I m'o copé l'appétit

Ej connaichoais chés Indiens qu'is s'alonge'té d'sur eune planque griblée d'cleus* avoék troés ò quate types qu'is pass'té qu'is rapass't édsu li sains qu'il euche el moinde affolures* .

Mais lo , os ons coér franchi un cap . Ch'est un policier Indien qu'i l'o du s'fouére opérer pér aprés avoér ingurgité 40 coutieux in 2 moés !

I sanne à vir qu'i l'éroait sécants* pouvoérs spirituels , ch'est cho qu'il o dit ! Tours* est i qué ch'cérusien i l'o mit 5 heurs pour déssaquer tous chés coutiex dé s'n éstomac

　

*Cleus = Clous

*Affolures = Blessures

*Sécants = Quelques

 

Un maire au poille !

Tchiéche qu'i n'n o poin reuvé d'avoér un tchien conme maire ed sin villache ! Nan , j'én décaroche poin .

Chés 12 habitants dé ch'tchot villache ed cormorant ( cormorant ? coér un bétail ? ch'est pététe l'adjoint dé ch'maire ....LOL) Nan? Cormorant ch'est din l'Minésota mon chés Améritchains chés 12 habitants is ont éli DUKE un Berger d'chés Pyrénées ed 9 ans d'age conme maire ed leu villache !

Marchez ! ha n'est mie ch'preumier coeup i l'avoait djo otchuper ch'poste in 2014 . Éli maire avoék 75% d'chés voéx .

 

Ch'dikss é golf

L'eute coeup y-o min bieu frére qu'i m'dit : T'os vu à ch'bos Magnier* n'y-o dés gins qu'is lainch'té dés diksses . J'i r'torne ; quoé qu'a n'est coér qué ch'l affouére lo non dés boé !!

A sroait ti dés gins qu'is plotroait'te* ( conme is dit'té din la somme) chés diksses vinyls ed leu tayons din chés camps ? pour sur éq si i leu minqu'té des sillons , din chés camps is dvroait't é nin déteuper* in.ne sécant .

Tais t'te n'dit poin d'cacouille qu'i m' déclaque ch'est du sérieux ; ch'est du "DISC GOLF" qu'is applél'té cho . Ch'étoait un molé conme din chés énées 70-80 quand qu'os s'éjuéme à ch'FRISBEE ; hormis qu'lo ch'est un vrai sport avu chés compétitions ! ....Cmint qu'on s'éjue aveuc ?? A n'est mie compliqué : Tu t'aplaches à 50 métes pour chés nouvieus et 200 métes pour chés kracks pi tu lainches tin diksse din eune corbeille ch'est conme cho qu'is l'délonm'te avoék éne coupe ed chaines alintour , qu'is sert'te à freiner ch'diksse pour qu'i quaiche* pus facilmint din cho'c corbeille .

Marchez mes gins , asteure os connaissez la musique , si j'peux dire ! Alorss si os allez triner vo guettes à Berck , allez à ch'bos Magnier (prés dé ch'catieu d'ieu.ye) , asseuré qu'os passerez un boin momint in famille .

　

*Bos Magnier = Un bois à Berck

*Ploter = jeter avec force ( surtout utilisé dans la Somme )

*Déteuper = Trouver

*Quaiche = Tombe

 

On peut toudis compter d'sur un boin camarate

　
Deux vaganciers is s'proméne'té din la jungle (pô chéle ed Calais) l'eute , el vraïe ! Quand tout à coeup is voét't s'abouler pér dvant euss un ion , un ion maoués qu'i cache és coaille* ! Bérnique , qu'i foait l 'un dés deux luronneux os ons minme poin d'arme pour nos définde !! l'eute i déssaque eune paire ed basket ed sin sac pi cminche a z-zés coeucher !

- T'es badeux qu'i foait l'eute , té croés tout d'minme poin qu'té vos queurir pu vite eq chu bétail lo ?!

- Ben sur éq nan , mais j'vourroais déjo queurir pu vite eq ti !!

　

*Ion = Lion

*Maoués = Mauvais , méchant

*Coaille = Repas

Conduite mie bien accompagnée qu'cho !

　
Cho'c conduite accompagnée ch'est fin bien pour ches jones nivlets qu'is apprind'te à rouler . Mais feut coér qu'os peuchonche fouére fiate* in ch'l accompagnant .

Béyez ch'qui s'o passé din l'Lot et Garonne , chés gindarmes is ont arté in.ne voéture qu'al rouloait à 160 KM/h à plache ed 110 . Ech méneu d'carette i l'avoait foque 17 ans d'age , pi l'étoait in conduite accompagnée conme on dit asteure . J ai idée qu'i l'étoait mal achuchon.né* . Ch'étoait s'mére qu'al étoait aveuc ....Pi al n'o poin pipé mots à chés cadoreux . Troés infractions l'ont été r'tenues conte cho'm mére .

　

*Fouére Fiate = Confiance

*Achuchon.ner = S'associer

 

Un brave honme !

Ch'est vraï qu'él long du jour quante on r'béye ech poste ed télé o bien à mzure si on acoute ech poste éd radio , i n'est poin rére ed vir chés vedettes qu'is s'foait'te érmarquer din chés rubriques pou chés drogués , o bien qu'is roul'te à dés vitéches du diape pi in ramindo* seu* conme trinte six mille honmes !

SUFFIT ! In.nhui j 'm in vo vous conter cmint qu' Robert Redford " ch't honme qu'i murmuroait à l'oréle ed chés gvos " , i l'o poin térinté* in.ne minute d'arter* sin tournage in Nouvelle Zéllande pour bailler un molé d'ayude à un bidet qu'i l'étoait ataké à éne barriére à rase dé ch'l autoroute . Pi ch'est poin toute on voéyoait bien qu'cho'p pauve bête à l'avoait té lapidée* ....Redford i ll'o scouru chu gvo pér aprés avoér contacté un r'fuge .

Ch'est in.ne histoére qu'al m'o gramint plét . Quante chés gins connut' is foait't in.ne bouéne action ; i feut étou savoér él dire !

　

*Ramindo = En plus

*Seu = Saoul

*Térinter = Hésiter

*Arter = Arreter

*Lapider = Ici dans le sens de maltraiter

 

Qué wignerie !

On diro pu facimint à un nazu quoé qu'i l'o à wigner conme cho ! O bien d'un cat qu'i n'décesse poin d'miauler , ò a mzure eune barriére mal graissiée !

Mais lo , ch'est Anthony un jone Améritchain qui wigne in d-din d'li minme , pér aprés avoér inhalé un juét pou chés tchiens . Du coup asteure drés qu'i réspire i wigne conme el pothui* du bout d'no courti .

És mére al l'o memé à l'hosto rondébilis et i s'porté bien ; in attindant qu'chu cérusien i li déssaque ech meudit juét d'sin nez !

Normalmint os dvroéte pouvoér raviser cho't tchote vidéo in d'sous !

<div style="position:relative;padding-bottom: 56.25%;padding-top:0;height:0;"><iframe allowfullscreen="true" webkitallowfullscreen="true" mozallowfullscreen="true" frameborder="0" src="http://www.gentside.com/embed/kfiAxs94U7QtTempVFdF2A" style="border:0;position:absolute;top:0;left:0;width:100%;height:100%;"></iframe></div><br /><a href="http://www.gentside.com/insolite/insolite-il-inhale-le-sifflet-d-039-un-jouet-pour-chien-et-couine-quand-il-respire_art76265.html" target="_blank">Insolite: Il inhale le sifflet d&#039;un jouet pour chien, et couine quand il respire ! </a><i> par <a href="http://www.gentside.com" target="_blank">Gentside</a></i>
　

*Pothuis = Vielle porte en bois souvent dans le jardin qui sépare par exemple le potager du poulailler

Ech' l ouverture ed cho'c cache

Ch't aladon qu'in été tu vouroais dés " faits divers " eq t'in treufe poin ! ò tout du moins rin

d'bien racachant .Au moés d'ahout' n'y o rien d'bien à ch'poste éd télé , pi rin non pu din chés gazettes ; qué bren !! Normal , qu'os m'direz , on treufe mie d'faits divers in été !!!! Qué décarsure ! Habile chés courts jours !!! Pour se fouére vlo un téxe Picard qu'i m'o bien foait rigoler ! A s'appelle : Éch l'ouverture éd cho'c cache

　

L'abbé Billoré , ch'tchuré à mouque d'Ochincourt , du temps qu'il étouot tchuré d'Gueschard , i n'mantchouot janmoés d'fouaire eune messe à chonq heures du matin, l'jour d'éch l'ouverture éd cho'c cache , pour tous ché cacheus .

Eune énée , conme i sn' allouot à pieud foaire és deuxiéme messe à Vitz , il a intindu deux coups d'pétoére , pi un bieu capuchin il a tcheu din sés gambes .

Ej t'y prénds Philogonme , t'as treuvé l'sin d't'élveu pour cho'c cache , mais j'én t'ai poin vu à l'messe éd chés cacheus . Est hontabe ! Tin liéve , ch'est pour ém panche .

- Bon d'accord , monsieur l'tchuré , éj vo l'donne .

L'abbé Billoré , fin contint i r'prénd sin cmin . Mais quoé foaire dé ch'bétail ?

Au rados d'un roéyon , i r'trousse és souténe , il ahoque chu liéve in dsous , pér ses pattes ed derriére à ses bértelles , pi i n'y pénse pu .

Mais vlo ti point qu'din l'mitan d'és messe , éch meudit liéve i déchénd tout duchmint l'long d'ses gambes , fil a msure éd chés génufléxions . I n'nén avouot gramint dé ch'temps lo . Chés eureilles i cménch't à dépasseu pér in bos .

" Mon diu , qu'i dit un éfant - tchoeur à sin voésin , cho ch'est un tour . Monsieur l'tchuré il est in route à véleu ! "

　
Robert Touron

 

HÉ ZI qu'tu m'épouseroais ?

　

N'y o un momint donné i feut savoér sé jter à l'ieu.ye ! Ed tout sin , pour dés maqués* d'pichine ha n'est mie drole os m'direz !

Chol Chinoése HÉ ZI al o été médaillée d'argeint din chés plongeons à chés J-O d'Rio . adon ch'qua n'savoait poin ch'est qu'a pein.ne qu'al euche déchindue dé ch'podium y -o un Chinoés plongeur li étou qu'i s'a mis à 2 jnoux pour lé dminder in mariache .

Fut dit fut foait i li o passé l'bague à sin doégt , pi i l-lo cowaté* un tchot momint ! Marchez més gins oz o poin yeu l'droét à ch'bécotage ; el jury i leuz a dmindé d'arter * leu chinoéserie ....Ech public i rioait "jaune " pi is éroait't bien volu garotter du riz à l'sortie dé ch'bassin !! ( du riz à tchuisson rapide bié sur , conme ch'est un mariache qu'i s'a foait à toute vitéche ) !!

　

*Maqués = Passionnés ; mordus

*Cowaté = Dorloté

 

Ch'flux zé reflux

　

A ch'boin témps su chop' plage ,

I y-avoait in.ne gin qu'i rioait !

I l'étoait tout seu ,

I riaoit , i rioait ! Ha ! Ha ! Ha !

I déchindoait avu cho'm mér ...

Ha ! ha ! ha !

I r'montoait avu chom'mér ...

Ha ! ha! ha !

Alors j'i dit :

A coeuse qu'os riez conme cho ?

I m'rinfique :

- Ch'est l'va et vient ...

- Ben quoé ch'va et vient !

Et i m'déclaque :

- Chu va et vient cha m'foait " MARÉE "

　

R Devos

Chés cadoreus mis "au parfum"

Chés cadoreus* d'Boston mon chés Ritchains is compte in.ne nouvelle camionnette qual sort vraimint d'l ordinaire piq ch'est un camion -glachier . Éh oué asteure os pourez avoér cho'g glache cadoreus in 2 parfums...Parfum "tazeur , et flash ball " avoék un molé d'l acrimo par d'sus !

Sié ! a n'est poin des mintiries , chés policiers d'Boston is off'té des glaches à chés gins pour dégeler chés érlations intre chés gins pi chés cadoreus !! Si is vouloait't dégeler chés érlations ch'est putôt dés boulets d'carbons qu'is éroait't du offrir !!

Marchez mes gins ; os ons poin coér tout vu din nou vie !

　

*Cadoreus = Ici dans le sens de gendarmes

 

10 minutes

J'm édvise avoék in.ne gin , histoére ed berdler un molé cha foait passer un tchot momint

Pér aprés 10 minutes ch't honme i m'déclaque :

- M'sieur tous vo nunuteries n'm intéresse guére . Os m'avez foait perde min témps ; 10 minutes ed pardues , ed vo feute à vous .

Et pi i décampe ed la .

Mais voéyez vous ; j'n ai poin quére qu'on m'foaiche dés r'proches , a malaise quante is n'sont mie justifiés ! Manne un peuw ! ed quél droét i s'permet ch' gazier la ...

Alors' j'm érprins , ej cours conme un dératé pour racacher ch'bonhonme et j'i robole :

- M'sieur ; os m'avez bien dit qu'ej vos avez foait pérde 10 minutes ! Éh bin , j'viens ichi dé nn in pérde dix à insayer d'vous rattraper ! Os sonme quitte , ti poin vraï !!

Ippon !!

Éh oué , un ippon pou chétlo qu'is n's i connoaiss'té poin din chés Arts martials ; ch'est quante os faisez un bieu mouvmint in judo o bien in Karaté pi qu'chu combat i s'arréte nét , nét conme torchette ! Pi os guégnez ch'combat

Mais os ons mie bsoin dé s' n aller à Rio pour vir un molé dé sport dé combat ! R'guettez putôt ch'qui s'a passé à Bordeaux ; in.ne fenme al o déhoqué cho'm médale in or din l'épreuve ed judo ! Alors' qu'al marchoait fin bénaise din chés rues , un vastépluc* i ll'o dépassé in asséyant d'li barboter sés leunettes ed solé , au minme momint al o ahoupé ch'gazier pér el colbac pi al l'o foait valdinguer à dés heuteurs du diape ,pi immobilisé in moins d-deu.ye . Ch'est minme elle qu'al o applé chés scours !

Bé ! J'vous ai pô dit qu' chof'fenme lo al est championne ed judo !!

　

*Vastépluc = Un moins que rien

 

L' coeuchie d'chés " ALLOCS"

　

Vlo ichi eune émission qu'al o té torné din ch'quartier d'St Leu Anmién et al sro diffusée el 17 d'ahout' d'sur M6 .... Marchez , ha n'est mie pou fouére vir à la France intiére écmint qu'chol langue Picarde al est coér fin vértillante* din ch'quartier lo d'Anmién .

Nan , os n-n éte loin . Ha sro pour moutrer à quoé qu'a r'sanne el vie ed 6 millions pauvérs gins in France ; et is ont coési ch'quartier St Leu avoék chés 19% d'chés gins à joke .

Qué décarsure ! Coér un coeup os vons fouére vir au monne no région (chés heuts d'France) conme eune région adou qu'i n'y-o foque du chômache , dés paures lazéres , pi dé l'pleufe ! Nan mais , o ti du sén ?! Ahh... is dit'té qu'i y'éra dés pérties d'rigolades din ch'l érportache ! Ben , minqueroait pu qu'cha qu'in ramindo* qu'o n'seuche poin rire .

Manne un peu ; et pi cho's saison 2 ...Al sro ti tornée à Calais ?

　

*L'coeuchie d'chés ALLOCS = La rue des allocs " titre de l'émission "

*Vertillante = Bien vivante

*Ramindo = En plus

 

Quo qu't as pékaille !

　

Alors , i sanne à vir eq chés sportifs din certains cabarets d'Rio , i n'euch'té mie l'droét ed jejter du papii din cho't tchuvette , ed dégobiller d-din , o bien d's'ajouquer d'sur !

  La d'ou qué j 'n in su rester tout étombi ch'est quante j'ai vu ch'tchot déssin " interdit d'péker" Mais quoé qu'on peut bien péker la d'din ...manne un peu !! Pi ech darin déssin in bos à droéte , i n'est poin aisié dé l comprinde ! Quoé qu'i brasse li à quate pattes ? Maginez s'qu os voulez !

Eune grenade poin d'trop tchuite !

Pour sur eq si j-jour lo à ch'menu i y-éroait yeu do'p purée chés 2 chéfs dé ch'réstaurant is éroait't certainemint guégnés du témps .

Ll'histoére lo ; a s'passe din la Sarthe à la Fléche . Geoffrey in vuidant chu so* ed peumes ed terre i lo queut d'sur éne grenade ed cho'l ségonde djerre mondiale . Al étoait rouillé.ye , mais is n'savoait't mie su l'momint si al étoait désamorcé.ye .

Chés cadoreus is leuz ont r'commaindés dé n'poin s'fouére ed bile , in leu disant qu'al éroait djo ésplosée si ch'n étoait poin l'cas !

Chés patates is vienne'té d'chés heuts d'France ; probabe qu'is euch't été ramachés din un camp edvant d'éte mis din un so

　

* So = Sac

 

Option drague à ch'l égzamin

I feut i couquer pour réuchir din la vie ? In tous les cas amon chés Chinoés i s'y prépar'té hardimint . N'y o un marister la bas , Mr Xie Shue i l'apprind à sés éléves écmint s'fréquenter , s'amouracher , s'acoquiner avoék éne parsonne ; ch'est eune mémiere conme éne eute ed récouer dés points pou ch'diplome a vnir qu'i rinfique ech't honme !

" Ecmint qu'os réagiroéte si qu'os prindroéte un ratieu ?? Én garottez poin chés fleurs qu'os vnez d'li acater . Pinsez à vous rapurer qu'i dit ch'marister .

Déjo pu d' 800 inscrits , eune goutte é d'ieu.ye piq la bos is sont pu d'un milliard ed gins

 

Quique pért din eune moaison d'értraite !

Qu'is sont fin amiteux din cho'm moaison d'értraite , pou chés fétes os ons yeu chatchun un téléfone portabe ; mais pou cho'v voésine d'in dsous is éroait't poin du, pachqu'al viusie pi al dévient myope conme in.ne taupe . Ch'est ténant, à chaque coeup à s'bérlure , al prind chol télécomainde dé ch'poste ed télé pour sin portabe ; quante on cache pér aprés chol télécomainde al est toudis muchée din s'robe éd chambe .

L'eute jour os r'béyoéme un match ed footeball in minme témps qu'al passoait un "SMS" ... Au momint qu'chu jueu i l'alloait mérquer un BUT oz o yeu " france 2 , canal+ , la 6 ; qu'is l'ont défilé dvant no ziux !! On n'n est réyu , arcran ch'est qu'on n'in dvaroait minme à mitan brake .

Os ons don lainché éne péticion pour qu'oz i r'tire sin portabe . Ech directeur qu'i l'est fin rétu pi aringeant , i li o acaté un téléfon.ne pou chés vinigouttes , avu dés touches .. gros conme min poingt , un portabe d'un mete chinquante dé heuteur sains compter ch'l antenne qu'on diroait qu' gra-mére al jue din chés trainsmicions d'el 7 ém compannie ! Crénon dés z'os , dés pénés d'touches , un coeup j'ai volu invoéyer un "SMS" aveuc sin portabe , ben , j'ai yeu in.ne tindinite !!!

Roustintin

 　

N'y o gramint du témps d'tout cho , j voéyoais chés Dockers rintrer mon ch'cabartier quand qu'is jokoait't inter 2 batieu.ye . Din chés courts jours i n'étoait mie quéstion d'harlander* , mais os cachoéme un molé d'kaleur edvant d'érpartir trimer .

Pour sintir un molé d' keu.ye din nou breule os avoéme l'habitude ed boére un ROUSTINTIN . Mais quoé qu'a n-n est qu'cho ? "Simplémint" Eune gatte ed chucolat koeud , avuc éne rasade ed Kirsh ....Connut' din tout ch' Nord Pas d'Calais à chu XIX° siéc , ch'est eune boéchon pou chés ovriérs d'forche surtout in hiver mais al o bien falli éte abolie . In -nhui al est wére connu, hormis pététe din ch'bassin Boulon.nés

　

*Harlander = Trainer au travail

　

Os voulez ti ch'l érchétte ??

Ed quoé qu'os avez dzoin pour chonq parsonnes :

- Un lite ed lait

- 20 Chintilites ed Kirsh

- 150 granmes ed chucolat à tchuire (pu régalant avoék du chucolat noér)

Erchétte :

Berziller cho't tablette ed chucolat in tchots morcieu.ye

- Elvez ch'lait à témperature din eune castrole :

- Quante ech lait i cminche à funker , incorporer chés morcieux d'chucolat duchétmint , in touillant bien avoék éne tchuillére in bo

- Pou nin définir , ajoutez l'kirsch tout douchétmint in n'décessant poin d'touiller

- Saquez-l-lé dé ch'fu , pi balez toute din dés gattes....Nifflez , pi pourlétchez vous

　

In.ne saquoé intindu su chés quai.yes vlo éne sécants d'énnées " L'miu , ch'é biaucouw d'Kirsch , pi in ti pauw eud chocolat " (Patoés d'Boulonne )

 

In.ne cabi-biotéc

l'l idée al o débutée pindant l'fête du villache a ch' moés d'juhiet 2015.

Alors' éq tous chés cabénes téléfonics is disparaichoait't ti à ptit dé ch'poaysache , chu poéyis d'Boissey prés d'Lisieux din ch'Calvados avu ch'maire pi s'n étchipe municipale , is ont maginé ed modifié él- leute* in bibiotéc .

On peut l'treuver a l'intrée dé ch'villache su ch'parkinje , chatchun peut aisémint r'béyer chés lives , z-zés préter o bien z-z écanger . Et pi cha marche , n'y o un monne phénoménale !

　

*Él-leute = la leur

 

A chatchun sin régime

N'y o sartain d'intre vous qu'is connoaich'té surmint Ma Long (prononcher longue) .... ! Soin , Ma Long cha n'est poin ch'l engin ed Rocco Siffrédi ! Nan os nn' éte loin ; Ma long ch'est ch'capitain.ne pi ch'liméro 1 ed chés pongistes Chinoés , un rute crake ech't honme lo ! J'ai déteupé din cho'g gazette sin régime alimintaire a l'appreuche ed chés J-O d' Rio

Acoutez bien, est court , mais j'su seur et sartain qu'os allez n-nin réster béc é borne ! Asseuré qu'ch'est un graind jueu d'pin-pong ,sié, un graind jueu mais qu'i n'sait poin contôler sin "stress" ! Si fait, qu'és n intraineur i y-o treuvé éne saquoé pou l'rapurer dvant d'inroéyer* un match ; i li foait boére un molé d'alcool , i vo mon ch'cabaret et i lape dés Caïpirinha . Pi ch'est poin toute , in minme témps qu'i flute és bistouille i feut qu'on li pérle pi qu'i rigole pour li canger sés idées ! O voérro d'toute

　

* Inroéyer = commencer

Cha "tombe" bin

Din éne chinmtiére y-o granmint d'oches !! Mais quiques foés n'y o étou dés z'os ; dés z'os ; dés z'otaries !!! J'éroais ti prind un coup d'solé su m'caouéte pi qué j'varroais à décarocher ?? Seuré qu'nan, vlo d'quoé qui n-nin r'torne :

Éne Austrayiénne al o yeu l' frousse dé s'vie . Quante al o té prinse d'éne invie d'picher din chol chinmtiére . In ovrant cho'p porte ed chés watérs al o saqué dés ziux conme dés tchus d'gattes in voéyant pér dvant elle in.ne otarie à fourrure ed 120 kg qu'a faisoait un sonme .

Ech conseil mulicipal i l'o contacté chés sérvices dé ch'parc qu'is ont indordlé* ch'bétail edvant d'l érlacher d'sur éne plage ed chés invirons ! Sié ; is l-l ont rmis " a l'eau tarie "

Bon ; amarrons là* pour in-nhui !!!!

　

*Indordlé = endormi

*Amarrons là = Arrêtons là

Vite rintré, "TRÉVI" t'arsorti !

Deux jones californiéns in vadrouille à Rome din cho'c capitale Itaïenne , is ont r'cheut chatchun éne ameinde ed 450€ . Rin à vir avoék éch l addition d'chu réstaurant qu'is n'éroait'té poin voulu poayer a coeuse eq chés nouilles is sroait'té dédjeulasses .

Nan , ch'est foque eq ch'est 2 gugusses la , is leuz ont baignés pér nuit din cho'f fontaine ed TREVI . Probabe qu'is vouloait't raveinne chés piéches eq chés tourisses is garot'té din ch'bassin pour finir leu vagance ! M'enfin ; os m'avourez qua minme qu'cha fouét quér ech'tiket pour rintrer à cho'p pichine !

Soufflé n'est poin jué

Jé n'sais poin si un tour parél i s'a djo passé din chés énées d'édvant ; mais cho'f flanme olympic a nn o yeu dés ruses .

A s'passe mon chés Brésilliens ; el flanme olypic juste édant d'finir és vérlée* au travers dé ch'poéyis pi d' abouter à Rio el 5 dé ch'moés d'ahout' al o été poursuie pér un gazier* armé d'un éstincteur qu'i l'éroait inséyé d'souffler cho'f flanme . Oz y voéro d'toute ! Attaquer chol torche a graind coup d'éstincteur ! Feut i éte déssinsé à foait !

Aladon qu'cho'f flanme al s'a poin éteind* ; sécants minutes pér aprés ch'porteu qu'i suivoait i l'o put r'prinde ech flaimbeau pour poursuire sin cmin

　

*Verlée = Virée ; voyage

*Gazier = Individu peu fréquentable

*A foait = complétement

 

Éne histoére ed robinet

Vlo chés bieux jours qu'is s'aboul'te pi tchot Phyr i s'avise qu'a sroait bien d'avoér un robinet din sin gardin avoék un long tuyeu por pouvoér l'l aroser . I décide don dé s'rinde mon Colas ch'nouvieu quincaïer por acater 20 métes ed tuyeu , i l'asplique és n 'affoaire a ch'thonme qui li dmainde :

- Ch'est ti du cayoutchou qu'os volez ??

- Nan , j'ainmé miu du plastic

Ch'quincaïer i dréche és n équelle pi i grimpe dusqu'a ch'darin brocreu , i s'artorne pi i dit a tchot Phyr ...

- Est ti gros vo robinet Monsieur ?

- Heu ...conme chi conme cho , j'én sais poin bien vos dire , j'né l-lé janmoés mzuré !

- Voéyons qui répond ch't honme , est ti bien aussi gros qu'vo peu* ??

- Oh , pu gros qu'cho qu'i crie tcho Phyr

Alors Colas i li foait vir un ramon qu'i l'étoait din ch'racoin d'cho'b boutike .

- Est ti bien conme ech manche dé ch'ramon ?

- Bah , qu'i répond tchot phyr ; j'croés qu'i l'est coére pu gros .

Alors i s'in vo a l'porte i l'rouve , et pi i dit à s'fenme qu'al étoait réstée din l'frégate

- Mélie ! N'est ti poin qu'min robinet l'est pu gros qu'un manche a ramon ?

- Bié sur qu'al dit Mélie . I l'est quasimint pu gros qu'un manche ed fourque a feumier , mais i n'est poin si long !

Ch'quincaïer i s'tordoait d'rire in heut dé s' n équelle au risque ed quaire su ch'comptoér , et pi l'quincaïére al tnoait s'panche a deux mains !

- Quoé qu'is ont à s'foute ed mi chés imbéciles lo qu'i s'dit tchot Phyr . S'colére al monte pi i dit :

Ch'est égal pour dés nouvieux vnus din ch'poéyi os n'éte poin gramint d'commerce . Si os vous fidjurez qu'ch'est in vos foutant du monne qu'os érez d'él cliyintéle , os vos mettez l'doégt din l'oeul . Adé, os n'éte poin prés d'm érvir din vo boéte !

Clape ed fin !

Coér éne vieuserie qu'al vo s'intasser din ch'guérnier in attindant d'éte vindue din éne réderie , brocante , o bin a mzure din ch' boin tchuin . Ej berdéle , ej berdéle mais allons droét à ch'disieux* !

Cho'd darin.ne fabrique ed magnétoscopes din l'monne edpis 1970 al vo freumer sés portes . 750 000 l'ont coér été vindu l'an passé , mais rin à vir avoék chés 15 millions d'magnétos vindus din zz 'énnées 2000 . Ch'est un morcieu d'no vie qu'i pért à l'ouste*

Quante i s'o amné din no moaison ch'étoait eune révolution ; on n'étoait mie pu obligé d'érbeyer ch'fime in minme témps qu'léz eutes . Ch'étoait ch'cominchmint dé ch'déréglemint ed chés rythmes é social . Pi l'abolition d'cho'g grainde mésse dé ch'fime el diminche au soér !

　

*Aller droét a ch'disieux = aller droit au but

*A l'ouste = Qui s'en va

 

I m'o piché d'sus !

Ch'est à LOUDUN qu'a s'a passé . Ch'paure honme i racontoait qu'i r'vnoait d'avoér visité ch'gardin médieval ed Loundun din la Vienne (86) . Ch'est quante i l'o touché un cornichon qu'i l'o r'cheut un jét d'ieu.ye din s'n eul .

Ahite* , ahite i l'o té queure ech gardinier in chéf pour li espliquer ch'tour qui vnoait d'y -arriver . ...Ch'est un cornichon picheux qu'i li rinfique ech t'honme , eune plante rére*, in.ne foés qu'al est murt' al aspérge d'un jet d'quate métes chétlo qu'is varoait'te al toucher !

Pi ch't honme fin amiteux i tarmine d'esplitcher qu'al foait cho pou s'erproduire ; pi qui n'feut surtout poin l'mier , i o gramint du témps is s'in servoait'te pour purger chés gins .

　

*Ahite = Vite

*Rére = rare