc a ch'batimint d'chés apprintis voleux !

 Un tchot pas pour chés voleux , mais un grand pas pour ch...és cadoreux !

*Cadoreux = Gendarmes
*Dérouffler = Voler
*Queut = Tombé
 *Suire = Suivre

 

Feut rigoler

Ch'est poin quand qu'os srons a teupe qu'i feuro rigoler !

Eune chinquantaine ed pouillettes in t'nue élgere* qu'is dainse'te su chés toéts d'chés grosses carettes bitaclées* ....
On porroait croére qu'oz est a un mériache ; o bien un intéremint d'vie d'garchon ! Guéte ém n'eule ! ch'est bél est bien un convoé funéraire , d'un conseiller local din éne tchoté ville ed Taïwan .

200 quate-quate qu'is formoait't ech convoés , qu'a provoqué dés bouchons du diape din tout ch'poéys !

 Ch'honme la ed 76 ans i l'avoait quére ed fouére la fête , du coeup ses gins is -y ont poayé un intéremint poin ordinaire !


*Elgére = Légere
*Bitaclé = De plusieurs couleurs

 

Poayer in liquide

Soin , ch'est poin ch'liquide qu'os pinsez ! La Havane amon chés cubains , conme is sont un molé d'érgint court* in ch'momint , is ont yeu l'idée ed proposer à chol République Tchéque ed rimbourser leu détte aveuc dés mérchandises don ... Du RHUM .

Is ont quaind minme eune détte ed 260 millons d'Euros . Si is treuv'te in accord avoék tout leu dviserie* ; chés Tchéques is éroait't eune réserfe ed rhum pou lés 130 ans qu'is vienn'te

Peu qu'mainqué , i veut coér miux éte poayer in rhum ; putôt qu'in " tchéque" sin provision ! Népoint * !?

　

*D'érgint court = A court d'argent

Dviserie = Pour parler

*Népoint = N'est ce pas

 

Soin à chés coéchons seuvages

　

Attation à vo voétures ch'est din chés courts jours qu'os érez puss ed canche ed fouére inne rinconte avuc un chevreuil o bien un sanglier surtout pér nuit obien al pointelette* , is roul'té gramint , is s'sint't un molé épinés* , ch'est normal pisqu'o n'est in période ed cache .

Stapindant si un jour os vnoéte a chambuquer* un bétal parél i vous feuro prévnir chés cadoreux edvant d'él querquer din vo carette . Si qu'os l'faisez poin os porroéte t'éte atchusé ed braconnache si os vnoéte a vous fouére péquer pér chés gindarmes .

Ej busioais* a pér mi minme raport a chés assurances ...écmint qu'cha s'passe ?

Feut savoér qu'os avez 5 jours pou l'déclarer mon ch'l assureur ; prindez quiques fotos pour prouver qu'os avez bien yeu un ch'tar* avoék un bétal ! Pi pour nin définir si os éte assuré a tous chés risques , vo assurance al couvriro toute mais os érez éne "franchise" ed 300€ !

Si os éte qu'a ch'tiers , os erez du tracas à vous fouére , os n'srez poin indémnisé ; hormis si os vos r'tornez su ch'l organisateur d'eune "chasse en cours" Si éne partie d'cache est prévue , eune gin doét souscrire eune assurance pour tout leu cacherie* .

　

*Pointelette : la pointe du jour

**Epinés = Agacés , enervés

*Chambuquer = cogner , heurter

*Busier = penser

*Ch'tar = Coup

*Cacherie = Raport à la chasse

 

Un sérpént tigue din ch'sapin

Os ons déja reuvé pu bieu présént* à ch'piéd dé ch'sapin . Eune moaitresse ed maison al o déteupé* din sin sapin d'Noé un sérpént tigue qu'i o ésséyé dé s'fouére passé pour inne guirlande .

Adon cho'f fénme al o vite érperé l'infilure* qu'a s'tramoait dvant sin néz ! Ahite , ahite* , al o applé chés cacheux d'sérpénts professionels . Feut savoér eq ch'est un bétail vrimeux* et qu'i peut mzurer dusqu'a troés métes ed long . Mais cho'f fenme lo al n'o mie été effoayée , pisqu'in attindant chés scours al s'o foait eune tasse ed thé !

Os m'avourez qu'i n'est poin rére d'avoér "les boules " a Noël ; mais à ch'poin la ....cha passe-toute !

　

*Présént = Cadeau

*Déteuper = Trouver

*L'infilure = Ruse

*Ahite = Vite

*Vrimeux = Venimeux

 

Ech'solé i coute quér

Vlo inne idée , qué j'én sais mie si ch'est inne bouéne idée o point ; mais pour mi al vo fouére sin cmin , cha sroait point drole ed vir cho biétôt in France .
Amon chés Portugués n'y-o un décrét dé ch'preume d'ahoute 2016 qu'i dit qu'chés proprios qu'is ont dés moaisons avoék dés poéysaches* fin rétus * , o bien eune esposition a ch'solé el long du jour , is poairont puss d'impôt foncier dusqu'a 20% d'ramindo* .

Rasseurez vous "Méssieurs Les Portoss" .... Si qu'os avez eune baraque avu ch'solé et inne vue manifique mais qu'al veut moins ed 250 000€ ed valeur fiscale , os n'poérez poin cho't taxe . Tout du contraire , si os avez eune moaison qu'al donne su chol chimetiére , vo impôt i bachera ed 10 %

Cha "TOMBE" bien !!!!

　

Poéysache = Une vue

*Rétu = Beau , mignon

*Ramindo = supplément

 

Tiéns , niffe coco !

Os éte inne bouque à chucolat , os nn'in mingeroéte su l'tiéte d'un tégneux ; ej vous comprins ch'est télmint boin sin tchoeur conme on dit a mzure à chés moucrons*
Et si qu'oz vous proposeroéte dé l'niffler ? Amon chés Allemands ch'est à l' mode din chés soérées éléctros , is nifft'té chu cacao pour fouére durer pu longtémps l'arome din leu cerveau , et s'sintir bénaise durant eune dijaines ed minutes .

Mais attattion si sniffer du cacao a n'est mie daingereux , os risquez quaind minne inne tneumonie* , raport à chés éfféts piquants do'p poute *

　

*Moucrons = Enfants

*Tneumonie = Pneumonie

*Poute = Poudre

 

Boéne énnée

Ej souhaite à tertous chés gins dé ch'blog  et d'eute pért eune boéne énnée eune boéne santé longue et vigoureusse , pi granmint d'bonheur pour 2017 . Mettez vou main.ye a vo porté-monnaies et n'erguettez poin cho qu'os don.nez .

Un cot , un tchien , inne mouque , mets du Picard din t'bouque !

Conme ej pinse qu'os avez du bin bibron.ner durant chés fêtes , adon i n'vous san.nera poin drole dé cmincher l'énnée avoék no 2 buvatiers préférés ! ...

 Adé et coér inne boéne énnée !

Posté-scriptum : Buquez su l'imache si qu'os voulez l'vir in pu grand !